ថ្ងៃទី​ ៣០ កញ្ញា ឆ្នាំ​ ២០២២ នៅ​ទីស្នាក់ការ​កណ្តាល​នៃ​ធនាគារ អ៊ូរី បាន​ប្រារព្ធ​កម្មវិធី​ប្រគល់​រង្វាន់​ដល់​ម្ចាស់​ជ័យលាភី​ទាំង ៣ ​រូប ពី​ការប្រកួត​ប្រជែង​រចនា​ UXUI របស់​ WOORIWON សរុប​ជា​ទឹកប្រាក់​ចំនួន ៩.០០០ ដុល្លា​សហរដ្ឋអាមេរិក​។ កម្មវិធី​នេះ​មាន​កិត្តិយស​ដោយ​មាន​ការចូលរួម​ប្រគល់​រង្វាន់​ដោយផ្ទាល់​ពី​សំណាក់​លោក​អគ្គនាយក​ប្រតិបត្តិ គីម ហុងជូ គណៈកម្មការ​វាយ​តំលៃ ព្រម​ទាំង​ថ្នាក់ដឹកនាំ​ជាន់ខ្ពស់​របស់ ធនាគារ អ៊ូរី ។

ម្ចាស់​ជ័យលាភី​ទាំងបី​រូប​ទទួល​បាន​នូវ​ប្រាក់​រង្វាន់​ជា​ទីគាប់ចិត្ត​ចំនួន ៥.០០០ ដុល្លារ ៣.០០០ ដុល្លារ និង ១.០០០ ដុល្លារ តាម​លំដាប់ លេខ​ ១ លេខ​ ២ និង​លេខ​ ៣​។ កម្មវិធី​ប្រគល់​រង្វាន់​នេះ​សបញ្ជាក់​ពី​ការយកចិត្ត​ទុកដាក់​របស់ ធនាគារ អ៊ូរី ទៅលើ​ការបង្កើត​នូវ​បទពិសោធន៍​ថ្មី​នៃ​ការប្រើប្រាស់​កម្មវិធី​ធនាគារ​ចល័ត និង​ធនាគារ​ឌីជីថល ដែល​ស្រប​តាម​និន្នាការ​នៃ​ការប្រើប្រាស់ និង​តម្រូវការ​របស់​អតិថិជន នៅក្នុង​យុគសម័យ​ឌីជីថល​។

លោក គីម ហុង ជូ អគ្គនាយក​ប្រតិបត្តិ​របស់​ធនាគារ​បាន​ថ្លែងថា “​ធនាគារ Woori Bank Cambodia បាន​អញ្ជើញ​អ្នក​ដែល​មាន​គំនិតល្អៗ​នៅក្នុង Fin Tech ដើម្បី​ចូលរួម​បង្កើត​ការរចនា​ដ៏ទាក់ទាញ និង​មុខងារ​បន្ថែម​ដល់ WOORI WON ដើម្បី​ធ្វើអោយ​កម្មវិធី ធនាគារ​ចល័ត​មួយ​នេះ​ក្លាយ​ជា​កម្មវិធី មួយ​ដ៏ទាក់ទាញ និង​ងាយស្រួល​ប្រើ​បំផុត​នៅក្នុង​ប្រទេស​កម្ពុជា​”

“​ចក្ខុវិស័យ​របស់​ធនាគារ Woori Bank Cambodia គឺ​ដើម្បី​ក្លាយ​ជា​ “​ជម្រើស​ទីមួយ​នៃ​សេវាកម្ម​ហិរញ្ញវត្ថុ​” ​សម្រាប់​ប្រជាជន​កម្ពុជា​ជាមួយ​នឹង​គុណ​តម្លៃ​ស្នូល​របស់​យើង​ជា​ធនាគារ​ដែល​លឿន​បំផុត ងាយស្រួល​បំផុត និង​ច្នៃប្រឌិត​បំផុត​នៅ​កម្ពុជា​” លោក អគ្គនាយក​ប្រតិបត្តិ​បាន​បន្ត ។

តំណាង​ឱ្យ​ម្ចាស់​ជ័យលាភី​ទាំងអស់ លោក វង្ស ឈឹមឧបុល ជ័យលាភី​លេខ​ ១ បាន​និយាយ​ថា​៖ “​អាច​និយាយ​បាន​ថា នេះ​ជា​កម្មវិធី​ថ្មី​ដំបូង​គេ​ក្នុង​ប្រទេស​កម្ពុជា ដែល​បាន​ផ្ដល់​ឱកាស​ឱ្យ​បេក្ខជន​ទូទៅ រួមទាំង​រូបខ្ញុំ​ផង​ដែរ​ក្នុង​ការបង្ហាញ​សមត្ថភាព និង​បញ្ចេញ​ស្នាដៃ​អំពី​ការ​រចនា UX/UI សំរាប់​កម្មវិធី Mobile Banking​។ កម្មវិធី​ប្រកួត​ប្រជែង​នេះ សបញ្ជាក់​ពី​ការផ្តល់​តម្លៃ​ដល់​សារៈសំខាន់​នៃ​ការងារ​ផ្នែក​រចនា​។ ក្នុង​នាម​ខ្ញុំ​ជា​អ្នក​អាជីព​ផ្នែក​រចនា​មួយរូប ខ្ញុំ​ពិតជា​ពេញចិត្ត និង រំភើបចិត្ត​ជាខ្លាំង​ចំពោះ​ការផ្តួចផ្តើម​របស់​ធនាគារ អ៊ូរី ដែល​បាន​បង្កើត កម្មវិធី នេះ​ឡើង​”​។

សូម​បញ្ជាក់​ដែរ​ថា កម្មវិធី​ប្រកួត​ប្រជែង​រចនា UXUI របស់​ Woori WON Mobile Banking ត្រូវ​បាន​ប្រកាស​ចាប់ផ្តើម​បើក​ទទួល​ការបង្ហាញ​ស្នាដៃ​រយៈពេល ​២ ​ខែ​ពេញ ដោយ​ចាប់ផ្ដើម​ឡើង​តាំងពី ថ្ងៃទី​ ០១ ខែ​មិថុនា រហូត​ដល់​ថ្ងៃទី ៣១ ខែកក្កដា ឆ្នាំ​ ២០២២​។ កម្មវិធី​នេះ​ទទួល​បាន​ការចាប់​អារម្មណ៍​ជាច្រើន​ពី​សំណាក់​សាធារណជន ជាពិសេស​នៅលើ​ប្រព័ន្ធ​ផ្សព្វផ្សាយ​សង្គម​។ មាន​បេក្ខជន​បាន​ដាក់​ពាក្យ​ចូលរួម​យ៉ាងច្រើន ទូទាំង​ប្រទេស ដែល​បាន​ធ្វើឱ្យ​ដំណើរការ វាយតម្លៃ និង​ដាក់ពិន្ទុ​ទៅលើ​ស្នាដៃ​រចនា​ដែល​បាន​ទទួល​មក​តាម​គោលការណ៍​ការវិនិច្ឆ័យ​ដ៏តឹងរឹង និង​យុត្តិធម៌ ត្រូវ​ចំណាយពេល​យូរ​ជាង​ការរំពឹងទុក​។