ក្រុមហ៊ុនម៉េងលីជេ.គួច អេឌ្យូខេសិន ម.ក នៅថ្ងៃទី២៨ ខែមិថុនា ឆ្នាំ២០២៣ បានចុះបញ្ជីលក់មូលបត្រជាផ្លូវការនៅស្នាក់ការកណ្តាលផ្សារមូលបត្រកម្ពុជា ដោយពិធីដ៏អធិកអធមនេះ ទទួលបានការអញ្ជើញចូលរួមជាអធិបតីដ៏ខ្ពស់ខ្ពស់ពីឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមប្រឹក្សាភិបាលនៃផ្សារមូលបត្រកម្ពុជា, ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃផ្សារមូលបត្រកម្ពុជា, អ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិនៃក្រុមហ៊ុន ម៉េងលីជេ.គួច អេឌ្យូខេសិន ម.ក រួមទាំងថ្នាក់ដឹកនាំនៃស្ថាប័នទាំង២ និងភ្ញៀវកិត្តិយសជាច្រើនរូបទៀត។
ការបន្តភាពជោគជ័យរបស់ ក្រុមហ៊ុន ម៉េងលី ជេ. គួច អេឌ្យូខេសិន ក្នុងរយៈពេលជាច្រើនឆ្នាំកន្លងមកនេះបានរួមចំណែកដល់ការចូល ក្នុងទីផ្សារភាគហ៊ុនកម្ពុជាដោយ IPO នេះ បើកសម្រាប់អ្នកវិនិយោគទូទៅនិងមានបំណងរៃអង្គាសថវិកាចំនួន ១០ លានដុល្លារ ដើម្បីបង្កើតសាលារៀន បន្ថែមទៀត។ ភាគលាភ ៦.០% ក្នុង ១ ឆ្នាំ ត្រូវបានធានា សម្រាប់រយៈពេល ២ ឆ្នាំដំបូង, ភាគហ៊ុន IPO ចំនួន ១៩,៦០៦,៦០០ ភាគហ៊ុន ស្មើនឹង ៥,៨៨%នៃភាគហ៊ុនក្រុមហ៊ុនសរុបហើយតម្លៃ IPO គឺ ២,០៨០ រៀល ឬ ០,៥១ ដុល្លារ។ ក្នុងនោះចំនួនមូលបត្រកម្មសិទ្ធិដែលត្រូវបានធ្វើបរិវិសកម្មមានចំនួនសរុប៩.៩៦៦.១២៧ ដោយមានវិនិយោគិនចូលរួមសរុបចំនួន ២.២៩៧ នាក់។
សូមបញ្ជាក់ថា បច្ចុប្បន្នក្រុមហ៊ុន ម៉េងលី ជេ. គួច អេឌ្យូខេសិន មានសាខាសរុបចំនួន ១៦ ក្នុងរាជធានីខេត្ត-ក្រុង និងបណ្តាខេត្ត ក្នុងនោះ មានសិស្សជាង ២០,០០០ នាក់, បុគ្គលិក ២,២៥២ នាក់ និងមានអតីតសិស្សជាង ៥០,០០០ នាក់ កំពុងសិក្សា និងធ្វើការនៅជុំវិញពិភពលោក។ ក្រុមហ៊ុន ក៏គ្រោងបើកដំណើរការសាខាថ្មីសម្រាប់ឆ្នាំសិក្សា២០២៣-២០២៤ ជាច្រើនសាខាបន្ថែមទៀត ក្នុងនោះ រួមមាន សាខាសែនសុខ, សាខាច្បារអំពៅ,សាខាកំពង់ចាម និងសាខាបាត់ដំបង៕