រដ្ឋមន្រ្តីម៉ាឡេស៊ី លោក Hasni Mohammad បាននិយាយថា មុននឹងមានការបើកច្រកព្រំដែនរវាងប្រទេសម៉ាឡេស៊ី និងសិង្ហបុរីវិញ យើងត្រូវតែមើលទៅលើចំនួនករណីកូវីដ ១៩ សិន។
យោងតាមការស្រង់សម្តីរបស់សារព័ត៌មាន CNA កាលពីថ្ងៃទី ៣១ ឧសភា លោក Hasni បាននិយាយថា ភាគីទាំងសងខាងបានព្រមព្រៀងគ្នាលើកិច្ចចរចាដើម្បីបើកការធ្វើដំណើរឆ្លងកាត់ព្រំដែនឡើងវិញ ដោយចាំមើលស្ថានភាពកូវីដ ១៩ នៅក្នុងប្រទេសម៉ាឡេស៊ីសិន។
ប្រទេសម៉ាឡេស៊ី បានចាប់ផ្តើមបិទប្រទេសជាលើកទី៣ កាលពីថ្ងៃទី ១ មិថុនា អំឡុងពេលមានករណីកូវីដ ១៩ កំពុងកើនឡើងគួរឱ្យ កត់សម្គាល់ប៉ុន្មានសប្តាហ៍ថ្មីៗនេះ។ ក្នុងដំណាក់កាលទី១ នៃការបិទប្រទេសចាប់ពីថ្ងៃទី ១ មិថុនា ដល់ថ្ងៃទី ១៤ ខែមិថុនា ផ្សារទំនើបនានាត្រូវបានបិទ ខណៈដែលមានតែផ្នែកសេវាកម្មសំខាន់ៗចំនួន១៧ប៉ុណ្ណោះដែលត្រូវបានអនុញ្ញាតឱ្យធ្វើប្រតិបត្តិការ។
វិស័យដែលអនុញ្ញាតឱ្យបើកដំណើរការរួមមានវិស័យសុខាភិបាល ទូរគមនាគមន៍ និងប្រព័ន្ធផ្សព្វផ្សាយ ម្ហូបអាហារ និងភេសជ្ជៈ និងសេវាកម្មធនាគារ។
លោក Hasni ក៏បានលើកឡើងពីបញ្ហាដែលជះឥទ្ធិពលដល់ពលករម៉ាឡេស៊ី ដែលបច្ចុប្បន្នកំពុងធ្វើការនៅប្រទេសសិង្ហបុរី ក្រោមការរៀបចំតាមពេលវេលាកំណត់ (Periodic Commuting Arrangement) ។
តាមគម្រោងការនេះ ពលករម៉ាឡេស៊ីនៅប្រទេសសិង្ហបុរី ដែលកាន់លិខិតឆ្លងដែនមានទិដ្ឋការរយៈពេលវែងត្រូវបានអនុញ្ញាតឱ្យដាក់ពាក្យសុំឈប់សម្រាករយៈពេលខ្លី បន្ទាប់ពីធ្វើការនៅប្រទេសសឹង្ហបុរី យ៉ាងតិច ៩០ ថ្ងៃជាប់ៗគ្នា។
ទោះយ៉ាងណាពលករមួយចំនួនបានសម្តែងការព្រួយបារម្ភអំពីតម្លៃលើសេវាកម្មការដាក់ឱ្យ នៅដាច់ដោយឡែកនៅពេលចូលប្រទេសសិង្ហបុរី។ កាលពីខែឧសភា ប្រទេសសិង្ហបុរី បានប្រកាសថា អ្នកដែលមានប្រវត្តិធ្វើដំណើរថ្មីៗទៅកាន់តំបន់ដែលមានហានិភ័យខ្ពស់ក្នុងការឆ្លងកូវីដ ១៩ រួមទាំងប្រទេសម៉ាឡេស៊ី នឹងត្រូវនៅដាច់ដោយឡែករយៈពេល ២១ ថ្ងៃ។
ចំពោះអ្នកដែលត្រូវនៅដាច់ដោយឡែករយៈពេល ២១ ថ្ងៃ ត្រូវបង់ប្រាក់ទៅអាជ្ញាធរអន្តោប្រវេសន៍ និងប៉ុស្តិ៍ត្រួតពិនិត្យប្រមាណ ៣ ០០០ ដុល្លារ សម្រាប់ការស្នាក់នៅអាហារ និងការធ្វើតេស្តរកកូវីដ ១៩ ផងដែរ។
រដ្ឋាភិបាលប្រទេសម៉ាឡេស៊ី និងសិង្ហបុរី បានបង្កើតនូវគម្រោងធ្វើដំណើរចាប់ផ្តើមនៅថ្ងៃទី ១៧ ខែឧសភា ដោយការធ្វើដំណើរនឹងត្រូវបានអនុញ្ញាត តែការចូលរួមបុណ្យសព ឬទៅសួរសុខទុក្ខអ្នកដែលមានជំងឺធ្ងន់ធ្ងរ។
ក្រោមគម្រោងធ្វើដំណើរនេះមានតែប្រជាជនម៉ាឡេស៊ី ពលរដ្ឋសិង្ហបុរីដែលជាអ្នកស្នាក់នៅអចិន្រ្តៃយ៍នៅប្រទេសសិង្ហបុរី និងអ្នកកាន់លិខិតឆ្លងដែន Long Term Pass របស់សិង្ហបុរីដែលមានជំងឺ ឬស្លាប់ក្នុងប្រទេសម៉ាឡេស៊ី អាចចូលមកប្រទេសនេះបាន៕