កាលពី​ពេល​ថ្មីៗ​នេះ អង្គការ CamConscious Tourism បាន​ដាក់​តាំង​បង្ហាញ​រូបភាព​របស់​អ្នកចូលរួម​កម្មវិធី​ប្រកួតប្រជែង​ថតរូប Travel Green, Travel Local និង​ការប្រកួតប្រជែង​ការសរសេរ​ប្រកប​ដោយ​ភាព​ច្នៃប្រឌិត ឆ្នាំ​ ២០១៩​។

ព្រឹត្តិការណ៍​នេះ​ត្រូវ​បាន​ធ្វើឡើង​ដោយ​ផ្សារភ្ជាប់​ជាមួយ​នឹង​ការងារ​របស់​អង្គការ CamConscious ដើម្បី​គាំទ្រ​ដល់​វិស័យ​ទេសចរណ៍​ប្រកប​ដោយ​ចីរភាព​នៅ​កម្ពុជា​។ រូបភាព​ទាំងនោះ​ត្រូវ​ដាក់​តាំង​បង្ហាញ​នៅ​សណ្ឋាគារ Plantation Urban Resort និង Spa ក្នុង​រាជធានី​ភ្នំពេញ​រហូត​ដល់​ថ្ងៃទី​ ១៥ ខែ​តុលា​។

មាន​វត្តមាន​នៅក្នុង​ពិធី​នោះ​គឺ​ឯកអគ្គរាជទូត​អង់គ្លេស​ប្រចាំ​កម្ពុជា លោកស្រី Tina Redshaw លោក Jitka Markova នាយក​អង្គការ CamConscious ប្រចាំ​កម្ពុជា និង​និពន្ធ​នាយក​កាសែត​ភ្នំពេញ​ប៉ុស្តិ៍ លោក Joshua Purushotman​។ រូបថត​ដែល​ទទួល​ជយលាភី​គឺ​រូបថត​របស់​លោក Sean Channal ដែល​បង្ហាញ​ពី​ទេសភាព​វាលស្រែ​។ ចំពោះ​រូបភាព​ឈ្នះ​ពី​ការបោះឆ្នោត​ពី​សាធារណជន​គឺ​រូបភាព បក្សី Black Naped Monarch នៅក្នុង​សម្បុក​របស់​លោក Adam Roberts​។

ចំណែកឯ​ជយលាភី​សរសេរ​ប្រកប​ដោយ​ភាព​ច្នៃប្រឌិត​បាន​ទៅលើ​លោក ហុក សេងឡុង ដែល​បាន​សរសេរ​កំណាព្យ​មួយ​ដែល​មាន​ចំណងជើង​ថា Eco-dream ហើយ​ជយលាភី​លេខ​ ២ ​បាន​ទៅលើ​លោក Joshua Clayton បាន​សរសេរ​រឿង​ខ្លី​មួយ​ដែល​មាន​ចំណងជើង​ថា ស្លឹកចេក​នៅ​កម្ពុជា​។ ចំពោះ​ជយលាភី​ទាំងអស់​ពួកគេ​ទទួល​បាន​ការស្នាក់នៅ​សណ្ឋាគារ​ដោយ​ឥតគិតថ្លៃ ទទួល​បាន​បណ្ណ vouchers និង​វិញ្ញាបនបត្រ​ផង​ដែរ​៕ រូបថត Alisha Redshaw