.jpg)
FedEx Express ដែលជាក្រុមហ៊ុនបុត្រសម្ព័ន្ធរបស់ FedEx Corp. (NYSE: FDX) និងជាក្រុមហ៊ុនដឹកជញ្ជូនដ៏ធំបំផុតមួយក្នុងពិភពលោកបានប្រកាសថា ខ្លួននឹងបង្កើតវត្តមានពាណិជ្ជកម្មដោយផ្ទាល់នៅកម្ពុជា ដើម្បីឆ្លើយតបទៅនឹងកំណើនតម្រូវការដឹក-ជញ្ជូនលក្ខណៈអន្តរជាតិរបស់ប្រទេសមួយនេះ។
ជាមួយនឹងវត្តមានដោយផ្ទាល់នៅក្នុងប្រទេស រាល់អាជីវកម្មទាំងអស់នៅកម្ពុជា នឹងទទួលបានលទ្ធភាពកាន់តែច្រើនជាមួយនឹងផលប័ត្រកាន់តែទូលំទូលាយនៃដំណោះស្រាយដឹកជញ្ជូនរបស់ FedEx ខណៈដែលអ្នកផ្តល់សេវាក្នុងស្រុក បន្តផ្តល់ហេដ្ឋារចនាសម្ព័ន្ធក្នុងស្រុកដែលមានស្រាប់សម្រាប់ប្រតិបត្តិការដឹកជញ្ជូនតាមផ្លូវគោក។
លោកស្រី Audrey Cheong អនុប្រធានប្រតិបត្តិការប្រចាំតំបន់អាស៊ីអាគ្នេយ៍នៃ FedEx Express មានប្រសាសន៍ថា៖ «យើងមើលឃើញពីសក្តានុពលដ៏អស្ចារ្យសម្រាប់កម្ពុជាក្នុងការបង្កើនពាណិជ្ជកម្មឆ្លងប្រទេសរបស់ខ្លួន និងទាញយកអត្ថប្រយោជន៍ពីឱកាសដែលកើតចេញពីកិច្ចព្រមព្រៀងពាណិជ្ជកម្មសេរីនាពេលថ្មីៗនេះ ដូចជាភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP)ជាដើម ដើម្បីជំរុញការនាំចេញ»។
លោកស្រីបានបន្តថា៖ «ជាមួយនឹងការពង្រឹងលទ្ធភាពទទួលបានបណ្តាញដឹកជញ្ជូន និងដំណោះស្រាយដ៏ល្អរបស់ FedEx អាជីវកម្មនៅកម្ពុជា នឹងមានភាពងាយស្រួលក្នុងការទាញយកទីផ្សារថ្មីៗ ស្របពេលដែលពួកគេអាចពង្រីកអាជីវកម្មទាំងក្នុងតំបន់ និងជុំវិញពិភពលោក»។
អតិថិជនក្នុងស្រុក នឹងអាចចូលប្រើឧបករណ៍ឌីជីថលជាច្រើនប្រភេទរបស់ FedEx ដែលធ្វើឱ្យការដឹកជញ្ជូនកាន់តែងាយស្រួល និងមានប្រសិទ្ធភាពជាងមុនតាមរយៈគេហទំព័រ FedEx https://www.fedex.com/en-kh/home.html។
នេះគឺរួមបញ្ចូលទាំងការបើកគណនីថ្មី តាមដានស្ថានភាពនៃការដឹកជញ្ជូនតាមពេលវេលាជាក់ស្តែង បង្កើតវិក្កយបត្រដឹកជញ្ជូនតាមផ្លូវអាកាស ការកំណត់កាលវិភាគនៃការទទួលទំនិញ និងគ្រប់គ្រងវិក្កយបត្រជាដើម។
លើសពីនេះទៀត FedEx នឹងបង្កើតសមាជិកក្រុមផ្នែកលក់ និងសេវាកម្មបម្រើអតិថិជនដែលមានភាពសកម្មលើមូលដ្ឋានដឹកជញ្ជូនដើម្បីធ្វើអន្តរកម្ម និងផ្តល់នូវជំនាញផ្នែកភស្តុភារកម្ម ក្នុងការជួយអាជីវកម្មក្នុងស្រុកឱ្យបង្កើនពាណិជ្ជកម្មឆ្លងប្រទេសរបស់ពួកគេបានកាន់តែប្រសើរឡើងបន្ថែមទៀត។
ការងើបឡើងវិញនៃសេដ្ឋកិច្ចកម្ពុជា កំពុងមានល្បឿនលឿនគួរឱ្យកត់សម្គាល់ ដោយការនាំចេញកើនឡើង ២០% ធៀបនឹងរយៈពេលដូចគ្នាកាលពីឆ្នាំមុន ដែលគិតជាទឹកប្រាក់កើនដល់ ២៧ ពាន់លានដុល្លារ ក្នុងឆមាសទី១ ឆ្នាំ ២០២២។
ក្រុមហ៊ុន FedEx បាននិងកំពុងជួយសម្រួលពាណិជ្ជកម្មក្នុងប្រទេសកម្ពុជាតាំងពីឆ្នាំ ១៩៩៤ មកម្ល៉េះ ដោយផ្តល់ជូននូវដំណោះស្រាយដឹកជញ្ជូន និងការតភ្ជាប់ជាលក្ខណៈអន្តរជាតិតាមរយៈអ្នកផ្តល់សេវាក្នុងស្រុក TSP Express។
លោក Hardy Diec នាយកគ្រប់គ្រង FedEx Express ប្រចាំតំបន់ឥណ្ឌូចិន បានលើកឡើងថា៖ «ការពង្រីកវត្តមានដោយផ្ទាល់របស់យើងនៅកម្ពុជា អាចឱ្យយើងមានភាពកាន់តែជិតស្និទ្ធជាមួយអតិថិជនរបស់យើង និងផ្តល់នូវការគាំទ្រកាន់តែច្រើនឡើងសម្រាប់តម្រូវការដឹកជញ្ជូនអន្តរជាតិរបស់ពួកគេ»។
លោកបន្ថែមថា៖ «ជាមួយនឹងការយកចិត្តទុកដាក់ខ្ពស់របស់ក្រុមការងារ FedEx ដែលផ្តល់សេវាខាងភស្តុភារកម្ម និងលទ្ធភាពទទួលបានផលប័ត្របន្ថែមនៃសេវាកម្មដឹកជញ្ជូនអន្តរជាតិដែលបានកំណត់ពេលវេលាជាក់លាក់ យើងកំពុងធ្វើឱ្យការដឹកជញ្ជូនកាន់តែងាយស្រួលសម្រាប់អតិថិជនកម្ពុជា ខណៈដែលពួកគេសម្លឹងរកការនាំចេញទៅកាន់ទីផ្សារអន្តរជាតិបន្ថែមទៀត»៕
