ប្រធានាធិបតីរុស្ស៊ី លោក Vladimir Putin បាននិយាយកាលពីថ្ងៃសុក្រថា គម្រោងសាងសង់បំពង់បង្ហូរ ឧស្ម័នក្រោមសមុទ្រ ឬគម្រោង Nord Stream 2 នឹងត្រូវបញ្ចប់នាពេលឆាប់ៗ និងចាប់ផ្តើមបូមឧស្ម័នទៅប្រទេសអាល្លឺម៉ង់ ខណៈបច្ចុប្បន្នរដ្ឋបាលអាមេរិកថ្មី កំពុងស្វះស្វែងរកទំនាក់ទំនងល្អជាមួយ "ដៃគូសំខាន់ៗនៅអឺរ៉ុប"។
គួរបញ្ជាក់ផងដែរថា រដ្ឋបាលសហរដ្ឋអាមេរិក បានដាក់ទណ្ឌកម្មលើប្រទេសនេះជាបន្តបន្ទាប់ ដើម្បីព្យាយាមរារាំងគម្រោង ដែលនឹងដឹកជញ្ជូនឧស្ម័នដោយផ្ទាល់ពីប្រទេសរុស្ស៊ីទៅប្រទេសអាល្លឺម៉ង់ ដោយឆ្លងកាត់សម្ព័ន្ធមិត្តអ៊ុយក្រែនខាងលិចជាដើម។
ក្រុមហ៊ុន Gazprom របស់ប្រទេសរុស្ស៊ី (GAZP.MM) បានជំរុញការកសាងបំពង់បង្ហូរប្រេង ក្រោយត្រូវទទួលការដាក់ទណ្ឌកម្មពីសំណាក់សហរដ្ឋអាមេរិក និងបណ្ដាលឱ្យគម្រោងនេះដំណើរការទៅដោយមិនមានវត្តមានក្រុមហ៊ុនដាក់បំពង់លោកខាងលិច កាលពីចុងឆ្នាំ ២០១៩។ ក្រោយមក កាលពីខែមុន រដ្ឋបាលរបស់ប្រធានាធិបតីអាមេរិក Joe Biden បានសម្រេចលើកលែងការដាក់ទណ្ឌកម្មមួយចំនួនវិញ។
លោក Putin បានឱ្យដឹងថា៖ «ខ្ញុំគិតថា គម្រោងនេះគួរតែត្រូវបញ្ចប់ហើយ បើទោះជារដ្ឋបាលថ្មីរបស់សហរដ្ឋអាមេរិកខិតខំកសាងទំនាក់ទំនងល្អជាមួយដៃគូសំខាន់របស់យើងនៅអឺរ៉ុបក៏ដោយ។ តែសំណួរសួរថា កសាងទំនាក់ទំនងល្អយ៉ាងម៉េចបាន បើយើងធ្វើព្រងើយកន្ដើយពីផលប្រយោជន៍របស់គេអ៊ិញ្ចឹង? វាជាអំពើមិនសមហេតុសមផលសោះ»។
ប្រភពដដែលបានបន្តថា ប្រទេសរុស្ស៊ី បានបញ្ចប់ការដាក់បំពង់បង្ហូរសម្រាប់ខ្សែទីមួយ Nord Stream 2 ហើយ ដោយគ្រោងនឹងបញ្ចប់បំពង់ទី២ ក្នុងរយៈពេល២ខែទៀត។ លោក Alexander Novak ឧបនាយករដ្ឋមន្ត្រីរុស្ស៊ី បានថ្លែងថា នៅសល់ចម្ងាយតិចជាង ១០០ គីឡូម៉ែត្រទៀត មុននឹងបញ្ចប់គម្រោងនេះ»។
គួររំឭកផងដែរថា គម្រោងសាងសង់បំពង់បង្ហូរឧស្ម័ន Nord Stream 2 នេះ សាងសង់ឡើងដោយចំណាយថវិកាសរុប ប្រមាណជាង ១ម៉ឺនលានអឺរ៉ូ ហើយនឹងអនុញ្ញាតឱ្យប្រទេសរុស្ស៊ី អាចមានច្រកថ្មីមួយទៀត ក្នុងការនាំឧស្ម័នទៅលក់នៅអឺរ៉ុប។
មិនត្រឹមតែប៉ុណ្ណោះ គម្រោងនេះក៏នឹងក្លាយទៅជាការប្រកួតប្រជែងមួយ ជាមួយនឹងការដឹកជញ្ជូនឧស្ម័នធម្មជាតិរបស់សហរដ្ឋអាមេរិក ដែលលោក Biden ធ្លាប់បានពិពណ៌នាគម្រោងនេះថាជា «កិច្ចព្រមព្រៀងមិនល្អ» សម្រាប់ប្រទេសនៅអឺរ៉ុប៕