គណៈកម្មការសុខាភិបាលជាតិទីក្រុងប៉េកាំង បាននិយាយកាលពីថ្ងៃអង្គារថា បុរសអាយុ ៤១ ឆ្នាំម្នាក់ នៅខេត្ត Jiangsu ភាគខាងកើតប្រទេសចិន ត្រូវបានគេរាយការណ៍ថាបានឆ្លង វីរុសផ្តាសាយបក្សីដ៏កម្រមួយ ដែលគេស្គាល់ថា H10N3។
ប្រភេទផ្សេងគ្នានៃជំងឺផ្តាសាយបក្សីមានវត្តមាននៅក្នុងប្រទេសចិន ហើយខ្លះឆ្លងរាលដាលដល់មនុស្សជាញឹកញាប់ ជាពិសេសអ្នកដែលប៉ះពាល់ផ្ទាល់ជាមួយបសុបក្សី។ មិនមានការចង្អុលណាមួយ បង្ហាញថាវីរុស H10N3 អាចរាលដាលយ៉ាងងាយស្រួលទៅកាន់មនុស្សឡើយ។
គណៈកម្មការសុខាភិបាលមិនបានបញ្ជាក់ពីស្ថានភាពបុរសនោះឆ្លង ដោយរបៀបណាឡើយ។ ប៉ុន្តែបច្ចុប្បន្ន លោកមានស្ថានភាពធូរស្បើយ ហើយក៏មិនមានការរាយការណ៍ពីករណីឆ្លងណាផ្សេងទៀតដែរ។
ប្រភពដដែលបន្តថា វីរុស H10N3 គឺជាភ្នាក់ងារបង្កជំងឺទាបដែលមានន័យថាវាមិនបណ្តាលឱ្យមានជំងឺធ្ងន់ធ្ងរនៅក្នុងបសុបក្សីហើយទំនងជាមិនបណ្តាលឱ្យមានការផ្ទុះទ្រង់ទ្រាយធំទេ៕