នាយករដ្ឋមន្រ្តីកាណាដាលោក Justin Trudeau បានអំពាវនាវដល់ព្រះវិហារកាតូលិកជាថ្មីម្តងទៀតឱ្យទទួលខុសត្រូវចំពោះការបង្ខំ និងអំពើរំលោភបំពានផ្សេងៗទៀតលើសិស្ស ដែលជាជនជាតិភាគតិចប្រមាណជាង ១៥ ម៉ឺននាក់ កន្លងមកនៅចន្លោះពីឆ្នាំ ១៨៣១ ដល់ឆ្នាំ ១៩៩៦។
ទោះជាយ៉ាងណា ព្រះវិហារកាតូលិក បានបដិសេធមិនសុំទោស និងទទួលខុសត្រូវចំពោះករណីទាំងនេះឡើយ ក្រោយមានការរកឃើញអដ្ឋិធាតុរបស់សិស្សជនជាតិភាគតិច ២១៥ នាក់នៅអតីតសាលាកាតូលិកមួយកាលពីខែមុន។
លោក Trudeau បានប្រាប់ប្រព័ន្ធផ្សព្វផ្សាយកាលពីថ្ងៃសុក្រថា៖ «ក្នុងនាមជាអ្នកកាន់សាសនាកាតូលិក ១ រូប ខ្ញុំមានការខកចិត្តយ៉ាងខ្លាំងចំពោះទង្វើរបស់ព្រះវិហារកាតូលិកដែលបានកើតឡើងនាពេលបច្ចុប្បន្ននេះ និងច្រើនឆ្នាំកន្លងមក” ។ យើងរំពឹងថា ព្រះវិហារនឹងបង្កើនការទទួលខុសត្រូវ ចំពោះទង្វើរបស់ខ្លួននៅក្នុងករណីនេះ»។
គួរបញ្ជាក់ផងដែរថា កុមារជនជាតិដើមភាគតិចជាង ១៥ ម៉ឺននាក់ ត្រូវបានគេបង្ខំឱ្យចាកចេញពីផ្ទះរបស់ពួកគេនៅចន្លោះឆ្នាំ ១៨៣១ និង ១៩៩៦ ហើយត្រូវបានគេដាក់នៅក្នុងសាលារៀន និងត្រូវទទួលរងការរំលោភបំពានផ្លូវកាយ និងផ្លូវភេទ និងកង្វះអាហារូបត្ថម្ភផងដែរ។
របាយការណ៍ឆ្នាំ ២០១៥ ពីគណៈកម្មការស្វែងរកការពិត (Truth and Reconciliation Commission ) បានហៅអំពើនេះថា ជា« អំពើប្រល័យពូជសាសន៍»។
សាលារៀនទាំងនេះ ត្រូវបានគ្រប់គ្រង ដោយរដ្ឋាភិបាល និងព្រះវិហារ ដែលភាគច្រើនជាអ្នកកាន់សាសនាកាតូលិក។ គោលបំណងក្នុងការបង្កើតសាលានេះឡើង គឺដើម្បីបង្រួបបង្រួមនិងផ្ដល់សិទ្ធិស្មើគ្នាដល់កុមារជនជាតិដើមភាគតិច។
គួរបញ្ជាក់ផងដែរថា កាលពីឆ្នាំ ២០០៨ រដ្ឋាភិបាលកាណាដា ក៏ធ្លាប់បានសុំទោសជាផ្លូវការ ចំពោះអ្វីដែលបានកើតឡើងនៅសាលារៀននោះផងដែរ។ ក្នុងអំឡុងពេលធ្វើទស្សនកិច្ចនៅឆ្នាំ ២០១៧ លោក Trudeau ក៏ធ្លាប់បានអំពាវនាវឱ្យព្រះវិហារនេះមានការទទួលខុសត្រូវ និងសុំទោសចំពោះអំពើរបស់ព្រះវិហារ ប៉ុន្តែមិនមានការឆ្លើយតបណាមួយឡើយមកដល់បច្ចុប្បន្ន។ លោក ក៏បានព្រមានថា នឹងប្រើវិធានការក្ដៅតាមផ្លូវច្បាប់ចំពោះព្រះវិហារនេះ ប្រសិនបើលោកនៅតែមិនទាន់ទទួលបានប្រតិកម្មណាមួយពីព្រះវិហារនេះ៕