នយោបាយ​ចម្បង​របស់ ក្រុមហ៊ុន ស៊ី​ភី​អ​ល (​ខេ​ម​បូ​ឌា​) ឯ​.​ក ក្នុង​គ្រុប ស៊ី​ភី​អ​ល ក្នុងការ​ចូលមក​បើក​បម្រើ​សេវាកម្ម ផ្ដល់​ភាពងាយស្រួល និង​គ្រប់គ្រង​ហាង 7-Eleven ក្នុង​ព្រះរាជាណាចក្រ​កម្ពុជា​នេះ មិន​ត្រឹមតែ​ផ្ដល់​ជម្រើស​ដល់​ប្រជាជន​ប៉ុណ្ណោះ​ទេ តែ​បាន​ចូលរួម​ជំរុញ​សេដ្ឋកិច្ច​របស់​ប្រទេស និង​រួមចំណែក​ក្នុងការ​អភិវឌ្ឍ​ធនធានមនុស្ស ផ្ដល់​ចំណេះដឹង បទពិសោធន៍ ដើម្បីឱ្យ​អាជីវកម្ម 7-Eleven នៅ​កម្ពុជា​រីក​ធំធាត់​បានយូរ​អង្វែង ហើយ​ជា​អាជីវកម្ម​របស់​ប្រជាជន​កម្ពុជា ដើម្បី​ប្រទេស​កម្ពុជា​យ៉ាងពិត​ប្រាកដ​។​

​ទាំងនេះ​ជាដើម​កំណើត​របស់​កម្ម​វិធី​អាហារូបករណ៍​ដើម្បី​ព្រះរាជាណាចក្រ​កម្ពុជា (CP ALL Scholarship for Cambodia) ដើម្បី​អភិវឌ្ឍន៍​ធន​ធា​មនុស្ស​ក្នុងស្រុក​ឱ្យមាន​ចំណេះដឹង មាន​សមត្ថភាព​ខាង​ផ្នែក​គ្រប់គ្រង​អាជីវកម្ម​សម័យថ្មី ដោយ​កម្មវិធី​នេះ​ត្រូវបាន​ចាប់ផ្ដើម​តាំងពី​ឆ្នាំ​២០១៩ រហូតមកដល់​បច្ចុប្បន្ន​នេះ​គឺមាន​រយៈពេល ៥​ឆ្នាំ​ហើយ ដោយ​យោងតាម​បាវចនា Giving and Sharing​។

​ជា​រៀងរាល់ឆ្នាំ ក្រុមហ៊ុន​បាន​ឧបត្ថម្ភ​ថវិកា​ក្នុងការ​បែងចែក​អាហារូបករណ៍​របស់ Panyapiwat Instistue of Management (PIM) ស្ថាប័ន​អប់រំ​សម្រាប់​សង្គម​ក្នុង CP All Group ទាំង​ថ្នាក់​បរិញ្ញាបត្រ និង​ថ្នាក់អនុបណ្ឌិត វគ្គ​សិក្សា Modern Trade Business Management និង International Business ចំនួន ៧០​អាហារូបករណ៍ ដោយ​រួម​តម្លៃ​សរុប​ប្រចាំឆ្នាំ​គឺជា​ង​១៥០ លាន​បាត​ឱ្យដល់​និស្សិត​កម្ពុជា ពិសេស​គឺ​អាហារូបករណ៍​នេះ​ជា​ជំនួយឥតសំណង ដោយ​គ្មាន​លក្ខខណ្ឌ​ចង​នោះទេ​។​

