.jpg)
អិលអូអិលស៊ី (ខេមបូឌា) ភីអិលស៊ី ដែលជាគ្រឹះស្ថានមីក្រូហិរញ្ញវត្ថុទទួលប្រាក់បញ្ញើឈានមុខគេមួយនៅព្រះរាជាណាចក្រកម្ពុជា កាលពីថ្ងៃទី១៥ ខែមិថុនា មានកិត្តិយសបានអញ្ជើញចូលរួមកម្មវិធីសិក្ខាសាលាផ្សព្វផ្សាយស្តីពី ប្រាក់រៀល ចំណេះដឹងហិរញ្ញវត្ថុ និងប្រព័ន្ធបាគង ដែលរៀបចំឡើងដោយធនាគារជាតិកម្ពុជា នៅបរិវេណភោជនីយដ្ឋានស្ទឹងមាស ស្រុកស្ទោង ខេត្តកំពង់ធំ។
សិក្ខាសាលានេះមានការអញ្ជើញចូលរួមជាគណៈអធិបតីដ៏ខ្ពង់ខ្ពស់ពី លោកជំទាវ ជា សិរី ទេសាភិបាលរងធនាគារជាតិនៃកម្ពុជា ព្រមទាំងថ្នាក់ដឹកនាំតំណាងក្រសួង-ស្ថាប័ននានា ក៏ដូចជាតំណាងវិស័យធនាគារនិងគ្រឹះស្ថានហិរញ្ញវត្ថុឯកជនជាច្រើនផងដែរ។
សិក្ខាសាលានេះធ្វើឡើងក្នុងគោលបំណងលើកកម្ពស់ប្រាក់រៀលដែលជារូបិយបណ្ណជាតិ ធ្វើការស្វែងយល់បន្ថែមអំពីប្រវត្តិធនាគារជាតិកម្ពុជា និងការវិវត្តន៍នៃប្រាក់រៀលអស់រយៈពេល ៤៣ ឆ្នាំកន្លងមកនេះ ក៏ដូចជាផ្សព្វផ្សាយបន្ថែមអំពីចំណេះដឹងហិរញ្ញវត្ថុ ប្រព័ន្ធបាគង ដល់សារធារណជនឱ្យកាន់តែជ្រាបច្បាស់បន្ថែមទៀត។
លើសពីនេះទៅទៀត ពុកម៉ែបងប្អូនអាចអញ្ជើញចូលរួមទស្សនាការតាំងពិព័រណ៍ប្រាក់រៀលនេះបានដោយសេរី ជាមួយកម្មវិធីពិសេសៗជាច្រើនដូចជា យុទ្ធនាការស្រលាញ់ប្រាក់រៀល ការប្តូរក្រដាសប្រាក់រៀលចាស់ ទក់ ឬរហែក ទទួលបានចំណេះដឹងហិរញ្ញវត្ថុ និងប្រព័ន្ធបាគងបន្ថែម លេងល្បែងល្បងប្រាជ្ញាអេឡិចត្រូនិច ទាក់ទងនិងសេដ្ឋកិច្ច និងប្រាក់រៀល ឆ្លើយសំណួរល្បងប្រាជ្ញាដើម្បីឈ្នះរង្វាន់ និងទស្សនាតន្រ្តីកម្សាន្តដែលចូលរួមដោយ កញ្ញា មាស សុខសោភា លោក ម៉ម ពេជ្ជរិទ្ធ និង Rolin Miss Photo City ផងដែរ។
គួរបញ្ជាក់ផងដែរថា អិលអូអិលស៊ី នឹងធ្វើការដាក់បង្ហាញស្តង់ផលិតផលនៅទីនោះផ្ទាល់ ដើម្បីបង្កភាពងាយស្រួលដល់ពុកម៉ែបងប្អូន ដែលមានចំណាប់អារម្មណ៍ និងចង់សាកសួរព័ត៌មានលម្អិតអំពីផលិតផលណាមួយរបស់អិលអូអិលស៊ី។ សូមអញ្ជើញចូលរួមទាំងអស់គ្នា ឱ្យបានច្រើនកុះករ វត្តមានចូលរួមរបស់លោកអ្នក ជាចំណែកមួយក្នុងការលើកទឹកចិត្ត និងគាំទ្រដល់ប្រាក់រៀល ដែលជារូបិយប័ណ្ណតំណាងប្រទេសកម្ពុជារបស់យើង។
អំពីអិលអូអិលស៊ី (ខេមបូឌា)
បច្ចុប្បន្ន អិលអូអិលស៊ី គឺជាគ្រឹះស្ថានមីក្រូហិរញ្ញវត្ថុទទួលប្រាក់បញ្ញើដែលធំជាងគេលំដាប់ទី៣ នៅក្នុងប្រទេសកម្ពុជា បើគិតទៅលើសមតុល្យប្រាក់បញ្ញើ ផលបត្រឥណទាន និងចំនួនអតិថិជន។ គិតត្រឹមខែមិថុនា ឆ្នាំ២០២៣ អិលអូអិលស៊ី មាន៖
• ទ្រព្យសកម្មសរុប ប្រមាណ ១,៥០ ពាន់លានដុល្លារអាមេរិក
• ផលប័ត្រឥណទាន/ប្រាក់កម្ចីអតិថិជន មានចំនួនជាង ១,២៥ ពាន់លានដុល្លារអាមេរិក
• សមតុល្យប្រាក់បញ្ញើរបស់អតិថិជនមានប្រមាណ ៨០៦ លានដុល្លារអាមេរិក
• បុគ្គលិកសរុបមានចំនួនជាង ៣.៥៨០ នាក់ ដែលកំពុងបម្រើសេវាឥណទានជូនអតិថិជន៕
