ភ្នំពេញ ថ្ងៃទី១ ខែមិថុនា ឆ្នាំ២០២៥៖ ព្រឹត្តិការណ៍រត់សប្បុរសធម៌ «រត់ដោយបេះដូង» ត្រូវបានរៀបចំឡើងជាមួយនឹងស្មារតីនៃក្ដីមេត្តានិងការគិតគូរដល់កុមារគ្រប់រូប។ កម្មវិធីឆ្នាំ២០២៥នេះ ត្រូវបានឧបត្ថម្ភផ្ដាច់មុខដោយ ក្រុមហ៊ុនធានារ៉ាប់រងអាយុជីវិត ដាយ អ៉ិឈិ ឡាយហ្វ៍ ហើយត្រូវបានបញ្ចប់ទៅយ៉ាងរលូននៅពហុកីឡដ្ឋានជាតិអូឡាំពិក។
ការរត់សប្បុរសធម៌នេះមានអត្ថន័យយ៉ាងជ្រាលជ្រៅ ហើយបានផ្ដល់ឱកាសឱ្យសប្បុរសជនរាប់រយនាក់មកជួបជុំគ្នា បង្ហាញពីសាមគ្គីភាពដ៏អស្ចារ្យ ដើម្បីគាំទ្រដល់កុមារអូទីស្សឹមនៅសាលារៀនទន្សាយ។
ព្រឹត្តិការណ៍នេះពោរពេញទៅការសារទរ ភាពសប្បាយរីករាយ និងអនុស្សាវរីយ៍ដែលមិនអាចបំភ្លេចបាន តួយ៉ាងមាននូវការបង្ហាញវត្តមានយ៉ាងពិសេសរបស់សិស្សមកពីសាលារៀនទន្សាយផ្ទាល់តែម្តង។ សិស្សទាំងអស់ត្រូវបានទទួលស្វាគមន៍យ៉ាងកក់ក្តៅ ពីសំណាក់អ្នកចូលរួម។
ព្រឹត្តិការណ៍នេះមានកិត្តិយសដោយមានវត្តមានដ៏ខ្ពង់ខ្ពស់របស់ ឯកឧត្តម សំហេង បុរស សមាជិកគណ:អចិន្ត្រៃយ៍ សហភាពសហព័ន្ធយុវជនកម្ពុជា (ស.ស.យ.ក.), លោក Mah Kin Yoong អគ្គនាយកប្រតិបត្តិនៃ ដាយ អ៉ិឈិ ឡាយហ្វ៍ ខេមបូឌា, លោក អ៊ួន បឋម (សាយ) សា្ថបនិក «រត់ជាមួយសាយ» ព្រមទាំង អ្នកស្រី សរ សុធារម្យ នាយិកាប្រតិបត្តិនៃអង្គការសាលារៀនទន្សាយ។
កម្មវិធី «រត់ដោយបេះដូង» ជាព្រឹត្តិការណ៍មួយដែលបង្ហាញនូវការគាំទ្រចំពោះកុមារអូទីស្សឹម ផ្សព្វផ្សាយការយល់ដឹងឱ្យកាន់តែទូលំទូលាយ និងបង្ហាញស្មារតីរួបរួមមួយនៅក្នុងសហគមន៍។ គោលបំណងចម្បងនៃកម្មវិធីនេះ គឺដើម្បីរៃអង្គាសថវិកាសប្បុរសធម៌ និងផ្សព្វផ្សាយអំពីកិច្ចការងារបស់សាលាទន្សាយ។
សាលារៀនទន្សាយជាស្ថាប័នឈានមុខគេមួយនៅកម្ពុជា បង្កើតឡើងតាំងពីឆ្នាំ១៩៩៧មកម្ល៉េះ ក្នុងគោលបំណងគាំទ្រដល់កុមារដែលមានពិការភាពបញ្ញា។ ដោយមានការគាំទ្រទាំងស្រុងពីក្រុមហ៊ុន ដាយ អ៉ិឈិ ឡាយហ្វ៍ ថវិកាទាំងអស់របស់សប្បុរសជនពីកម្មវិធី «រត់ដោយបេះដូង» នឹងត្រូវបានបរិច្ចាគទៅកាន់សាលាទន្សាយ។