​ចំណុច​ពិសេស​របស់​ការសិក្សា​នៅ PIM គឺ​ប្រព័ន្ធ Work-Based Education ដើម្បី​សាង​និស្សិត​ដែលមាន​ជំនាញ​និង​វិជ្ជាជីវៈ​ខ្ពស់ ដោយ​ការសិក្សា​ពីបទ​ពិសោធន៍​ពិត តាមរយៈ​ការហ្វឹកហាត់​ការងារ​ក្នុង​ហាង 7-Eleven និង​បណ្តាញ​អង្គភាព​ដ៏​ឈានមុខ​ផ្សេងៗ​របស់ សាកលវិទ្យាល័យ រួមទាំង​គ្រូ​ដែល​សុទ្ធតែ​មានបទពិសោធន៍ ជោគជ័យ​ក្នុង​ពិភព​ជំនួញ ដែល​នឹង​ចែករំលែក​ចំណេះដឹង​ដល់​សិស្ស​ក្នុង​វគ្គ​សិក្សា​តាំងពីដើម​ដល់​ចប់​។​

​សន គឹម​សេង ជា​និស្សិត​ម្នាក់​ដែល​រៀន​ចប់​ពី​កម្មវិធី​អាហារូបករណ៍​ដើម្បី​ព្រះរាជាណាចក្រ​កម្ពុជា​ជំនាន់​ដំបូង (២០១៩) មកពី​ខេត្តកោះកុង បច្ចុប្បន្ន​គាត់​កំពុងធ្វើការ​ជាមួយ​ក្រុមហ៊ុន All Im - Ex and Proservices Co., Ltd. មាន​តំណែង Key Account Officer បាន​ប្រាប់ថា ការរៀន​ផង​និង​ធ្វើការ​ផង​បានធ្វើឱ្យ​គាត់​មានបទពិសោធន៍​ច្រើនណាស់​។

​សន គឹម​សេង​បានឱ្យដឹងថា ៖«​ការ​ក្លាយជា​ផ្នែក​មួយ​របស់ 7-Eleven កម្ពុជា នឹង​ជួយ​អភិវឌ្ឍន៍​ប្រទេស​កម្ពុជា​បាន​។ ចង់ឱ្យ​ប្រទេស​រីកលូតលាស់​ទៅជា​មួយ​យើង ចូលចិត្ត​វប្បធម៌​របស់​អង្គភាព ហើយ​នៅទីនេះ​យើង​ធ្វើការ​ជា​ក្រុម រស់នៅ​បែប​គ្រួសារ សប្បាយចិត្ត​ដែល CP ALL ចូលមក​ប្រទេស​កម្ពុជា ដែល​នឹង​ធ្វើឱ្យ​ប្រជាជនមាន​ជម្រើស​ល្អប្រសើរ​ច្រើនជាង​មុន​»​។​

​ដូចគ្នានេះដែរ ផន សុចិ​ត្រា ក៏​ជា​និស្សិត​ម្នាក​ដែល​បានបញ្ចប់​ការសិក្សា​ពី​កម្មវិធី អាហារូបករណ៍​ដើម្បី​ព្រះរាជាណាចក្រ​កម្ពុជា​ជំនាន់​ដំបូង (២០១៩) ហើយ​ត្រឡប់មក ធ្វើការ​ជា​មន្ត្រីរាជការ ព្រម​ជាមួយនឹង​ការចាប់ផ្ដើម​បើក​អាជីវកម្ម​ភោជនីយដ្ឋាន​តូច​មួយ​របស់ខ្លួន បាន​ថ្លែងថា ៖«​ខ្ញុំ​សូម​អរគុណ CP ALL ដែល​ផ្ដល់ឱកាស ហើយ​ចង់ឱ្យ​យុវជន​កម្ពុជា​បានទទួល​ឱកាស​ដូច្នេះ​រហូត​ទៅ​។ ប្អូនៗ ដែល​ចង់​រៀន​បន្ត​នៅក្នុង​ប្រទេស​ថៃ ចង់ឱ្យ​ដាក់​ពាក្យសុំ​អាហារូបករណ៍​នេះ​។ ព្រោះ​រៀន​នៅ PIM មិន​ថា​ចប់​ទៅធ្វើ​ការ​នៅទីណា ឬ​បើក​អាជីវកម្ម​ផ្ទាល់ខ្លួន​ទេ ក៏​នៅតែ​អាច​យក​បទពិសោធន៍​ដែល​រៀន​ទៅប្រើ​ប្រាស់​បាន​យ៉ាងពិត​ប្រាកដ​»៕

​