កាលពីថ្ងៃពុធកន្លងទៅ គណបក្សប្រឆាំងអ៊ីស្រាអែលបានយល់ព្រមលើកិច្ចព្រមព្រៀងចម្រុះមួយ ដើម្បីបង្កើតរដ្ឋាភិបាលរួបរួមថ្មី និងឯកភាពបណ្តេញលោក Benjamin Netanyahu ដែលជានាយករដ្ឋមន្រ្តីកាន់អំណាចយូរជាងគេបំផុតនៅក្នុងប្រវត្តិសាស្ត្រអ៊ីស្រាអែល និងជាឥស្សរជនលេចធ្លោម្នាក់ ដែលបានជំរុញនយោបាយប្រទេសនេះទៅស្ដាំនិយម។
ការសម្រេចថ្មីរវាងភាគីទាំង ២ នេះ នឹងធ្វើឱ្យនយោបាយដែលជាប់គាំងមួយនេះមានការធូរស្បើយជាងមុន ក្រោយប្រទេសនេះ បានរៀបចំការបោះឆ្នោតចំនួន ៤ ក្នុងរយៈពេល ២ ឆ្នាំ និងធ្វើឱ្យអ៊ីស្រាអែល មិនមានស្ថិរភាពទាំងផ្នែកនយោបាយ និងថវិការដ្ឋ។ ប្រសិនបើសភាផ្តល់សច្ចាប័នលើកិច្ចព្រមព្រៀងមួយនេះ នោះប្រទេសអ៊ីស្រាអែល នឹងអាចកំណត់បាននូវរដ្ឋាភិបាល ដែលមានស្ថិរភាពមួយ។
ទោះជាយ៉ាងណាក្ដីសម្ព័ន្ធភាពថ្មីនេះ គឺជាសម្ព័ន្ធមិត្តចម្រុះរវាងគណបក្សនយោបាយចំនួន ៨ ពីមនោគមន៍វិទ្យាផ្សេងៗគ្នាទាំងក្រុមឆ្វេងនិយមផង និងក្រុមស្តាំនិយមផង។ សម្ព័ន្ធភាពដដែលនេះក៏នឹងរួមបញ្ចូលទាំងសមាជិកភាពនៃគណបក្សអារ៉ាប់តូចមួយដែលមានឈ្មោះថា Raam ដែលនឹងក្លាយជាក្រុមអារ៉ាប់ដំបូងគេដែលចូលរួមក្នុងសម្ព័ន្ធភាពស្តាំនិយមនៅក្នុងប្រវត្តិសាស្ត្រអ៊ីស្រាអែល។
ខណៈដែលអ្នកវិភាគមួយចំនួនបានសាទរ ចំពោះសម្ព័ន្ធភាពនេះ អ្នកវិភាគឯទៀតក៏បាននិយាយថា សមាជិករបស់ខ្លួនមិនចុះសម្រុងក្នុងការរួបរួមថ្មីនេះទេ ហើយចាត់ទុកការបង្រួបបង្រួមនេះជា គឺជានយោបាយស្រមើស្រមៃមិនអាចទៅរួចក្នុងប្រព័ន្ធនយោបាយអ៊ីស្រាអែល។
លោក Naftali Bennett អតីតសម្ព័ន្ធមិត្តរបស់លោក Netanyahu ដែលភាគច្រើនត្រូវបានគេមើលឃើញថា ជាបុគ្គលស្ដាំនិយមជាងរដ្ឋមន្ត្រីចាស់នឹងក្លាយជាអ្នកដឹកនាំសម្ព័ន្ធភាពនេះ រហូតដល់ឆ្នាំ ២០២៣។ លោកជាអតីតមេដឹកនាំដែលប្រឆាំងនឹងរដ្ឋប៉ាឡេស្ទីន និងចង់ឱ្យអ៊ីស្រាអែលបញ្ចូលតំបន់ភាគខាងលិច West Bank ឱ្យក្លាយជារបស់អ៊ីស្រាអែលផងដែរ។
ប្រសិនបើរដ្ឋាភិបាលនេះ អាចរក្សាដំណើការបានរយៈពេលពេញ ១ អាណត្តិ លោក YairLapid មានវ័យ ៥៧ ឆ្នាំ ជាអតីតពិធីករទូរទស្សន៍អ៊ីស្រាអែល និងចូលប្រឡូកក្នុងឆាកនយោបាយ ៩ ឆ្នាំ មកនឹងដឹកនាំបន្តនៅចន្លោះឆ្នាំ ២០២៣ និង ២០២៥។
ទោះជាយ៉ាងណាក្ដី កិច្ចព្រមព្រៀងនេះនៅតែត្រូវការការយល់ព្រមពីសភា Knesset ឬសភានៅក្នុងការបោះឆ្នោត ដែលត្រូវបានគេរំពឹងថា នឹងធ្វើឡើងនៅដើមសប្តាហ៍ក្រោយ។ ក្រោយសម្រេចរួច លោក Lapid និងដៃគូចម្រុះជាច្រើននឹងបញ្ចប់ការដឹកនាំរយៈពេល ១២ ឆ្នាំរបស់លោក Netanyahu។
ជាមួយគ្នានេះដែរ ទោះបីជាអ៊ីស្រាអែល និងសភារបស់ខ្លួននៅមានភាពមិនចុះសម្រុងយ៉ាងណាក្ដី ប៉ុន្តែសមាជិកសភាអ៊ីស្រាអែលបានជួបជុំគ្នានៅថ្ងៃពុធនេះ ដោយសម្រេចជ្រើសរើស លោក Isaac Herzog អតីតមេដឹកនាំគណបក្សពលកម្ម និងជារដ្ឋមន្ត្រីរដ្ឋាភិបាលធ្វើជាប្រធានាធិបតីថ្មីប្រទេសអ៊ីស្រាអែលផងដែរ៕