របាយការណ៍របស់ក្រុមប្រឹក្សាសន្តិសុខនៃអង្គការសហប្រជាជាតិស្ដីពីប្រទេសលីប៊ី ចេញផ្សាយក្នុងខែមីនាបានអះអាងថា យន្តហោះដ្រូនយោធាម៉ូដែល AI-Kargu-2 ផលិតដោយក្រុមហ៊ុនបច្ចេកវិទ្យាយោធាតួកគី STM បានវាយប្រហារទៅលើទាហាន ដោយខ្លួនឯងជាលើកដំបូង។
បន្ថែមពីនេះប្រភពដដែលនេះ ក៏បានរាយការណ៍ស្ដីអំពីការប៉ះទង្គិចគ្នាមួយ នៅខែមីនា ឆ្នាំ២០២០ នៅក្នុងជម្លោះយោធានៅក្នុងប្រទេសលីប៊ី ដោយលើកឡើងថាយន្តហោះគ្មានមនុស្សបើកដែលត្រូវបានគេស្គាល់ថាជាប្រព័ន្ធអាវុធស្វ័យភាពដ៍សាហាវមួយទៀត ដែលមានឈ្មោះថា LAWS បានបង្ហាញខ្លួនជាលើកដំបូងក្នុងពេលមានសង្គ្រាម។ ប៉ុន្តែរបាយការណ៍មិនបាននិយាយច្បាស់ទេថា អាវុធនេះបានសម្លាប់នរណាម្នាក់ឡើយ។
យ៉ាងណាមិញរបាយការណ៍ដដែលនេះ មិនបានបញ្ជាក់ពីសេចក្ដីលម្អិតថាតើមានអ្នកស្លាប់ដោយសារឧប្បត្តិហេតុប៉ុន្មាននាក់ទេ ប៉ុន្តែអ្នកជំនាញបានចោទជាសំណួរថា តើកិច្ចប្រឹងប្រែងជាសកល ដើម្បីហាមឃាត់មនុស្សយន្តស្វយ័តឃាតករ អាចនឹងក្លាយជារឿងឥតបានការឬយ៉ាងណា?
ក្រុមអ្នកជំនាញបានធ្វើកំណត់សម្គាល់ថាក្នុងរយៈពេលពេញ ១ ឆ្នាំហើយ ដែលកិច្ចខិតខំប្រឹងប្រែងរបស់អង្គការសហប្រជាជាតិក្នុងការជំរុញឱ្យកងកម្លាំងសម្ព័ន្ធភាពហាហ្វរ (HAF) ដកថយពីរដ្ឋធានីទ្រីប៉ូលី នៃប្រទេសលីប៊ីវិញ ប៉ុន្តែដ្រូនយោធាអាចនឹងនៅតែបន្តប្រតិបត្តិការចាប់តាំងពីខែមករា ឆ្នាំ ២០២០ មកម្ល៉េះ។
របាយការណ៍របស់អង្គការ U.N បានឱ្យដឹងថា៖«ដ្រូនយោធា ឬប្រព័ន្ធអាវុធស្វ័យភាពដ៏សាហាវដូចជា STM Kargu-2 បានដេញប្រហារក្បួនដឹកជញ្ជូន និងកងកម្លាំងសម្ព័ន្ធភាព HAF ដែលកំពុងតែដកថយ»។
តាមរបាយការណ៍ប្រព័ន្ធអាវុធស្វ័យភាព STM Kargu គឺជាប្រភេទយន្តហោះគ្មានមនុស្សបើក ដែលប្រើប្រាស់មុខងារធ្វើចំណាត់ថ្នាក់របស់ម៉ាស៊ីនដើម្បីជ្រើសរើស និងដៅគោលដៅវាយប្រហារ។
អ្នកជំនាញបានសរសេរនៅក្នុងរបាយការណ៍ថា៖ «ប្រព័ន្ធអាវុធស្វយ័តដ៏សាហាវនេះ ត្រូវបានគេរៀបចំឡើង ដើម្បីវាយប្រហារគោលដៅដោយមិនតម្រូវឱ្យមានការភ្ជាប់ទិន្នន័យរវាងប្រតិបត្តិករ និងគ្រាប់រំសេវនោះទេ»។
អ្នកស្រាវជ្រាវផ្នែកមនុស្សយន្ត និងបញ្ញាសិប្បនិម្មិត AI ជាច្រើននាក់ក្នុងពេលកន្លងមករួមទាំងលោក Elon Musk និងបុគ្គលលេចធ្លោជាច្រើនទៀតដូចជាលោក Stephen Hawking និង Noam Chomsky ក៏ធ្លាប់បានអំពាវនាវឱ្យមានការហាមឃាត់ «អាវុធស្វយ័ត» នានា ដែលមានមុខងារកំណត់គោលដៅ និងសម្លាប់មនុស្សដោយខ្លួនឯង ទៅតាមកម្មវិធីដែលគេបង្កើតឡើង។
ក្រុមអ្នកជំនាញក៏បានព្រមានថាសំណុំទិន្នន័យដែលត្រូវបានប្រើបណ្តុះបណ្តាលមនុស្សយន្តឃាតករស្វយ័តទាំងនេះ ដើម្បីចាត់ថ្នាក់និងកំណត់អត្តសញ្ញាណវត្ថុដូចជាឡានក្រុងរថយន្ត និងជនស៊ីវិលប្រហែលជាមិនមានភាពរឹងមាំ និងសិក្សាបានពេញលេញទេ ដូច្នេះអាចនឹងបង្កគ្រោះថ្នាក់ជាយថាហេតុ។
លោក Zachary Kallenborn ទីប្រឹក្សាសន្តិសុខជាតិជំនាញខាងយានអវកាសគ្មានមនុស្សបើកជឿថា វាអាចនឹងមានហានិភ័យខ្ពស់ប្រសិនបើមានអ្វីមួយកើតឡើងខុសប្រក្រតីនៅពេល ដែលដ្រូនស្វយ័តបែបនេះធ្វើការទាក់ទងនិងសម្របសម្រួលសកម្មភាពរបស់ពួកគេក្នុងពេលប្រតិបត្តិការ។
បើយោងតាមការស្ទង់មតិទូទាំងពិភពលោកដែលរៀបចំឡើងដោយយុទ្ធនាការ ដើម្បីបញ្ឈប់ឃាតកររ៉ូបូត កាលពីឆ្នាំមុនបានរកឃើញថា អ្នកឆ្លើយតបនឹងការស្ទង់មតិជាង ៦២ ភាគរយបាននិយាយថា ពួកគេបានប្រឆាំងនឹងការប្រើប្រាស់ប្រព័ន្ធអាវុធស្វ័យភាពដ៏សាហាវទាំងនេះ៕