.jpg)
អតីតប្រធានាធិបតីអាមេរិកលោក ដូណាល់ ត្រាំ ថ្លែងក្នុងសន្និសីទប្រចាំនាពេលកន្លងទៅ។ AFP
អតីតប្រធានាធិបតីអាមេរិកលោក Donald Trump បាននិយាយថា រូបិយប័ណ្ណអេឡិចត្រូនិក Bitcoin ថា ជារូបិយប័ណ្ណបោកប្រាស់និងអាចគំរាមគំហែងដល់ប្រាក់ដុល្លារអាមេរិក នៅក្នុងបទសម្ភាសមួយទៅកាន់បណ្តាញសារព័ត៌មាន Fox កាលពីថ្ងៃចន្ទ កន្លងទៅ។
លោក Trump បាននិយាយថា៖ «ខ្ញុំមើលទៅរូបិយប័ណ្ណ Bitcoin ដូចជាការឆបោក។ ខ្ញុំមិនចូលចិត្តទេ ព្រោះវាជារូបិយប័ណ្ណមួយផ្សេងទៀត កំពុងប្រកួតប្រជែងនឹងប្រាក់ដុល្លារ ... ខ្ញុំចង់ឱ្យប្រាក់ដុល្លារជារូបិយប័ណ្ណរបស់ពិភពលោកដូចដែលអ្វីខ្ញុំនិយាយជារឿយៗកន្លងមក»។
រូបិយប័ណ្ណអេឡិចត្រូនិកធំបំផុតមួយនេះ បានធ្លាក់ចុះស្ទើរតែ ៦ភាគរយសម្រាប់ការជួញដូរនៅអាស៊ី និងមានតម្លៃប្រមាណ ៣២ ៧៧០ ដុល្លារ បើគិតត្រឹមម៉ោង ១១ ព្រឹកនៅហុងកុង។ នេះបើយោងតាមទីភ្នាក់ងារព័ត៌មាន Bloomberg។
តម្លៃរបស់ Bitcoin កំពុងបង្ហាញពីនិន្នាការធ្លាក់ចុះ ចាប់តាំងពីដើមខែឧសភា មកម្ល៉េះ ហើយនៅមិនទាន់បានងើបឡើងវិញនៅឡើយទេ បើគិតមកដល់បច្ចុប្បន្ន។ ក្នុងអំឡុងពេលប៉ុន្មានខែដំបូងនៃឆ្នាំនេះ រូបិយប័ណ្ណមួយនេះ បានកើនឡើងដល់ប្រមាណ ៦០ ០០០ ដុល្លារ។
ទោះយ៉ាងណាក្ដី ការធ្វើអត្ថាធិប្បាយរបស់លោក Trump ទាក់ទិននឹងរូបិយប័ណ្ណ Bitcoin មួយនេះ ធ្វើឡើងស្របពេល ដែលប្រធានាធិបតីលោក Elibel Bukele នៃប្រទេស El Salvador សម្រេចប្រើរូបិយប័ណ្ឌ Bitcoin ជាផ្លូវការសម្រាប់ការដេញថ្លៃស្របច្បាប់ ដែលបណ្តាលឱ្យមានការព្រួយបារម្ភពីមូលនិធិរូបិយវត្ថុអន្តរជាតិ (IMF)។
ផ្ទុយស្រឡះពីសេចក្តីថ្លែងការណ៍លោក Trump លោក Neil Wilson ប្រធានអ្នកវិភាគទីផ្សារសម្រាប់ Markets.com បាននិយាយថា Bitcoin មិនមែនជារូបិយប័ណ្ណពិតទេ ហើយក៏មិនអាចគំរាមកំហែងដល់ប្រាក់ដុល្លារដែរ៕
