អ្នកនយោបាយគណបក្សប្រឆាំងរុស្ស៊ី លោក Dmitry Gudkov បាននិយាយកាលពីថ្ងៃអាទិត្យថា លោកបានចាកចេញពីប្រទេសរុស្ស៊ី ក្រោយទទួលបានការព្រមានពីសំណាក់មនុស្សជិតស្និទ្ធនឹងវិមានក្រឹមឡាំងថា នឹងចាប់ខ្លួនលោក ប្រសិនបើលោកបន្តស្នាក់នៅក្នុងប្រទេសនេះទៀត។
អតីតសមាជិកសភារុស្ស៊ី លោក Dmitry Gudkov អាយុ ៤១ ឆ្នាំ ធ្លាប់ត្រូវបានឃុំខ្លួន ដោយមន្រ្តីអនុវត្តច្បាប់រុស្ស៊ីកាលពីថ្ងៃ អង្គារ ដោយចោទប្រកាន់ថា លោកមិនបានសងបំណុលលើទ្រព្យសម្បត្តិ ដែលលោកជួល។
លោកត្រូវបានគេដោះលែងពីមន្ទីរឃុំឃាំងកាលពីថ្ងៃព្រហស្បតិ៍ ប៉ុន្តែនៅតែត្រូវបានគេចាត់ទុកជាជនសង្ស័យក្នុងករណីព្រហ្មទណ្ឌដដែល។ ក្រុមអ្នកប្រឆាំងវិមានក្រឹមឡាំង ដែលភាគច្រើនជាសម្ព័ន្ធមិត្តរបស់អ្នករិះគន់វិមានក្រឹមឡាំងលោក Alexei Navalny បានភៀសខ្លួនចេញពីប្រទេស ដោយសារតែការបង្ក្រាបចុងក្រោយបង្អស់ទៅលើក្រុមប្រឆាំងទាក់ទិននឹងករណីប្រមូលផ្តុំគ្នានៅតាមដងផ្លូវ ដើម្បីទាមទារឱ្យមានការដោះលែងលោក Navalny ។
លោក Gudkov បាននិយាយថាគោលបំណងពិតនៃការគំរាមចាប់ខ្លួនលោកនោះ គឺដើម្បីរារាំងលោក ពីការបោះឆ្នោតសភានៅខែ កញ្ញា ខាងមុខប៉ុណ្ណោះ។ ផ្ទុយទៅវិញ វិមានក្រឹមឡាំង បាននិយាយថា ការចាប់ខ្លួនអ្នកនយោបាយនាពេលថ្មីៗនេះ រួមទាំងលោក Dmitry Gudkov ផងនោះ គឺមិនមានអ្វីទាក់ទងនឹងនយោបាយទេ ហើយលោកក៏បានបដិសេធព្យាយាមជីកស្មៅទាំងឫសលើគូប្រជែងនយោបាយរបស់ខ្លួនដែរ។
លោក Gudkov ក៏បានប្រាប់សារព័ត៌មាន Reuters កាលពីថ្ងៃ អាទិត្យថា លោកនឹងធ្វើការសម្រេចចិត្តនៅពេលក្រោយស្ដីអំពីផែនការបន្ថែមរបស់លោកនៅថ្ងៃខាងមុខ៕