កាសែត The Wall Street Journal បានចុះផ្សាយកាលពីថ្ងៃចន្ទ ទី ៧ មិថុនា មិ្សលមិញថា របាយការណ៍មួយស្តីពីប្រភពដើមនៃជំងឺកូវីដ ១៩ រៀបចំដោយមន្ទីរពិសោធន៍ជាតិរបស់រដ្ឋាភិបាលអាមេរិកបានសន្និដ្ឋានថា សម្មតិកម្មដែលអះអាងថា វីរុសកូរ៉ូណាបានលេចចេញពីមន្ទីរពិសោធន៍ចិននៅ Wuhan គឺអាចជឿទុកចិត្តបានហើយសមនឹងទទួលបានការស៊ើបអង្កេតបន្ថែមទៀត។
ការសិក្សានេះត្រូវបានរៀបចំឡើងនៅខែឧសភា ឆ្នាំ ២០២០ ដោយមន្ទីរពិសោធន៍ជាតិ Lawrence Livermore នៅរដ្ឋកាលីហ្វ័រនីញ៉ាហើយត្រូវបានបញ្ជូនដោយក្រសួងការបរទេសពេលដែលធ្វើការស៊ើបអង្កេតទៅលើប្រភពដើមនៃជំងឺរាតត្បាតក្នុងអំឡុងពេលប៉ុន្មានខែចុងក្រោយនៃរដ្ឋបាលរបស់លោកប្រធានាធិបតី ដូណាល់ ត្រាំ។
ការវាយតម្លៃរបស់ Lawrence Livermore នេះ បានធ្វើការវិភាគទៅលើហ្ស៊ែននៃវីរុសកូវីដ ១៩។ នេះបើតាម TheJournal ដដែល។
កាលពីខែមុន លោកប្រធានាធិបតី Joe Biden បាននិយាយថា លោកបានបញ្ជាឱ្យជំនួយដើម្បីរកចម្លើយចំពោះប្រភពដើមនៃវីរុសនេះ។ទីភ្នាក់ងារស៊ើបការណ៍សម្ងាត់អាមេរិកកំពុងពិចារណាលើសេណារីយោ ២ ដែលថា វីរុសកូរ៉ូណាអាចបណ្តាលមកពីការថ្លោះថ្លោយនៃមន្ទីរពិសោធន៍ ឬថា វាបានផុសចេញពីការប៉ះពាល់របស់មនុស្សជាមួយសត្វដែលឆ្លងជំងឺ ប៉ុន្តែទីភ្នាក់ងារនេះមិនបានសន្និដ្ឋានទេ។
ប្រភពព័ត៌មានពីរដ្ឋា ភិបាលអាមេរិកបាននិយាយថា របាយការណ៍ស៊ើបការណ៍សម្ងាត់របស់សហរដ្ឋអាមេរិកដែលត្រូវបានចែកចាយក្នុងអំឡុងពេលរដ្ឋបាលរបស់ត្រាំបានចោទប្រកាន់ថា អ្នកស្រាវជ្រាវ ៣ នាក់ នៅវិទ្យាស្ថានវ៉ូហានរបស់ប្រទេសចិន បានធ្លាក់ខ្លួនឈឺខ្លាំងនៅក្នុងខែវិច្ឆិកា ឆ្នាំ ២០១៩ ដែលពួកគេបានស្វែងរកការព្យាបាលនៅមន្ទីរពេទ្យ។
មន្រ្តីសហរដ្ឋអាមេរិកបានចោទប្រកាន់ប្រទេសចិន ថា ខ្វះតម្លាភាពលើប្រភពដើមនៃវីរុសនេះ ប៉ុន្តែការចោទប្រកាន់នេះត្រូវបានក្រុងប៉េកាំងបដិសេធដោយថា ខ្លួនតែងតែធ្វើសកម្មភាពប្រកបដោយតម្លាភាពនិងទទួលខុសត្រូវ៕
ហួន ឌីណា