កាលពីខែមេសា ឆ្នាំ ២០២០១ នៅទីក្រុងដេលី ប្រទេសឥណ្ឌា មានអ្នកវិជ្ជមានកូវីដ ១៩ ចំនួន ៦ នាក់ បានស្លាប់នៅមន្ទីរពេទ្យដោយមិនមានគ្រូពេទ្យ និងបុគ្គលិកពេទ្យព្យាបាល។ នេះបើយោងតាមសារព័ត៌មាន BBC។
ខ្សែវីដេអូមួយបានបង្ហោះនៅលើបណ្តាញអ៊ីនធឺណិត បានធ្វើឱ្យមានការចាប់អារម្មណ៍ពីបណ្តាអ្នកប្រើប្រាស់ប្រព័ន្ធអ៊ីនធឺណិត ដែលវីដេអូនេះត្រូវបានថតនៅយប់ថ្ងៃទី ៣០ខែមេសា នៅឯមណ្ឌលថែទាំនៅមន្ទីរពេទ្យ Kriti ក្នុង Gurugram ជាយក្រុងដេលី។
សាច់ញាតិរបស់អ្នកស្លាប់និយាយថា ពួកគេបានចូលទៅក្នុង ICU បន្ទាប់ពីពួកគេរកគ្រូពេទ្យសាលធំមិនឃើញ។ ពួកគេបានចោទប្រកាន់គ្រូពេទ្យថា បានបោះបង់ចោលអ្នកជំងឺ បន្ទាប់ពីមន្ទីរពេទ្យអស់អុកស៊ីហ្ស៊ែន។
ក្រុមគ្រូពេទ្យដែលបានពួននៅក្នុងមន្ទីរពេទ្យបាននិយាយថា ពួកគេបានគេចខ្លួនដោយភ័យខ្លាចក្រុមគ្រួសារអ្នកជំងឺប្រព្រឹត្តអំពើហិង្សាមកលើខ្លូន។ ក្រុមគ្រួសារនិយាយថា ពួកគេមិនដែលធ្វើការគំរាមកំហែងបែបនេះឡើយ។
កាលពីខែមេសា ប្រទេសឥណ្ឌា ខ្វះអុកស៊ីហ្ស៊ែន ដើម្បីព្យាបាលអ្នកជំងឺកូវីដ ១៩ ដែលធ្វើឱ្យ ពិភពលោកគឺបានផ្តល់ជាជំនួយដូចជា ឧបករណ៍ផលិតអុកស៊ីហ្ស៊ែននិងសម្ភារវេជ្ជសាស្ត្រមួយចំនួនដល់ប្រទេសដើម្បីទប់ស្កាត់នឹងការរីករាលដាលនេះ។
បន្ថែមពីលើកង្វះអុកស៊ីហ្ស៊ែន ប្រទេសឥណ្ឌា មានអ្នកស្លាប់ដោយសារកូវីដ ១៩ ច្រើនដែលបណ្តាលឱ្យ ខ្វះកន្លែងបញ្ចុះសព និងមានសពអណ្តែតតាមដងទន្លេទៀតផង។
ការស្លាប់របស់អ្នកជំងឺចំនួន៦នាក់នៅមន្ទីរពេទ្យនោះគឺជាសោកនាដកម្មមួយក្នុងចំណោមសោកនាដកម្មជាច្រើនប៉ុន្តែធម្មជាតិដែលគួរឱ្យភ្ញាក់ផ្អើលនៃខ្សែវីដេអូនេះបានធ្វើឱ្យមានការចាប់អារម្មណ៍ទូទាំងពិភពលោក។
លោកAmandeep Chawla ដែលឪពុករបស់លោកស្ថិតក្នុងចំណោមមនុស្ស ៦ នាក់ ដែលបានបាត់បង់ជីវិតបាននិយាយថា បុគ្គលិកមន្ទីរពេទ្យបានប្រើប្រាស់រថយន្ត ២ គ្រឿង ចេញទៅរកអុកស៊ីហ្ស៊ែន។
លោក Chawla បានរំឭកពីការមើលឃើញបំពង់អុកស៊ីហ្ស៊ែន នៅជិតច្រកចូលមន្ទីរពេទ្យប៉ុន្តែលោកបាននិយាយថា មកដល់ម៉ោង ១១ យប់ បំពង់អុកស៊ីហ្ស៊ែនបានបាត់ ហើយបង្កឱ្យមានការភ័យខ្លាចក្នុងចំណោមក្រុមគ្រួសារអ្នកជំងឺ។
លោកបានបន្តនិយាយថា ពេលកាន់តែយប់ជ្រៅបុគ្គលិកមន្ទីរពេទ្យបានបាត់ខ្លួនដែលបង្កឱ្យ មានការភិតភ័យ ពួកគេក៏បានសម្រេចចូលទៅបន្ទប់ ICU ។ នៅពេលដែលពួកគេទៅដល់ទីនោះពួកគេនិយាយថា ពួកគេបានរកឃើញតែសាកសពរបស់ក្រុមគ្រួសារគេតែប៉ុណ្ណោះ។
លោក Chawla បាននិយាយថា៖ «គ្មានគ្រូពេទ្យគ្មានបុគ្គលិកមន្ទីរពេទ្យទេ។ពួកគេបានរត់គេចអស់ហើយ»៕