ក្រុមហ៊ុន PIC TIRE Co., Ltd បានសម្ពោធ​ផលិតផល​សំបកកង់​រថយន្តម៉ាក Sailun Tire ដ៏​អស្ទារ្យ​នៅ ដឹព្រីមៀរ សែន សុខ ក្នុងរាជធានីភ្នំពេញ កាលពីថ្ងៃទី៣ ខែកុម្ភៈ ឆ្នាំ២០២៤  ដោយ​មានវត្ត​មានចូលរួម​ពី​ថ្នាក់​ដឹកនាំក្រុមហ៊ុន បុគ្គលិក ភ្ញៀវជាតិ អន្តរជាតិ ដៃគូអាជីវកម្ម អ្នកសារព័ត៌មាន និងភ្ញៀវកិត្តិយ​ស​ជា​ច្រើន​រូប​ទៀត។ 

រោងចក្រផលិត​កង់រថយន្ត​ម៉ាក Sailun Tire មាន​អាសយដ្ឋាន​នៅតំបន់​សេដ្ឋកិច្ច​ពិសេស ឈីលូ ជាន ពុចាយ ផ្លូវជាតិ​លេខ១, ស្វាយតឿ, ភូមិតាណរ សង្កាត់​ស្វាយតឿ ក្រុង​ស្វាយរៀង ដែលផលិត​សំបក​កង់​រថយន្ត​គុណភាពខ្ពស់​ជាច្រើនប្រភេទ សម្រាប់ទីផ្សារ​ក្នុងស្រុក និងទីផ្សារអន្តរជាតិ។

លោក គឹន ឧត្តមមុនីស៊ីណាត ប្រធានគ្រប់ទូទៅ​ក្រុមហ៊ុន PIC TIRE Co., Ltd បានមាន​ប្រសាសន៍ថា៖ «​គ្រប់​ផ្នែក​ទាំងអស់នៅ​ក្នុងរោងចក្រនេះ មិនថាផ្នែកវិស្វករ​ ផ្នែកលាយ​ជ័រកៅស៊ូ ផ្នែកផលិត ផ្នែកនាំចេញ ផ្នែក​ត្រួត​ពិនិត្យគុណភាពសុទ្ឋ​សឹង តែ​ជាជនជាតិខ្មែរ ហើយ​រោងចក្រ មានសមត្ថភាព​ផលិត​សំបកកង់​ក្នុង​ដំណាក់​កាល​ទី១ដល់ទៅ ៣៥,០០០ គ្រាប់​ក្នុងមួយថ្ងៃ និងនាំចេញ​រហូតដល់ ២៥,០០០ គ្រាប់ក្នុងមួយថ្ងៃ»។

«រោងចក្រទី២ កំពុងតែចាប់ផ្តើម​ដំណើរការផលិត និងរោងចក្រទី៣ កំពុងតែសាងសង់​គ្រោងបញ្ចប់​និង​សម្ពោធនៅថ្ងៃទី១៨ ខែ វិច្ឆិការ ឆ្នាំ២០២៤​ ខាងមុខនេះ។ បើយើងសរុប​ទិន្នន័យនៃការផលិត​ទាំង ៣​រោងចក្រ គឺស្មើនឹង៣៣ លានគ្រាប់​ឯណោះ ក្នុងមួយឆ្នាំ»។ លោក ឧត្តមមុនីស៊ីណាត បន្ថែមក្រុមហ៊ុន​ប្រើប្រាស់​បច្ចេកវិទ្យាទំនើប ប្រកបដោយភាពច្នៃប្រឌិត និងការត្រួត​ពិនិត្យ​គុណភាព​ដ៏ហ្មត់ចត់ ដើម្បី​ផលិត​សំបកកង់​រថយន្តម៉ាក Sailun Tire បំពេញ​តម្រូវការ​អតិថិជន​ដែលស្វែងរក​ផលិតផល​សំបក​កង់រថយន្ត​គុណភាពខ្ពស់ និងតម្លៃសមរម្យ។

ចាប់ផ្តើម​ប្រតិបត្តិការ​ក្នុងប្រទេសកម្ពុជា ​ក្នុងខែវិច្ឆិកា ឆ្នាំ២០២១, សំបកកង់​រថយន្ត Sailun Tire ត្រូវបាន​នាំចេញ​ជាបន្តបន្ទាប់​ជាមធ្យម​ប្រមាណ ២៥,០០០ គ្រាប់ក្នុង​មួយថ្ងៃ ទៅកាន់​ប្រទេស​ប្រមាណ ៣២  រួម​ទាំង​សហរដ្ឋអាមេរិក កាណាដា អូស្ត្រាលី ហ្វីលីពីន កូរ៉េខាងត្បូង ម៉ាឡេស៊ី និងនូវែលសេឡង់។

