.jpg)
ប៉ូលិសត្រួតពិនិត្យឯកសាររបស់អ្នកបើកម៉ូតូនៅផ្លូវមួយ ក្នុងអំឡុងការបិទទូទាំងប្រទេសដើម្បីទប់ស្កាត់ការឆ្លងជំងឺកូវីដ។ AFP
កាលពីថ្ងៃចន្ទ កន្លងទៅ នាយករដ្ឋមន្រ្តីម៉ាឡេស៊ី លោក Muhyiddin Yassin បានបញ្ចេញកញ្ចប់ថវិកាជំនួយសេដ្ឋកិច្ចថ្មីមួយទៀត តម្លៃ ៩,៧ ពាន់លានដុល្លារ ក្នុងគោលបំណងកាត់បន្ថយផលប៉ះពាល់នៃការបិទខ្ទប់ប្រទេសទាំងមូលចាប់ពីថ្ងៃទី ១ មិថុនាតទៅ។
ថ្លែងនៅក្នុងសុន្ទរកថាតាមរយៈទូរទស្សន៍លោក Muhyiddin បាននិយាយថា កញ្ចប់ថវិកានេះមានឈ្មោះថា កម្មវិធីយុទ្ធសាស្ត្រគាំទ្រដល់ជីវភាពប្រជាជន និងសេដ្ឋកិច្ច ព្រមទាំងគាំទ្រដល់លទ្ធភាពមន្ទីរពេទ្យសាធារណៈក្នុងការព្យាបាលជំងឺកូវីដ ១៩ ដើម្បីគាំទ្រដល់ការបន្តអាជីវកម្ម និងជួយប្រជាជន។
លោកបានបន្ថែមថា កញ្ចប់ថវិកាប្រមាណ ៩,៧ លានដុល្លារនេះ នឹងបង្កើនលទ្ធភាពក្នុងការទិញគ្រែ បន្ទប់ថែទាំ និងឧបករណ៍សម្រាប់ព្យាបាលជំងឺកូវីដ ១៩ បន្ថែម ខណៈទឹកប្រាក់ប្រមាណ ១៣៣ លានដុល្លារទៀតនឹងត្រូវបម្រុងទុកសម្រាប់ចំណាយប្រតិបត្តិការនានា និងការគ្រប់គ្រងដោះស្រាយវិបត្តិសុខភាពនានាផងដែរ។
លោកបន្តថា ដើម្បីជាជំនួយដល់ប្រជាជនម៉ាឡេស៊ីដោយផ្ទាល់រដ្ឋាភិបាលនឹងបញ្ចេញនូវទឹកប្រាក់ជាងកន្លះលានដុល្លារចែកដល់គ្រួសារដែលមានប្រាក់ចំណូលទាប (ពោលមានប្រាក់ខែតិចជាង ១ ពាន់ដុល្លារ ក្នុង ១ ខែ)។
«ការធ្វើបែបនេះ គឺដើម្បីធានាបាននូវសុខុមាលភាព និងការរស់រានមានជីវិតរបស់ជនងាយរងគ្រោះក៏ដូចជាធានាថា កម្មករដែលពឹងផ្អែកលើប្រាក់ឈ្នួលប្រចាំថ្ងៃអាចនឹងបន្តទទួលជំនួយបាន។ ក្រុមប្រជាជននេះ ត្រូវបានគេចាត់ទុកនៅក្នុងចំណោមអ្នកដែលទទួលរងផលប៉ះពាល់ខ្លាំងបំផុត ក្រោយបិទខ្ទប់ប្រទេសរួច»។ លោក Muhyiddin បាននិយាយយ៉ាងដូច្នេះ។
លើសពីនេះទៀត លោកបាននិយាយថា រដ្ឋាភិបាលនឹងមានកញ្ចប់ក្នុងការផ្តល់ប្រាក់កម្ចីជូនដល់ប្រជាជនក្រីក្របំផុតជាង ៤០ ភាគរយ និងប្រជាជនដែលបានបាត់បង់ការងារក៏ដូចជាសហគ្រិនខ្នាតតូច និងសហគ្រាសធុនតូច និងមធ្យមដែលមិនអាចដំណើរការបានក្នុងអំឡុងពេលអនុវត្តបទបញ្ជាត្រួតពិនិត្យការធ្វើដំណើរ (MCO) ផងដែរ។
លោកក៏បានប្រកាសផ្តល់ជំនួយជាថវិកាពិសេសប្រមាណ ១២០ ដុល្លារ ក្នុងម្នាក់ ដល់មគ្គុទេ្ទសក៍ទេសចរណ៍ចំនួន ១៧ ០០០ នាក់ និងអ្នកបើកតាក់ស៊ី ៤០ ០០០ នាក់ អ្នកបើកបរឡានក្រុងសាលាចំនួន ១១ ០០០ នាក់អ្នកបើកបរឡានក្រុងរហ័ស ៤ ពាន់នាក់ និងអ្នកបើកឡានអេឡិចត្រូនិក ៦២ ០០០ នាក់ផងដែរ។
ទោះយ៉ាងណាលោក Muhyiddin បានទទួលស្គាល់ថា រដ្ឋាភិបាលមានហិរញ្ញវត្ថុសម្រាប់ទុកប្រើប្រាស់នាពេលបច្ចុប្បន្ននៅមានកម្រិតនៅឡើយ។ នៅក្នុងពេលបញ្ចប់សុន្ទរកថា លោកក៏បានបន្ថែមថា រដ្ឋាភិបាលនឹងមិនបើកប្រាក់ខែដល់រដ្ឋមន្រ្តី និងអនុរដ្ឋមន្រ្តីចាប់ពីខែមិថុនា ដល់ខែសីហា ដើម្បីជាការជួយសម្រួល និងផ្ដល់ការគាំទ្រដល់ប្រទេសក្នុងការប្រយុទ្ធប្រឆាំងនឹងរលកទី២ នេះ។
