កាលពីថ្ងៃអាទិត្យ ទី ៦ មិថុនា នាយករដ្ឋមន្ត្រីអ៊ីស្រាអែលលោក Benjamin Netanyahu បាននិយាយថា រដ្ឋាភិបាលចម្រុះថ្មីបង្កើតដោយសម្ព័ន្ធភាពគូប្រជែងរបស់លោកដែលត្រៀមនឹងទម្លាក់លោកពីតំណែង គឺជាលទ្ធផលនៃ «ការក្លែងបន្លំការបោះឆ្នោតដ៏ធំបំផុត» ក្នុងប្រវត្តិសាស្ត្រលទ្ធិប្រជាធិបតេយ្យ។
ការចោទប្រកាន់ដែលមានលក្ខណៈប្រហាក់ប្រហែលនឹងការចោទប្រកាន់លើការបោះឆ្នោតអាមេរិកដោយអតីតប្រធានាធិបតី ដូណាល់ ត្រាំ ធ្វើឡើងខណៈភ្នាក់ងារសន្តិសុខផ្ទៃក្នុងរបស់អ៊ីស្រាអែលបាននិយាយថា អំពើហិង្សាអាចផ្ទុះឡើងនៅពេលដែលភាពតានតឹងនយោបាយឈានដល់កំពូល។
លោក Netanyahu បានប្រាប់សមាជិកសភានៃគណបក្សស្ដាំនិយម Likud របស់លោកថា៖ «យើងកំពុងមើលឃើញការក្លែងបន្លំការបោះឆ្នោតដ៏ធំបំផុតក្នុងប្រវត្តិសាស្ត្រប្រទេសនេះ ហើយបើតាមគំនិតរបស់ខ្ញុំ គឺដ៏ធំបំផុតនៅក្នុងប្រវត្តិសាស្ត្រនៃលទ្ធិប្រជាធិបតេយ្យ»។
លោកបានផ្ដោតការចោទប្រកាន់របស់លោកទៅលើការក្បត់សន្យាយុទ្ធនាការបោះឆ្នោតដោយលោក Naftali Bennett ដែលបានសន្យាថា នឹងមិនធ្វើជាដៃគូបង្កើតរដ្ឋាភិបាលជាមួយគណបក្សឆ្វេងនិយម គណបក្សកណ្ដាលនិយម និងគណបក្សជនជាតិអារ៉ាប់។
កាលពីថ្ងៃពុធសប្ដាហ៍មុន លោក Bennett បានប្រកាសចូលបង្កើតរដ្ឋាភិបាលជាមួយមេដឹកនាំបក្សប្រឆាំងលោក YairLapid ក្នុងសម្ព័ន្ធភាពនយោបាយមួយដែលគណបក្សចំនួន ៨ ដែលមាននិន្នាការខុសៗគ្នា ប៉ុន្តែស្របគ្នាលើការប្រឆាំងនឹងលោក Netanyahu។ ក្រោមកិច្ចព្រមព្រៀងចែករំលែកអំណាចលោក Bennett នឹងក្លាយជានាយករដ្ឋមន្ត្រីក្នុងការបណ្ដាក់វេនជាមួយលោក YairLapid។
លោក Netanyahu៖ «នោះហើយជាមូលហេតុដែលមនុស្សអាចមានអារម្មណ៍ថា ត្រូវបានគេបោកបញ្ឆោត ហើយពួកគេកំពុងឆ្លើយតបថា ពួកគេមិនត្រូវបិទមាត់ទេ»។
«យើង មិត្តភក្ដិខ្ញុំ និងខ្ញុំ នៅគណបក្ស Likud យើងនឹងប្រឆាំងយ៉ាងខ្លាំងចំពោះការបង្កើតរដ្ឋាភិបាលដ៏គ្រោះថ្នាក់នេះ ដែលបានមកពីការលួចបន្លំ និងការចុះចាញ់» លោក Netanyahu បាននិយាយបែបនេះ ហើយបន្តទៀតថា៖ «ហើយប្រសិនបើវាត្រូវបានបង្កើត យើងនឹងរុះរើវាយ៉ាងឆាប់រហ័ស»។
