ធនាគារជាតិនៃកម្ពុជាកាលពីថ្ងៃពុធបានផ្សព្វផ្សាយរបាយការណ៍ស្តីពី «ស្ថិរភាពហិរញ្ញវត្ថុ ឆ្នាំ ២០១៨» នៅផ្សារទំនើបអ៊ីអនម៉ល សែន សុខ រាជធានីភ្នំពេញ។ ការផ្សព្វផ្សាយរបាយការណ៍នេះគឺដើម្បីលើកកម្ពស់ការយល់ដឹងឲ្យកាន់តែស៊ីជម្រៅអំពីស្ថិរភាពហិរញ្ញវត្ថុរបស់ព្រះរាជាណាចក្រកម្ពុជាក្នុងចំណោមភាគីពាក់ព័ន្ធ និងសាធារណជន។
លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា និងជាប្រធានគណៈកម្មាធិការស្ថិរភាពហិរញ្ញវត្ថុធនាគារជាតិនៃកម្ពុជាបានថ្លែងសុន្ទរកថាស្វាគមន៍ដ៏មានអត្ថន័យ ចំណែកឯលោកស្រី Yong Sarah Zhou តំណាងមូលនិធិរូបិយវត្ថុអន្តរជាតិប្រចាំកម្ពុជាក៏បង្ហាញពីចំណាប់អារម្មណ៍នៅក្នុងពិធីដ៏អធិកអធមនោះដែរ។
ទន្ទឹមនឹងនេះដែរលោកជំទាវ ជា សិរី អគ្គនាយិកាបច្ចេកទេស ធនាគារជាតិនៃកម្ពុជា និងលោក ឃូ វុឍ្ឍី អគ្គនាយករងបច្ចេកទេស ធនាគារជាតិនៃកម្ពុជាបានធ្វើបទបង្ហាញស្តីពីសារៈសំខាន់នៃស្ថិរភាពហិរញ្ញវត្ថុដោយមានការចូលរួមពីតំណាងមកពីវិស័យហិរញ្ញវត្ថុ និងប្រព័ន្ធផ្សព្វផ្សាយនានាជាច្រើននាក់៕