អិលអូអិលស៊ី (ខេមបូឌា) ភីអិលស៊ី ដែលជាគ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើឈានមុខគេមួយនៅព្រះរាជាណាចក្រកម្ពុជា បានទទួលនូវការវាយតម្លៃចំណាត់ថ្នាក់ផ្នែកសង្គម ក្នុងកម្រិតពិន្ទុ “BB+” ដែលជាកម្រិតពិន្ទុមួយដ៏ខ្ពស់មួយ បន្ទាប់ពីបញ្ចប់ការវាយតម្លៃក្នុងខែកុម្ភៈ ឆ្នាំ២០២៣ ថ្មីៗនេះពីស្ថាប័ន MicroFinanza ។
ការវាយតម្លៃនេះ គឺធ្វើឡើងដោយផ្អែកលើចំណុចសំខាន់ៗមួយចំនួនដូចជា៖ ការគ្រប់គ្រងសកម្មភាពសង្គម គោលការណ៍ការពារអតិថិជន ទំនួលខុសត្រូវសង្គម វិសាលភាពនៃប្រតិបត្តិការ និងគុណភាពនៃសេវាកម្ម។ ទន្ទឹមនឹងសមិទ្ធផលដ៏គួរឱ្យស្ញប់ស្ញែងមួយនេះ អិលអូអិលស៊ី ក៏ទទួលបានការវាយតម្លៃដ៏ពិសេសមួយទៀតក្នុងកម្រិតពិន្ទុខ្ពស់ “α Medium” ទៅលើការវាយតម្លៃចំណាត់ថ្នាក់ហិរញ្ញវត្ថុ ដែលធ្វើដោយផ្អែកទៅលើចំណុចមួយចំនួនដូចជា៖ បរិបទខាងក្រៅ អភិបាលកិច្ចនិងយុទ្ធសាស្ត្រ ស្ថានភាពហិរញ្ញវត្ថុ គុណភាពផលបត្រឥណទាន និងប្រព័ន្ធគ្រប់គ្រង។ កម្រិតពិន្ទុខ្ពស់ α Medium ពីការវាយតម្លៃចំណាត់ថ្នាក់ផ្នែកហិរញ្ញវត្ថុ គឺជាលំដាប់ពិន្ទុខ្ពស់ដូចគ្នា។
ទាំងអស់នេះ បានបញ្ជាក់ឱ្យឃើញកាន់តែច្បាស់ពីកិច្ចខិតខំប្រឹងប្រែង និង យកចិត្តទុកដាក់ខ្ពស់របស់ អិលអូអិលស៊ី ទៅលើការគ្រប់គ្រងសកម្មភាពសង្គម (SPM) ការផ្តល់សេវាកម្មជូនអតិថិជនប្រកបដោយតម្លាភាព និង វិជ្ជាជីវៈខ្ពស់។ ព្រមជាមួយការបង្កើតផែនការយុទ្ធសាស្រ្តយ៉ាងច្បាស់លាស់ ដោយដាក់បន្ថែមនៅការប្តេជ្ញាចិត្តឆ្ពោះទៅរកនិរន្តរភាពទៅលើការងារ និង សកម្មភាពបរិស្ថាន សង្គម និង អភិបាលកិច្ច។ សម្រាប់ការគ្រប់គ្រងផ្នែកហិរញ្ញវត្ថុ អិលអូអិលស៊ី នៅតែបន្តផ្តល់ជូននូវសេវាកម្មឥណទានដ៏សម្បូរបែបរបស់ខ្លួនក្នុងគោលបំណងពង្រីកទំហំផលបត្រឥណទានប្រកបដោយគុណភាព និងនិរន្តរភាព ក៏ដូចជា ការបង្កើនចំនួនអតិថិជនឱ្យបានកាន់ច្រើន ទៅដល់តំបន់ជនបទនានាទូទាំងប្រទេស ធ្វើការបន្តផ្សព្វផ្សាយ និងលើកទឹកចិត្តឱ្យអតិថិជននៅគ្រប់តំបន់ប្រតិបត្តិការរបស់ខ្លួនឱ្យបានយល់ និងប្រើប្រាស់នូវគណនីសន្សំ ក៏ដូចជា សេវាធនាគារចល័តរបស់អិលអូអិលស៊ី (iPay Cambodia)។
តាមរយៈការវាយតម្លៃឯករាជ្យនេះ គឺជាហេតុផលដ៏ច្បាស់លាស់បន្ថែមទៀតដែលបង្ហាញពីគុណវុឌ្ឍិរបស់ អិលអូអិលស៊ី ក្នុងការបំពេញនូវតម្រូវការប្រើប្រាស់សេវាហិរញ្ញវត្ថុដែលគួរឱ្យទុកចិត្ត និងមានទំនួលខុសត្រូវខ្ពស់ ដើម្បីផ្លាស់ប្តូរគុណភាពជីវិតសម្រាប់អតិថិជនរបស់ខ្លួន៕
