Grab ដែល​ជា​កម្មវិធី​ទំនើប​ឈាន​មុខ​គេ​នៅ​អាស៊ី​អាគ្នេយ៍ និង​ធនាគារ ABA ដែល​ជា​ធនាគារ​ពាណិជ្ជ​ធំ​ជាងគេ​នៅ​កម្ពុជា បាន​ប្រកាស​ពី​ភាព​ជា​ដៃគូ​យុទ្ធសាស្ត្រ ក្នុង​ការ​រួម​បញ្ចូល​សេវា​ទូទាត់​ឌីជីថល​របស់​ពួកគេ​តាម​រយៈការ​ទូទាត់​ប្រាក់ ABA PayWay។

តាម​រយៈកិច្ច​សហការ​នេះ អ្នក​ប្រើប្រាស់ Grab នឹង​មាន​លទ្ធភាព​ប្រើប្រាស់​វិធី​ទូទាត់​ប្រាក់​ដ៏​ពេញ​និយម​បំផុត​នៅ​ក្នុង​ប្រទេស​កម្ពុជា PayWay ដែល​អនុញ្ញាត​ឱ្យ​ប្រតិបត្តិការ​ដោយ​មិន​ប្រើប្រាស់​សាច់ប្រាក់​សុទ្ធ កាន់​តែ​មាន​ភាព​ងាយស្រួល។

ភាព​ជា​ដៃគូ​នេះ​បាន​ណែនាំ​មុខងារ Account-on-File (AoF) ដែល​អនុញ្ញាត​ឱ្យ​អ្នក​ប្រើប្រាស់ Grab ភ្ជាប់​គណនី ABA របស់​ពួកគេ​ដោយ​សុវត្ថិភាព​នៅ​ក្នុង​កម្មវិធី Grab។ មុខងារ​នេះ​អនុញ្ញាត​ឱ្យ​មាន​ការ​ទូទាត់​ដោយ​មិន​ប្រើប្រាស់​សាច់ប្រាក់​សុទ្ធ​ដោយ​ស្វ័យ​ប្រវត្តិ និង​មាន​សុវត្ថិភាព ម៉្យាងទៀត​អ្នកប្រើប្រាស់​អាច​ទូទាត់​ប្រាក់​យ៉ាង​រលូន សម្រាប់​ការ​ប្រើប្រាស់​សេវាកម្ម​ធ្វើ​ដំណើរ សេវាកម្ម​បញ្ញើ​រហ័ស និង​សេវាកម្ម​ដឹក​ជញ្ជូន​អាហារ​ជាដើម កិច្ចការ​នេះ គឺ​ជួយ​ធ្វើ​ឱ្យ​ដំណើរ​ការ​ទូទាត់​ប្រាក់ កាន់​តែ​ងាយស្រួល​សម្រាប់​អតិថិជន​រាប់​លាន​នាក់​នៅ​ទូទាំង​ប្រទេស​កម្ពុជា។ 

បន្ថែម​ពី​នេះទៀ​ត Grab បាន​ជ្រើសរើស​យក ABA PayWay Plus ដែល​ដំណើរ​ការ​ដោយ CyberSource របស់​ក្រុមហ៊ុន Visa ធ្វើជា​មធ្យោបាយ​ទូទាត់​ប្រាក់​ក្នុង​ស្រុក​ថ្មី​របស់​ខ្លួន សម្រាប់​ដំណើរការ​រាល់​ការ​ទូទាត់ តាម​ប័ណ្ណ​ឥណទាន​ទាំងអស់​នៅ​ក្នុង​ប្រទេស​កម្ពុជា។ ការ​ផ្លាស់ប្តូរ​ទៅ​ប្រើប្រាស់​មធ្យោបាយ​ទូទាត់​ប្រាក់​ក្នុង​ស្រុក​នេះ គឺ​ដើម្បី​ធ្វើឱ្យ​កាន់​តែ​ប្រសើរ​ឡើង​នូវ​ការ​គ្រប់គ្រង​ប្រតិបត្តិការ និង​បង្កើន​ភាព​ជឿជាក់​របស់ Grab ខណៈ​ដាក់​បញ្ចូល​នូវ​វិធីសាស្រ្ត​ទូទាត់​ប្រាក់​ផ្សេងៗ រួមមាន ប័ណ្ណ​ឥណទាន Visa, Mastercard និង UPI ។  