បើទោះជាគេឃើញមានការសាទរវិធានរបស់រដ្ឋាភិបាលពីសំណាក់ប្រជាជនទាក់ទិននឹងការបិទខ្ទប់ ប្រទេសយ៉ាងណាក្ដី គេឃើញមានផ្សារទំនើប និងអាជីវកម្មជាច្រើននៅក្នុងប្រទេសម៉ាឡេស៊ី បានបិទទ្វារនៅថ្ងៃអង្គារ ក្រោយរដ្ឋាភិបាលប្រកាសបិទប្រទេសទាំងមូលចាប់ពីថ្ងៃ ១ មិថុនាតទៅ។
អាជីវកម្មក្នុងប្រទេសនេះ ត្រូវបានបិទរយៈពេល ២ សប្តាហ៍ ពោលគឺត្រូវបិទរហូតដល់ថ្ងៃទី ១៤ ខែមិថុនា លើកលែងតែនៅក្នុងវិស័យសំខាន់ៗចំនួន ១៧ រួមមានធនាគារ ប្រព័ន្ធផ្សព្វផ្សាយ អាហារ និងភេសជ្ជៈប៉ុណ្ណោះ។ វិស័យផលិតកម្មជាង ១៦ ក៏ត្រូវបានអនុញ្ញាតឱ្យដំណើរការនូវសមត្ថភាព ៦០% រួមទាំងអគ្គិសនី និងអេឡិចត្រូនិក ប្រេង និងឧស្ម័ន។ វិស័យចម្ការកសិកម្មជលផល និងសំណង់សំខាន់ៗក៏ត្រូវបានលើកលែងផងដែរ។
ក្រសួងសេដ្ឋកិច្ចម៉ាឡេស៊ីបានឱ្យដឹងតាមរយៈសារព័ត៌មាន The Star ថា ការលើកលែងលើវិស័យខាងលើឱ្យនៅមានសមត្ថភាពត្រឹម ៦០% ដោយសារវិស័យនេះ ផ្គត់ផ្គង់ហេដ្ឋារចនាសម្ព័ន្ធសំខាន់ៗនៅទូទាំងពិភពលោកដូចជាសេវាថែទាំសុខភាព និងវេជ្ជសាស្ត្រ ប្រព័ន្ធទឹកបណ្តាញថាមពល បណ្តាញគមនាគមន៍ និងទូរគមនាគមន៍ផងដែរ។
លោក Muhyiddin ធ្លាប់បាននិយាយកាលពីសប្ដាហ៍មុនដែរថា ការបិទប្រទេសអាចរក្សាសុវត្ថិភាពដល់ប្រជាជនតែនឹងផ្ដល់ផលប៉ះពាល់ដល់សេដ្ឋកិច្ចប្រទេសនេះ រហូតដល់ងើបលែងរួច។យោងតាមបទពិសោធខ្ទប់ប្រទេសកាលពីឆ្នាំមុន សេដ្ឋកិច្ចម៉ាឡេស៊ីស្ទើរតែដួលរលំដោយប្រទេសនេះបានខាតបង់ប្រាក់ប្រមាណ ៥៧៩ លានដុល្លារ ក្នុង ១ ថ្ងៃ។
គួរបញ្ជាក់ផងដែរថា ផលិតផលក្នុងស្រុកសរុបម៉ាឡេស៊ី ធ្លាក់ចុះ ៥,៦ ភាគរយកាលពីឆ្នាំមុន និងធ្លាក់ចុះ ០,៥ ភាគរយទៀតនៅត្រីមាសទី១ ឆ្នាំ ២០២១។ លោក WellianWiranto សេដ្ឋវិទូនៃក្រុមហ៊ុន Oversea-Chinese Banking Corp. នៅសិង្ហបុរីបានប្រាប់សារព័ត៌មាន Bloomberg ថា៖ «សេដ្ឋកិច្ចប្រទេសនេះ ប្រៀបបាននឹងអ្នករត់ម៉ារ៉ាតុងអ៊ីចឹង ទោះយ៉ាងណាយើងគង់តែនឹងទៅដល់ទីបញ្ចប់ទេ គ្រាន់ថា បច្ចុប្បន្នត្រូវទទួលរងផលលំបាកជាបណ្ដោះអាសន្នសិន ទម្រាំសេដ្ឋកិច្ចនឹងស្ទុះឡើងវិញដោយសន្សឹមៗ ក្នុងពេលឆាប់ៗ»។
ស្រដៀងគ្នានេះដែរ អ្នកវិភាគប្រចាំក្រុមហ៊ុន RHB លោក Sailesh K. Jha, Suresh Rama និងលោក Ahmad NazmiIdrus បានសរសេរកាលពីថ្ងៃចន្ទថា ផលប៉ះពាល់នឹងគ្រាន់តែជាការថយចុះបណ្តោះអាសន្នប៉ុណ្ណោះ។ ពួកគេបានរក្សាការព្យាករផលិតផលក្នុងស្រុកសរុបប្រចាំឆ្នាំរបស់ប្រទេសនេះ នឹងកើនក្នុងអត្រា ៥,៤ ភាគរយ៕