ប៉ុន្មានម៉ោងក្រោយពីការអត្ថាធិប្បាយរបស់លោក Netanyahu លោក Bennett បាននិយាយថា អ្នកនយោបាយជើងចាស់នេះ មិនគួរបន្សល់ទុកការខូចខាតដោយចេតនា និងទទួលយកថា «មនុស្សត្រូវបានអនុញ្ញាតឱ្យបង្កើតរដ្ឋាភិបាល បើទោះបីអ្នកមិនដឹកនាំវាក៏ដោយ»។
កាលពីថ្ងៃសៅរ៍លោក Nadav Argaman ប្រធានភ្នាក់ងារសន្តិសុខផ្ទៃក្នុងអ៊ីស្រាអែល Shin Bet បាននិយាយក្នុងសេចក្ដីថ្លែងការណ៍មួយថា៖ «ថ្មីៗនេះយើងបានរកឃើញការកើនឡើងនូវសុន្ទរកថា ហិង្សានិយម និងញុះញង់ដែលកាន់តែខ្លាំងឡើង ជាពិសេសនៅក្នុងបណ្ដាញសង្គម»។
លោកបានបន្តទៀតថា៖ «សុន្ទរកថាបែបនេះ អាចត្រូវបានក្រុម ឬបុគ្គលមួយចំនួនយល់ឃើញថា ជាការការអនុញ្ញាតឱ្យមានសកម្មភាពហិង្សា និងខុសច្បាប់ ដែលអាចបង្កអន្តរាយដល់រាងកាយផងដែរ»។
ក្រុមប្រឆាំងលោក Netanyahu បានយល់ឃើញថាសេចក្ដីថ្លែងការណ៍របស់លោក Argaman ថាជាការព្រមានដល់នាយករដ្ឋមន្ត្រីរូបនេះ។
«ខ្សែបន្ទាត់ គឺស្ដើងណាស់រវាងការរិះគន់នយោបាយ និងការញុះញង់ឱ្យមានអំពើហិង្សា» លោក Netanyahu បាននិយាយបែបនេះកាលពីថ្ងៃអាទិត្យ ហើយបន្តទៀតថា៖ «យើងមិនអាចនិយាយបានទេថា នៅពេលការរិះគន់មកពីខាងស្តាំ វាជាការញុះញង់ឱ្យមានអំពើហិង្សាហើយនៅពេលវាមកពីខាងឆ្វេងវា គឺជាការប្រើសិទ្ធិសេរីភាពក្នុងការបញ្ចេញមតិទេ»។
លោកបន្ថែមទៀតថា៖ «ខ្ញុំសូមថ្កោលទោសរាល់ការញុះញង់ឱ្យមានអំពើហិង្សា»។
យ៉ាងណាមិញលោក Lapid និងលោក Bennett បានជោគជ័យក្នុងការប្រមូលផ្ដុំសំឡេងគ្រប់គ្រាន់សម្រាប់ការបង្កើតរដ្ឋាភិបាលបន្ទាប់ពីលោក Netanyahu បានបរាជ័យ បើទោះបីជាបក្សលោកមានអាសនៈច្រើនជាងគេក្នុងសភា។ នេះជាការបោះឆ្នោតលើកទី៤ ក្នុងរយៈពេល ២ ឆ្នាំចុងក្រោយនេះ ចាប់តាំងពីវិបត្តិជាប់គាំងនយោបាយឆ្នាំ ២០១៩។
ដំណាក់កាលចុងក្រោយនៃការបង្កើតរដ្ឋាភិបាល គឺការបោះឆ្នោតអនុម័តដោយសភា Knesset។ កាលបរិច្ឆេទនៃការបោះឆ្នោតក្នុងសភា គឺមិនទាន់កំណត់នៅឡើយ៕