យោងតាមសារព័ត៌មាន CNN ខ្សែរអាត់សំឡេង រវាងទីប្រឹក្សារបស់អតីតប្រធានាធិបតីអាមេរិក លោក Rudy Giuliani បានដាក់សម្ពាធទៅលើរដ្ឋាភិបាលអ៊ុយក្រែននៅឆ្នាំ ២០១៩ ដើម្បីស៊ើបអង្កេតការសន្មតដោយគ្មានមូលដ្ឋានទៅលើលោក Joe Biden។
សំឡេងនេះ គឺជាការហៅតាមទូរស័ព្ទនៅខែកក្កដា ឆ្នាំ ២០១៩ រវាងលោក Giuliani អ្នកការទូតអាមេរិកលោក Kurt Volker និងលោក Andriy Yermak ទីប្រឹក្សាជាន់ខ្ពស់របស់ប្រធានាធិបតីអ៊ុយក្រែន។
ការសន្ទនាតាមទូរស័ព្ទនេះគឺនៅមុនពេលលោក Trump បាននិយាយជាមួយប្រធានាធិបតីអ៊ុយក្រែន លោក Volodymyr Zelensky ហើយការសន្ទនារវាងភាគីទាំង ២ ក្រោយមកក្លាយជាផ្នែកសំខាន់នៃការចោទប្រកាន់ដំបូងរបស់លោក Trump ដែលលោកត្រូវបានគេចោទប្រកាន់ថា បានស្នើសុំជំនួយអ៊ុយក្រែនសម្រាប់យុទ្ធនាការបោះឆ្នោតរបស់លោក។
ក្នុងអំឡុងពេលនៃការសន្ទនាតាមទូរស័ព្ទប្រហែល ៤០ នាទីលោក Giuliani បានប្រាប់ម្តងហើយម្តងទៀតដល់លោក Yermak ថាលោក Zelensky គួរតែប្រកាសជាសាធារណៈនូវការស៊ើបអង្កេតលើអំពើពុករលួយដែលអាចកើតមានឡើងដោយលោក Biden នៅប្រទេសអ៊ុយក្រែន។
បន្ថែមពីនេះលោកបានអះអាងថា អ៊ុយក្រែនបានជ្រៀតជ្រែកក្នុងការបោះឆ្នោតឆ្នាំ ២០១៦ ដើម្បីធ្វើឱ្យប៉ះពាល់ដល់លោក Trump។ ការអះអាងទាំង ២ នេះមិនមានអំណះអំណាងពិតនោះទេ។
យោងទៅតាម ការស្រង់សម្តីរបស់ CNN ខ្សែអាត់សំឡេងនោះបានបង្ហាញថា៖ «អ្វីដែលយើងត្រូវការពីប្រធានាធិបតីអ៊ុយក្រែនគឺចង់ឱ្យលោកនិយាយថា ខ្ញុំនឹងដាក់រដ្ឋអាជ្ញាស្មោះត្រង់ម្នាក់ទទួលបន្ទុកទៅលើការស៊ើបអង្កេត និងរកភ័ស្តុតាងដែលមានហើយមានភ័ស្តុតាងផ្សេងទៀតដែលពាក់ព័ន្ធនឹងការបោះឆ្នោតឆ្នាំ ២០១៦»។
នេះបើយោងតាមការស្រង់សម្តីរបស់សារព័ត៌មាន CNN លោក Giuliani បាននិយាយទៀតថាទំនាក់ទំនងការទូតរវាងសហរដ្ឋអាមេរិក និងអ៊ុយក្រែន នឹងកាន់តែប្រសើរឡើង ប្រសិនបើលោក Zelensky ចាប់ផ្តើមស៊ើបអង្កេតទៅលើរឿងនេះ។
លោក Giuliani និង Volker បានលើកឡើងក្នុងពេលសន្ទនាថា ការប្រកាសជាសាធារណៈអាចលុបចោលផ្លូវសម្រាប់ដំណើរទស្សនកិច្ចដែលលោក Zelensky ចង់ទៅសហរដ្ឋអាមេរិកឬសម្រាប់ការប្រជុំផ្ទាល់ជាមួយ Giuliani។
ការសន្ទនានេះ គឺជាផ្នែកមួយដែលលោក Trump និងសម្ព័ន្ធមិត្តរបស់លោកព្យាយាមបង្ខូចលោក Biden និងបង្វែរដំណើរការបោះឆ្នោតឆ្នាំ ២០២០ ដោយសុំការជ្រៀតជ្រែកពីបរទេសការនិយាយកុហកអំពីការលួចបន្លំសន្លឹកឆ្នោតការញុះញង់ឱ្យ មានវាយប្រហារនៅអគារកាពីតូលកាលពីថ្ងៃទី ៦ មករា៕