.jpg)
កាលពីថ្ងៃទី ១៦ ខែតុលា ឆ្នាំ ២០១៨ ផលិតកម្ម Rock បានបើកសម្ពោធខ្សែភាពយន្តថ្មីខ្នាតធំរបស់ខ្លួននៅរោងភាពយន្ត Prime Cineplex Cinema ផ្សារសុវណ្ណាជាន់ផ្ទាល់ដីដោយមានការអញ្ជើញចូលរួមពីមន្ត្រីក្រសួងវប្បធម៌ និងវិចិត្រសិល្បៈ ផលិតករព្រមទាំងម្ចាស់ផលិតកម្មក្នុងនោះក៏មានតារាសម្ដែង និងតារាចម្រៀងចូលរួមយ៉ាងច្រើនកុះករផងដែរ។
លោក យឹម សុសត្យា ហៅ លី ម៉េង ប្រធានអ្នកគ្រប់គ្រងទូទៅនៅក្នុងផលិតកម្ម Rock បាននិយាយថា ខ្សែភាពយន្តរឿង «កែវវេទមន្ត» នេះគឺជាចំណីចក្ខុប្លែកមួយដែលផលិតកម្ម Rock បានសម្រិតសម្រាំងឡើងយ៉ាងល្អឥតខ្ចោះ។ លោកបន្តថាប្លង់ថតនីមួយៗសុទ្ធតែល្អៗកម្រិតប្រភេទ 4D ហើយបានប្រើបច្ចេកទេសចុងក្រោយបង្អស់ដើម្បីឲ្យភាពយន្តមួយនេះទទួលបានការគាំទ្រកាន់តែខ្លាំងពីសំណាក់ទស្សនិកជន។
គួរបញ្ជាក់ថាខ្សែភាពយន្តរឿង «កែវវេទមន្ត» គឺជាប្រភេទសាច់រឿងបែបស្នេហារ៉ូមេនទិកលាយឡំនឹងភាពកំប្លុកកំប្លែង ដែលមានការចូលរួមសម្ដែងដោយលោក យ៉ារ៉ូ ជាតួឯកប្រុស និងតួឯកស្រីគឺអ្នកនាង សុខ សោម៉ាវត្តី ដែលចំណាយទឹកប្រាក់ផលិតប្រហែលជិត ៦ ម៉ឺនដុល្លារអាមេរិក។
រូបថត ហុង មិនា
