លោក លូ ម៉េង នាយកប្រតិបត្តិ និងជាស្ថាបនិកនៃក្រុមហ៊ុន អលមិនគ្រុបកាលពីថ្ងៃពុធ ទី ២៦ ខែវិច្ឆិកា ឆ្នាំ ២០២២ បានដឹកនាំក្រុមការងារថ្នាក់ដឹកនាំ រួមនិងបុគ្គលិកទៅទស្សនកិច្ចនៅសាលាអង្គការ ដើម្បីភាពញញឹមនៃកុមារ (PSE) នៃកម្ពុជាដោយបាននាំយកនូវអំណោយជាគ្រឿងឧបភោគបរិភោគប្រចាំថ្ងៃមួយចំនួនមានដូចជា អង្ករ អំបិលប្រេងឆា ស្ករ ទឹកត្រី និងទឹកស៊ីអ៊ីវ។
ការបរិច្ចាគនេះគឺបានដោយការផ្តួចផ្តើមគំនិតពីលោក លូ ម៉េង រួមនិងមិត្តភក្តិ ក្រុមគ្រួសារផ្ទាល់មានទាំងក្នុង និងក្រៅស្រុក។ បន្ទាប់ពីទទួលរងពីជំងឺកូវីដ ១៩ ការចាប់ផ្តើមឡើងវិញបន្តិចម្តងៗនៃការប្រកបរបរដើម្បីជីវិតប្រចាំថ្ងៃរបស់ប្រជាជននៅកម្ពុជា យើងសង្កេតឃើញថានៅមានអ្នកខ្លះមានសំណាងអាចងើបឡើងវិញបានជាប្រក្រតីតែអ្នកខ្លះក៏ពិបាកងើបឡើងវិញបាន។ ក្នុងនោះផងដែរ អង្គការដើម្បីភាពញញឹមនៃកុមារ (PSE) នៃកម្ពុជាក៏បានទទួលរងនូវផលប៉ះពាល់ពីជំងឺរាតត្បាតនេះផងដែរ ម្ចាស់ជំនួយមួយចំនួនក៏បានផ្តាច់នូវការឧបត្ថម្ភរបស់ពួកគេបន្តិចម្តងៗ ដូច្នេះហើយទើបធ្វើឱ្យមានផលលំបាកដល់ការងារប្រចាំថ្ងៃរបស់អង្គការក្រៅរដ្ឋាភិបាលមួយនេះ ដើម្បីផ្តល់ជាជំនួយផ្សេងៗដល់ប្រជាជនកម្ពុជាដែលក្រីក្រ និងទុរគត។
នេះមិនមែនជាគំនិតផ្តួចផ្តើមលើកដំបូងរបស់លោក លូ ម៉េង ក្នុងការផ្តល់ការឧបត្ថម្ភ និងគាំទ្រសម្រាប់ អង្គការដើម្បីភាពញញឹមនៃកុមារ (PSE) នៃកម្ពុជានោះទេជាក់ស្តែងកាលពីថ្ងៃទី ២១ ខែវិច្ឆិកា ឆ្នាំ ២០១៩ លោក លូ ម៉េង ក៏បានសហការជាមួយ LRC ដែលជាក្លឹបឯកជនដ៏ចំណាស់ជាងគេ និងធំជាងគេនៅទីក្រុងហុងកុងបានរៀបចំចម្អិនមុខម្ហូបខ្មែរ ពិសេសជាច្រើនមុខ ដើម្បីចូលរួមកម្មវិធីអាហារឆ្ងាញ់របស់ទីក្រុងហុងកុង ដោយលក់នូវមុខម្ហូបខ្មែរ ដើម្បីជួយរៃអង្គាសប្រាក់សម្រាប់ជួយដល់សាលាអង្គការដើម្បីភាពញញឹមនៃកុមារ (PSE) នៅកម្ពុជា។
លោក លូ ម៉េង បានមានប្រសាសន៍ថា៖ «យើងខ្ញុំមានសេចក្តីសោមនស្សខ្លាំងណាស់ ដែលយើងទាំងអស់គ្នារួមទាំងគ្រួសាររបស់ខ្ញុំផ្ទាល់បានចេញមកប្រឈមដោយមិនមានការភ័យខ្លាចអំពីជំងឺរាតត្បាតកូវីដ ១៩ នេះ ក្នុងនោះយើងខ្ញុំក៏បានឃើញផងដែរថាមានបុគ្គលិករបស់យើងខ្ញុំមួយចំនួននៅក្នុងវិស័យនេះបានទទួលរងផលប៉ះពាល់ពីអំពីជំងឺរាតត្បាតនេះ។ ក្នុងន័យនេះយើងខ្ញុំគ្រាន់តែចង់តបស្នងដល់សង្គមជាតិ ទោះយើងស្ថិតនៅក្នុងវិស័យឯកជនក៏ដោយ ក៏យើងនៅមានលទ្ធភាពជួយផ្តល់នូវការបរិច្ចាគតាមលទ្ធភាពដែលអាចធ្វើបាន។ យើងខ្ញុំមិនអាចរស់នៅ ដោយមិនខ្វល់ពីមនុស្សនៅខាងក្រោយខ្នងដែលគេជួបការលំបាកនោះឡើយ»៕