.jpg)
ធនាគារ ណុងហឹប ដែលមានមូនដ្ឋាននៅសាធារណរដ្ឋកូរ៉េរួមជាមួយគ្រឹះស្ថានមីក្រូហិរញ្ញវត្ថុ ណុងហឹប ហ្វាយនែន (ខេមបូឌា) ម.ក ក្រោមវត្តមានលោក Lee Seok Yongជាប្រធាននាយកប្រតិបត្តិ ធនាគារ ណុងហឹប និងគណៈគ្រប់គ្រងនៃស្ថាប័នទាំង ២ កាលពីថ្ងៃអង្គារ ទី ៨ ខែសីហា ឆ្នាំ ២០២៣ បាននាំយកជំនួយឧបត្ថម្ភជាសម្ភារ និង ថវិកា រួមមាន កញ្ចប់ថវិកា ៥.០០០ ដុល្លារនិងអង្ករ ១ តោន មី ៥០ កេស ត្រីខ ៥០ ដុំ ស្ករស ៥០ គីឡូ អំបិល ៥០ គីឡូ ប្រេងឆា ៣០ ដប ទឹកស៊ីអ៊ីវ ៥០ យួរ ទឹកត្រី ៥០ យួរ ប្រគល់ជូនដល់អង្គការអាហ្វេស៊ីបកម្ពុជា (AFESIP Cambodia)និងផ្តល់ជូនដល់កុមារចំនួន ១៥៥ នាក់ ដែលស្ថិតក្រោមការគ្រប់គ្រងរបស់អង្គការដោយក្នុងម្នាក់ៗ ទទួលបានសៀវភៅ ៥ ក្បាល ប៊ិច ៥ ដើម ខ្មៅដៃ ៥ ដើម ជ័រលុប ១ បន្ទាត់ ១ ឈុត កាតាប ១ និងដបទឹកចំនួន ១ ស្ថិតនៅក្នុងខណ្ឌដង្កោ រាជធានីភ្នំពេញក្នុងគម្រប់ខួប ៥ ឆ្នាំ នៃការចាប់ផ្តើមអាជីវកម្មនៅកម្ពុជា របស់គ្រឹះស្ថានមីក្រូហិរញ្ញវត្ថុ ណុងហឹប ហ្វាយនែន (ខេមបូឌា) ម.ក។
អង្គការអាហ្វេស៊ីបកម្ពុជា ដែលជាអង្គការជួយដល់យុវនារី និងកុមាររងគ្រោះ ឬអ្នករងហានិភ័យខ្ពស់ដែលអាចក្លាយជាជនរងគ្រោះ ដោយអំពើជួញដូរផ្លូវភេទ អំពើហិង្សា ឬការរំលោភបំពានផ្សេងៗតាមរយៈជំនួយផ្នែកច្បាប់ ការប្រឹក្សាផ្នែកសុខភាព និងផ្តល់នូវការអប់រំ និងបណ្តុះជំនាញដល់ជនរងគ្រោះទាំងនោះ ក្នុងការប្រកបរបរចិញ្ចឹមជីវិតដោយខ្លួនឯង និងអាចរស់នៅក្នុងសង្គមប្រកបដោយសុខមាលភាពដូចមនុស្សទូទៅ។
លោកស្រី ម៉ម សុម៉ាលី ប្រធានអង្គការ អាហ្វេស៊ីប កម្ពុជា និងបុគ្គលិកទាំងអស់ បានថ្លែងអំណរគុណយ៉ាងជ្រាលជ្រៅចំពោះធនាគារ ណុងហឹបនិង គ្រឹះស្ថានមីក្រូហិរញ្ញវត្ថុ ណុងហឹប ហ្វាយនែន (ខេមបូឌា) ម.ក រួមជាមួយនឹងថ្នាក់ដឹកនាំទាំងអស់ចំពោះការយកចិត្តទុកដាក់ ក្តីអាណិតស្រឡាញ់តាមរយៈជំនួយឧបត្ថម្ភទាំងនេះ។
គួរបញ្ជាក់ផងដែរថាគ្រឹះស្ថានមីក្រូហិរញ្ញវត្ថុ ណុងហឹប ហ្វាយនែន (ខេមបូឌា) ម.កគឺជាបុត្រសម្ព័ន្ធរបស់ធនាគារ ណុងហឹប ដែលជាធនាគារមួយក្នុងចំណោមធនាគារធំៗទាំង៥ នៅសាធារណរដ្ឋកូរ៉េ។ គ្រឹះស្ថានមីក្រូហិរញ្ញវត្ថុណុងហឹប ហ្វាយនែន កំពុងធ្វើប្រតិបត្តិការអាជីវកម្មនៅរាជធានីភ្នំពេញ និងខេត្តចំនួន ១១ ដូចជា ខេត្តកំពត កែប ព្រះសីហនុ តាកែវ កំពង់ស្ពឺ កណ្តាល កំពង់ធំ សៀមរាប ព្រៃវែង ស្វាយរៀង និងកំពង់ចាម ដោយផ្តល់នូវសេវាកម្មប្រាក់កម្ចី ដូចជា៖ កម្ចីគេហដ្ឋាន កម្ចីខ្នាតតូចបំផុត កម្ចីអាជីវកម្មខ្នាតតូច កម្ចីសហគ្រាសខ្នាតតូច និងមធ្យម និងកម្ចីទឹកស្អាត និងអនាម័យ ផងដែរ៕
