ព្រឹត្តិការណ៍ Nepal Evening ២០២០ ដែលត្រូវបានប្រារព្ធធ្វើឡើងនៅក្នុងទីក្រុងភ្នំពេញកាលពីពេលថ្មីៗនេះគឺដើម្បីលើកកម្ពស់កម្មវិធី Visit Nepal ២០២០ និងដើម្បីទាក់ទាញភ្ញៀវទេសចរកម្ពុជាឲ្យទៅទស្សនារដ្ឋ Himalayan ប្រទេសនេប៉ាល់។
ក្រុមប្រឹក្សាទេសចរណ៍នេប៉ាល់ និងប្រតិបត្តិករទេសចរណ៍កម្ពុជាបានរួមគ្នារៀបចំព្រឹត្តិការណ៍នេះឡើងកាលពីថ្ងៃទី ១២ ខែមិថុនាកន្លងទៅនៅក្នុងសណ្ឋាគារឈានមុខមួយដែលមានការចូលរួមពីក្រុមហ៊ុនទេសចរណ៍កម្ពុជា ភ្នាក់ងារទេសចរណ៍ និងប្រព័ន្ធផ្សព្វផ្សាយជាច្រើន។ ព្រឹត្តិការណ៍នេះក៏មានគោលបំណងដើម្បីកសាងកិច្ចសហប្រតិបត្តិការរវាងប្រទេសទាំង ២ ឲ្យកាន់តែរឹងមាំផងដែរ។
ប្រទេសនេប៉ាល់កំពុងប្រារព្ធកម្មវិធី Visit Nepal Year 2020 នៅក្រោមប្រធានបទ «បទពិសោធពេញមួយ ជីវិត» (Lifetime Experiences) ជាមួយនឹងគោលដៅជាច្រើនដូចជាការរួមបញ្ចូលស្ត្រីនៅក្នុងឧស្សាហកម្មទេសចរណ៍ ការអភិវឌ្ឍហេដ្ឋារចនាសម្ព័ន្ធទេសចរណ៍ ការលើកកម្ពស់សុវត្ថិភាពអាកាសចរណ៍ និងការតភ្ជាប់ជើងហោះហើរជាដើម៕ រូបថត កែវ ពុទ្ធី