ការរើសអើងអាយុនៅក្នុងឧស្សាហកម្មបច្ចេកវិទ្យានៅប្រទេសចិន មានលក្ខណៈស្រួចស្រាល់ ដោយនិយោជិតនៅក្នុងវិស័យនេះ ត្រូវបានគេកំណត់អាយុមិនឱ្យលើសពី ៣៥ ឆ្នាំ ដោយបានដាក់សម្ពាធដល់កម្មករវ័យចំណាស់ដែលធ្វើការនៅក្នុងឧស្សាហកម្មនេះ។
គោលបំណងនៃការទទួលយកនិយោជិតនៅវ័យក្មេង និងមានទេពកោសល្យរបស់ចិន គឺដើម្បីសម្រេចនូវបំណងប្រាថ្នារបស់ប្រទេសក្នុងការឈរជើងជាមេដឹកនាំពិភពលោកក្នុងវិស័យបច្ចេកវិទ្យា។ ប្រទេសចិន បានប្រើការជឿនលឿនផ្នែកបច្ចេកវិទ្យា ដើម្បីជំរុញសេដ្ឋកិច្ចរបស់ខ្លួនឆ្ពោះទៅមុខអស់រយៈពេលជាច្រើនទសវត្សរ៍មកហើយ ប៉ុន្តែមហិច្ឆតារបស់លោកប្រធានាធិបតី Xi Jinping នៅឆ្នាំ ២០២៥ គឺចង់ឃើញផលិតផលបច្ចេកវិទ្យាជាច្រើនមុខ រួមទាំងឧបករណ៍អេឡិចត្រូនិក និងបញ្ញាសិប្បនិម្មិតផលិតនៅប្រទេសចិន។
ហេតុដូចនេះហើយ គេសង្កេតឃើញមនុស្សជិត ២ ភាគ ៣ នៅក្នុងប្រទេសចិន ដែលមានអាយុលើសពី ៣៥ ឆ្នាំឡើងទៅ ត្រូវបានគេបញ្ឈប់ពីការងារ។ នេះបើយោងតាមរបាយការណ៍ ដែលបានចេញផ្សាយនៅក្នុងខែមករា ដោយមជ្ឈមណ្ឌលស្រាវជ្រាវអភិវឌ្ឍន៍នៃក្រុមប្រឹក្សារដ្ឋ ដោយផ្អែកលើទិន្នន័យ និងការស្ទង់មតិស្ដីពីការងារនៅប្រទេសចិន កាលពីខែមីនា ឆ្នាំមុន។
ជាក់ស្ដែងក្រុមហ៊ុនបច្ចេកវិទ្យាធំរបស់ចិន Huawei Technologies ក៏បានរកឃើញពីបញ្ហាដ៏ចម្រូងចម្រាសស្ដីពីការរើសអើងអាយុក្នុងឆ្នាំ ២០២០ ដែរដោយក្រុមហ៊ុននេះ បានបណ្តេញបុគ្គលិកប្រហែល ៧ ពាន់នាក់ ដែលភាគច្រើនមានអាយុប្រហែល ៣៥ ឆ្នាំ។
យោងតាមរបាយការណ៍ដែលបានចេញផ្សាយដោយក្រុមហ៊ុនជ្រើសរើសបុគ្គលិកតាមអ៊ីនធឺណិត Maimai កាលពីខែមីនា អាយុមធ្យមនៃនិយោជិតក្នុងចំណោមក្រុមហ៊ុនអ៊ីនធឺណិតទាំង ១៩ របស់ចិន គឺមានអាយុ ២៩,៦ ឆ្នាំ។ ដោយឡែកក្រុមហ៊ុន TikTok ByteDance និងក្រុមហ៊ុនយក្សអេឡិចត្រូនិក Pinduoduo ដែលជាក្រុមហ៊ុនវ័យក្មេងនៃបច្ចេកវិទ្យាធំរបស់ចិន ក៏មានទំនោរទទួលយកតែបុគ្គលិកវ័យក្មេងដែរ បើគិតជាអាយុជាមធ្យម គឺមានអាយុត្រឹមតែ ២៧ ឆ្នាំប៉ុណ្ណោះ។
បើទោះជាការរើសអើងអាយុនិយោជិតជារឿងខុសច្បាប់នៅក្នុងប្រទេសជាច្រើនលើពិភពលោកយ៉ាងណាក្ដី ប៉ុន្តែសម្រាប់ប្រទេសចិន មិនមែនជារឿងខុសច្បាប់ឡើយចំពោះប្រទេស ដែលកំពុងទទួលរងវិបត្តិវ័យចំណាស់កើនឡើងយ៉ាងឆាប់រហ័ស និងការធ្លាក់ចុះកម្លាំងពលកម្មក្រោយអនុវត្តគោលនយោបាយកូនទោលអស់ជាង ៣ ទសវត្សរ៍នេះ។
ទោះបីជាប្រទេសចិន ថ្មីៗនេះ ទើបតែកែប្រែគោលនយោបាយដោយអនុញ្ញាតឱ្យប្ដី ប្រពន្ធមានកូន ៣ ក្នុង ១ គ្រួសារក៏ដោយ ប៉ុន្តែអត្រាប្រជាជនអាយុមធ្យមរបស់ប្រទេសនេះ នៅតែត្រូវបានគេរំពឹងថា នឹងកើនឡើងខ្ពស់នៅប៉ុន្មានឆ្នាំខាងមុខនេះ។
ដោយសារតែចំនួនអាយុកាលមធ្យមនិយោជិតរបស់ប្រទេសនេះ កើនឡើងខ្លាំងចំពេលមានការរើសអើងអាយុនិយោជិតប្រជាជនជាច្រើនកំពុងមានមន្ទិលថា តើពេលណាទើបក្រុមហ៊ុនបច្ចេកវិទ្យាល្បីល្បាញនៅប្រទេសចិន ឱ្យលុបបំបាត់គោលការណ៍នេះចេញ។
យ៉ាងណាមិញដោយសារឧស្សាហកម្មបច្ចេកវិទ្យានៅចិនភាគច្រើនត្រូវពឹងផ្អែកលើកម្មករវ័យកណ្តាល ការធ្វើដូចនេះអាចនឹងបន្ថែមសម្ពាធដល់អាយុប្រជាជនចិនឱ្យជួបនឹង «វិបត្តិវ័យកណ្ដាល» ក្នុងជីវិតដែលអាចនឹងក្លាយទៅជាបញ្ហាថ្មីបន្ថែមទៀតក្នុងរយៈពេលវែងនៅពេលអនាគត៕