លោក កង សុវណ្ណារ៉ូត នាយក​គ្រប់គ្រង​ក្រុមហ៊ុន Grab ប្រចាំ​ប្រទេស​កម្ពុជា​បាន​មាន​ប្រសាសន៍​ថា៖​«តាម​រយៈ​ការ​ចាប់​ដៃគូ​ជាមួយ​ធនាគារ ABA យើង​កំពុង​បោះ​ជំហាន​ដ៏​សំខាន់​មួយ​ឆ្ពោះ​ទៅ​រក​ការ​ផ្តល់​ជូន​អ្នក​ប្រើប្រាស់​របស់​យើង នូវ​បទពិសោធន៍​ទូទាត់​ប្រាក់​ឌីជីថល​ប្រកប​ដោយ​សុវត្ថិភាព និង​រលូន។ ភាព​ជា​ដៃគូ​នេះ​គឺជា​សក្ខីភាព​មួយ ចំពោះ​ការ​ប្តេជ្ញា​ចិត្ត​របស់​យើង​ក្នុង​ការ​នាំ​មក​នូវ​គុណ​តម្លៃ​កាន់​តែ​ច្រើន ដល់​អ្នក​ប្រើប្រាស់​របស់​យើង»។ 

ធនាគារ ABA ដែល​ស្គាល់​ជា​ធនាគារ​នាំ​មុខ​ក្នុង​វិស័យ​ធនាគារ​ឌីជីថល បាន​បន្ត​នវានុវត្តន៍​ដើម្បី​បំពេញ​តម្រូវការ​អតិថិជន​របស់​ខ្លួន។ 

លោក Zokhir Rasulov នាយក​សេវា​ធនាគារ​ឌីជីថល​មាន​ប្រសាសន៍​ថា ៖​«យើង​ខ្ញុំ​មាន​សេចក្តី​រីករាយ​ដែល​បាន​សហការ​ជាមួយ Grab ដើម្បី​នាំ​យក​ដំណោះ​ស្រាយ​ការ​ទូទាត់​បែប​ឌីជីថល​ដ៏​រលូន សុវត្ថិភាព និង​ងាយស្រួល​ដល់​ប្រជាពលរដ្ឋខ្មែរ។ ភាព​ជា​ដៃគូ​នេះ​គូស​បញ្ជាក់​ពី​ការ​ខិតខំ​ប្រឹងប្រែង​របស់​យើង​ខ្ញុំ​ក្នុង​ការ​ពង្រឹង​ការ​ទូទាត់​ដោយ​មិន​ប្រើប្រាស់​សាច់​ប្រាក់​បង្កើន​ភាព​ងាយស្រួល​ដល់​អតិថិជន និង​លើក​កម្ពស់​សេដ្ឋកិច្ច​ឌីជីថល​ក្នុង​ប្រទេស»។

លោក​ក៏​បាន​បន្ថែម​ថា៖ «តាម​ការ​ដាក់​ដំណើរការ​មុខងារ Account-on-File របស់ ABA​ PayWay ​ទៅ​ក្នុង អេប Grab យើង​ខ្ញុំ​កំពុង​តែ​បង្កើន​ប្រតិបត្តិការ​ប្រចាំថ្ងៃ​ឱ្យ​កាន់​តែ​រហ័ស និង​ងាយស្រួល​ដល់​អ្នក​ប្រើប្រាស់​រាប់​លាន​នាក់។ យើងខ្ញុំ​នឹង​បន្ត​បង្កើត​នវានុវត្តន៍​ជាមួយ Grab ក្នុង​ថ្ងៃ​អនាគត​ដើម្បី​បំពេញ​តម្រូវការ​របស់​អតិថិជន និង​គាំទ្រ​ដល់​ដំណើរការ​ផ្លាស់ប្តូរ​ផ្នែក​ឌីជីថល​របស់​ប្រទេស​កម្ពុជា»។

ABA PayWay អនុញ្ញាត​ឱ្យ​អាជីវកម្ម​ក្នុង​ប្រទេស​កម្ពុជា​ទទួល​ការ​ទូទាត់​តាម​អនឡាញ ឬ​នៅ​ក្នុង​ហាង​ផ្ទាល់​ពី​អេប​ធនាគារ​ផ្សេងៗ និង​កាត​ក្នុង​ស្រុក ឬ​កាត​អន្តរជាតិ។ អតិថិជន​អាច​ទូទាត់​យ៉ាង​ងាយ​ស្រួល​ជា​ប្រាក់រៀល និង​ប្រាក់​ដុល្លារ​តាម​រយៈ ABAPAY, KHQR, Visa, Mastercard, UPI, JCB, Alipay និង WeChat។​ ជាមួយ ABA​ PayWay​ ក្រុមហ៊ុន​អាច​តាមដាន​ប្រតិបត្តិការ​តាម​ពេល​វេលា​ជាក់ស្តែង និង​ទទួល​អត្ថប្រយោជន៍​ពី​ការ​រួម​បញ្ចូល​ដែល​អនុលោម តាម​ស្តង់ដា PCI DSS យ៉ាង​សុវត្ថិភាព។ សម្រាប់​ព័ត៌មាន​បន្ថែម​សូម​ទៅ​កាន់​គេហទំព័រ www.payway.com.kh។ 

អំពី Grab:

Grab គឺជា​កម្មវិធី​ស្មាតហ្វូន​ឈាន​មុខគេ​នៅ​អាស៊ីអាគ្នេយ៍ ដែល​ដំណើរការ​ក្នុង​វិស័យ​ការ​ដឹក​ជញ្ជូន ការ​ធ្វើដំណើរ និង​សេវាកម្ម​ហិរញ្ញវត្ថុ​ឌីជីថល។ ដោយ​បម្រើ​ការ​ជាង ៧០០ ទីក្រុង នៅ​ប្រាំបី​ប្រទេស​ក្នុង​អាស៊ីអាគ្នេយ៍​ដូចជា កម្ពុជា ឥណ្ឌូណេស៊ី ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និង​វៀតណាម។ Grab អនុញ្ញាត​ឱ្យ​មនុស្ស​រាប់​លាន​នាក់​អាច​បញ្ជា​ទិញ​អាហារ ឬ​គ្រឿង​ទេស ផ្ញើ​កញ្ចប់​ឥវ៉ាន់ កក់​រថយន្ត ឬ​តាក់ស៊ី ទូទាត់​ការ​ទិញ​ទំនិញ​តាម​អ៊ីនធឺណិត ឬ​ចូល​ប្រើ​សេវាកម្ម​ដូចជា​ ការ​ខ្ចីប្រាក់ និង​ធានា​រ៉ាប់រង​ជា​រៀងរាល់​ថ្ងៃ​តាម​រយៈ​កម្មវិធី​តែ​មួយ។ Grab ត្រូវ​បាន​បង្កើត​ឡើង​ក្នុង​ឆ្នាំ២០១២ ដោយ​មាន​បេសកកម្ម ដើម្បី​ជំរុញ​អាស៊ីអាគ្នេយ៍​ឆ្ពោះ​ទៅ​មុខ​ដោយ​បង្កើន​លទ្ធភាព​សេដ្ឋកិច្ច​សម្រាប់​មនុស្ស​គ្រប់គ្នា ហើយ​ប្រឹងប្រែង​បម្រើ​គោលការណ៍​ទាំង​បី: ផ្តល់​នូវ​ស្ថិរភាព​ហិរញ្ញវត្ថុ ព្រម​ទាំង​បង្កើត​ឥទ្ធិពល​វិជ្ជមាន​ក្នុង​សង្គម និង​បរិស្ថាន​នៅ​អាស៊ី​អាគ្នេយ៍។ សម្រាប់​ព័ត៌មាន​បន្ថែម​អំពី​ផែនការ ពង្រីក​អាជីវកម្ម​របស់ Grab និង​ការ​ប្តេជ្ញា​របស់​ក្រុមហ៊ុន​ចំពោះ​ប្រទេស​កម្ពុជា សូម​ចូល​ទៅ​កាន់ www.grab.com/kh ឬ www.facebook.com/GrabKH ។

អំពីធនាគារ ABA:

ABA​គឺជា​ធនាគារ​ពាណិជ្ជធំ​ជាងគេ​នៅ​កម្ពុជា គិត​លើ​ទ្រព្យ​សកម្ម​សរុប​ប្រាក់​បញ្ញើ និង​ប្រាក់​កម្ចី យោង​តាម​របាយការណ៍​ត្រួត​ពិនិត្យ​របស់​ធនាគារជាតិ​នៃ​កម្ពុជាឆ្នាំ ២០២១-២០២៣។​ធនាគារ ABA មាន ៩៩​សាខា, ទីតាំង​ស្វ័យសេវា ABA 24/7 ចំនួន ៤៦កន្លែង, ម៉ាស៊ីន​ស្វ័យ​សេវា​ជាង ១៧០០ នៅទូទាំង​ប្រទេស, សេវា​ធនាគារ​អនឡាញ និង​កម្មវិធី​ធនាគារ​តាម​ទូរស័ព្ទ​ដ៏​ទំនើប បាន​ធ្វើឱ្យ​ធនាគារ​ ABA មាន​អតិថិជន​ជាង ៤​លាន​នាក់ ដែល​កំពុង​ប្រើប្រាស់​សេវា​ហិរញ្ញ​វត្ថុ​ដ៏​ទំនើប​សម្បូរ​បែបនេះ។  ធនាគារ ABA គឺជា​បុត្រ​សម្ពន្ធ​របស់​ធនាគារជាតិ​កាណាដា ដែល​ជា​គ្រឹះស្ថាន​ហិរញ្ញ​វត្ថុមួយ​មាន​ទ្រព្យ​សកម្មជាង ៣២១​ប៊ីលាន​ដុល្លារ​អាមេរិក គិត​ត្រឹម​ថ្ងៃ​ទី​៣០ ខែ​មេសា ឆ្នាំ២០២៤ និង​មាន​បណ្តាញ​ធនាគារ​ឆ្លើយឆ្លង​ដ៏​ធំ​នៅ​ទូទាំង​ពិភពលោក។