ក្រុមការងាររៀបចំកម្មវិធីកាន់តែមានមោទនភាព ដោយមានការចុះឈ្មោះចូលរួមរត់ពីចម្ងាយពីសំណាក់សប្បុរសជននៅក្រៅប្រទេស សហគមន៍ជប៉ុននៅកម្ពុជា និងសាធារណជនមកពីគ្រប់មជ្ឈដ្ឋាន ដែលសុទ្ធសឹងតែចូលរួមគាំទ្រដល់បេសកកម្មរបស់សាលាទន្សាយ។
លោក Mah Kin Yoong អគ្គនាយកប្រតិបត្តិនៃ ដាយ អ៉ិឈិ ឡាយហ្វ៍ ខេមបូឌា បានមានប្រសាសន៍ថា៖ «ខ្ញុំពិតជារំភើបដែលបានឃើញទិដ្ឋភាពមួយនេះ ដែលមានក្រុមការងារ ដៃគូសហការ និងសាធារណជនជាច្រើនបានមករត់ជាមួយនឹងកុមារអូទីស្សឹម។ ស្នាមញញឹមរបស់កុមារទាំងអស់រំឮកឱ្យយើងយល់កាន់តែច្បាស់អំពីសារសំខាន់នៃការគាំទ្រចំពោះកុមារអូទីស្សឹមនៅកម្ពុជា។ វាហាក់បីដូចជាក្តីសង្ឃឹមមួយសម្រាប់ពួកគាត់។
ព្រឹត្តិការណ៍នេះក៏បានស្ដែងឱ្យឃើញនូវការប្ដេជ្ញាចិត្តដ៏ជ្រាលជ្រៅរបស់យើងក្នុងការជំរុញសហគមន៍មួយដែលគិតគូរ និងផ្តល់តម្លៃដល់កុមារគ្រប់រូប ដែលស្របនឹងគុណតម្លៃស្នូលមួយរបស់យើងគឺការយកចិត្តទុកដាក់លើសហគមន៍ដែលយើងធ្វើអាជីវកម្ម។ យើងមានមោទកភាពក្នុងការគាំទ្រសាលារៀនទន្សាយ និងកម្មវិធី «រត់ជាមួយសាយ» ដើម្បីបង្កើតអនាគតដ៏ភ្លឺស្វាងសម្រាប់កុមារអូទីស្សឹមនៅកម្ពុជា។
លោក អ៊ួន បឋម (សាយ) ស្ថាបនិកកម្មវិធី «រត់ជាមួយសាយ» បានបន្ថែមថា៖ «ព្រឹត្តិការណ៍នេះបានបញ្ចប់ទៅដោយរលូននិងរីករាយលើសពីការរំពឹងទុក។ ខ្ញុំពិតជារំជួលចិត្តដែលបានឃើញកុមារអូទីស្សឹមរត់អមជាមួយនឹងអ្នកគាំទ្ររបស់ពួកគេរាប់រយអ្នក ហើយក៏សូមថ្លែងអំណរគុណដល់ក្រុមហ៊ុន ដាយ អ៉ិឈិ ឡាយហ្វ៍ សហភាពសហព័ន្ធយុវជនកម្ពុជា (ស.ស.យ.ក.) និងដៃគូរបស់យើងទាំងអស់ ដែលបានគាំទ្របេសកកម្មមួយនេះ និងញុំាងឱ្យកម្មវិធីនេះអាចបញ្ចប់ទៅដោយជោគជ័យ។ យើងរួមគ្នាបង្កើតអនាគតមួយដែលធានាថាកុមារគ្រប់រូបទទួលបានការគាំទ្រ និងផ្តល់តម្លៃកាន់តែប្រសើរ។
ព្រឹត្តិការណ៍ «រត់ដោយបេះដូង» មិនត្រឹមតែជាកម្មវិធីរត់ប៉ុណ្ណោះទេ ពោលគឺកម្មវិធីនេះបានបន្សល់ទុកនូវអនុស្សាវរីយ៍មួយដែលពោរពេញដោយក្តីស្រឡាញ់ សាមគ្គីភាព និងការប្ដេជ្ញាចិត្តរួមគ្នា ដើម្បីលើកស្ទួយកុមារអូទីស្សឹមនៅទូទាំងប្រទេសកម្ពុជានិងគ្រប់ទីកន្លែង។