SAILUN ត្រូវបាន​ផលិតឡើង​ដំបូង​នៅថ្ងៃទី១៨ ខែវិច្ឆិកា ឆ្នាំ២០០២។ បច្ចុប្បន្ន SAILUN ត្រូវបានចែកចាយ​ទូទាំងសកលលោក​រហូតដល់​ជាង ១៨០​ ប្រទេស ក្នុងនោះរួម​មានរោងចក្រ​ផលិតសំបកកង់​ឡានចំនួន ៩ រោងចក្រ ក្នុងនោះនៅ​ប្រទេសចិន​មាន ៥ រោងចក្រ នៅប្រទេស​វៀតណាម​មាន ២រោងចក្រ និង​នៅ​កម្ពុជា មាន១ រោងចក្រ និង៣ ដំណាក់កាល។ 

ក្រៅពីរោងចក្រ, SAILUN ក៏មាន​មជ្ឈមណ្ឌលស្រាវជ្រាវ និងអភិវឌ្ឍ ចំនួន ៤ ដែលមាន​នៅប្រទេស​ចិន សហគមន៍​អឺរ៉ុប​ ប្រទេស​កាណាដា និងប្រទេស​វៀតណាម​ផងដែរ។ មិនត្រឹម​តែប៉ុណ្ណោះ SAILUN ក៏មានមជ្ឈមណ្ឌល​លក់​ចំនួន ១០ កន្លែងទៀត​នៅទូទាំង​ពិភពលោក។ 

ត្រឹមរយៈពេល ២២ ឆ្នាំ SAILUN បានវិវត្តខ្លួន​យ៉ាងឆាប់រហ័ស​អាចដណ្តើម​យកចំណាត់​ថ្នាក់លេខ១​នៅ​ប្រទេសចិន និងជាប់ចំណាត់​ថ្នាក់លេខ១១ នៅទីផ្សារ​ទូទាំង​ពិភពលោក​គិតត្រឹមចុង​ឆ្នាំ២០២៣។ 

រោងចក្រ​មានទំហំ​ផ្ទៃដីសរុប ១២០ ហិចតា បង្កើតការងារ​ជូនប្រជាពលរដ្ឋ​ប្រមាណជាង​ ៣៥០០ ​កន្លែង នាំមកនូវចំណេះ ជំនាញ បច្ចេកទេស។ មិនត្រឹម​តែប៉ុណ្ណោះ រោងចក្រ​មួយនេះ​ បាន​សហការគ្នាចុះ MOU ជាមួយវិទ្យាស្ថាន​បច្ចេកវិទ្យា​កម្ពុជា (ITC) ដើម្បី​បង្កើតឱ្យ​មានដេប៉ាតេម៉ង់​ជំនាញថ្នាក់​វិស្វករ​ផ្នែកជ័រកៅស៊ូជាតិ ដែលជាជំនាញមួយ​មិនធ្លាប់មាន​នៅកម្ពុជា​កន្លងមក​នោះទេ។

លោក ឧត្តមមុនីស៊ីណាត ថ្លែងបន្ថែមថា៖«ក្នុងមួយថ្ងៃ​រោងចក្រ​ ប្រើប្រាស់​ជ័រកៅស៊ូ​អស់ជាង ៥០០ តោន សម្រាប់​តែដំណាក់​កាលទី១ និងទី២ ប៉ុណ្ណោះ​។ ដូច្នេះ ប្រសិនបើ​ដំណាក់កាល​ទី៣ ត្រូវបាន​ផលិត​ទាំងស្រុងនោះ ក្នុងមួយឆ្នាំៗ ការប្រើប្រាស់​ជ័រកៅស៊ូខ្មែរ​នឹងមាន​តម្រូវការច្រើន។ រោងចក្រ​មួយនេះ នឹង​ប្រើប្រាស់​ជ័រកៅស៊ូ​សរុប រហូតដល់​ទៅ ៣០% នៃទិន្ន​ផល​ដំណាំ​កៅស៊ូ​សរុបនៅ​ក្នុងប្រទេស​កម្ពុជា ទាំងមូល។ ប្រសិនបើ​មាន​រោងចក្រ​ប្រភេទនេះ តែ៣​រោងចក្រ វានឹងអាចប្រើប្រាស់​ជ័រកៅស៊ូ​រហូតដល់ ៩០% នៃ​ទិន្និផល​ដំណាំ​កៅស៊ូ​សរុប​ទៅ​ហើយ»។ 

លោក ឧត្តមមុនីស៊ីណាត អំពាវនាវ​ឱ្យអតិថិជន​ចូលរួម​ប្រើប្រាស់​ផលិតផល​ក្នុងស្រុក ដើម្បី​ជួយលើក​កម្ពស់​ការ​ដាំដំណាំ​កៅស៊ូ និងផ្តល់​ស្នាមញញឹម​ដល់ប្រជាកសិករ​ដំណាំ​កៅស៊ូខ្មែរ និងចូលរួម​លើកស្ទួយ​សេដ្ឋកិច្ច​ជាតិ​ ដោយលោកបានញ្ជាក់​ថា ៖«កត្តាទាំងនេះ​ហើយ ដែល​ក្រុមហ៊ុន PIC TIRE បានប្រើ​ពាក្យស្លោក​មួយជាផ្លូវការ​ថា «កសិផល​ជាតិ ផលិតផល​ជាតិ ជួយ​ទ្រទ្រង់​សេដ្ឋកិច្ច​ជាតិ»៕