កាសែត The Asahi Shimbun បានផ្សាយថា នាយករដ្ឋមន្រ្តីជប៉ុនលោក Yoshihide Suga ទំនងជានឹងធ្វើការបោះឆ្នោតមុនការកំណត់បន្ទាប់ពីព្រឹត្តិការណ៍កីឡាអូឡាំពិកនៅទីក្រុងតូក្យូ។
លោក Suga បានធ្លាប់និយាយថា លោកនឹងផ្តោតការយកចិត្តទុកដាក់លើការដោះស្រាយបញ្ហាកូវីដ ១៩ ហើយព្រឹត្តិការណ៍កីឡាអូឡាំពិកនឹងនៅតែបន្តក្រោមវិធានការការពារ។
យោងតាមសេចក្តីរាយការណ៍របស់ប្រព័ន្ធផ្សព្វផ្សាយដដែលបានឱ្យដឹងថា លោក Suga បានយល់ព្រមកាលពីថ្ងៃទី ២ មិថុនាជាមួយប្រមុខនៃសម្ព័ន្ធភាពដែលកំពុងកាន់អំណាចរបស់លោក មិនឱ្យបន្តសម័យប្រជុំសភាបច្ចុប្បន្នឡើយ។ ប្រទេសជប៉ុន នឹងត្រូវប្រមូលថវិកាបន្ថែម ដើម្បីទុកសម្រាប់ការចំណាយជាបន្ទាន់ ដើម្បីទប់ស្កាត់នឹងការរីករាលដាលកូវីដ ១៩។
យោងតាមការស្រង់សម្តីរបស់សារព័ត៌មាន CNA សមាជិកសភាគណបក្សកាន់អំណាចលោក Shoji Nishida បានប្រាប់សារព័ត៌មាន កាលពីសប្តាហ៍មុនថា៖ «វាច្បាស់ណាស់ថា យើងត្រូវការថវិកាបន្ថែម ប៉ុន្តែសភាកំពុងបិទដូច្នេះយើងមិនមានពេលវេលា ដើម្បីអនុម័តទេ»។ លោកបានបន្តនិយាយថា គួរតែមានការជជែកវែកញែកនៅក្នុងគណបក្សស្តីពីការចងក្រងកញ្ចប់សកម្មភាព និងថវិកាបន្ថែម៕