.jpg)
នាយកប្រតិបត្តិនអង្គការ UNAIDS លោកស្រី Winnie Byanyima។ AFP
កាលពីថ្ងៃអង្គារ ទី ៨ មិថុនា មហាសន្និបាតអង្គការសហប្រជាជាតិ បានអនុម័តសេចក្ដីប្រកាសមួយ ដើម្បីបញ្ចប់ជំងឺអេដស៍ ជាការគំរាមកំហែងសុខភាពសាធារណៈត្រឹមឆ្នាំ ២០៣០ បន្ទាប់ពីរុស្ស៊ី បានបរាជ័យក្នុងការកែប្រែពាក្យពេចន៍នៃសេចក្ដីប្រកាស ដែលពួកគេព្រួយបារម្ភថា អាចនឹងជំរុញប្រទេសនានាឱ្យលើកលែងឧក្រិដ្ឋកម្មពេស្យាចារនិងការប្រើប្រាស់គ្រឿងញៀន។
មហាសន្និបាតបានបោះឆ្នោតគាំទ្រ ១៦៥ និង ៤ ប្រឆាំងនឹងការអនុម័តសេចក្ដីប្រកាសនេះ ហើយការព្យាយាមធ្វើវិសោធនកម្មពាក្យពេចន៍នៅនាទីចុងក្រោយដោយរុស្ស៊ី ត្រូវបានបដិសេធ។
បេសកកម្មរុស្ស៊ីប្រចាំអង្គការសហប្រជាជាតិបានប្រាប់មហាសន្និបាតថា នៅក្រោមគម្របនៃការប្រយុទ្ធប្រឆាំងការរើសអើង កថាខណ្ឌជាច្រើនបាន «ព្យាយាមជ្រៀតជ្រែកក្នុងច្បាប់ជាតិ ដោយការរុះរើអ្វីដែលគេហៅថាច្បាប់រឹតត្បិតនិងរើសអើង»។
ឯកអគ្គរដ្ឋទូតរងរុស្ស៊ីប្រចាំអង្គការសហប្រជាជាតិលោក Dmitry Chumakov បាននិយាយថា៖ «ដូចដែលយើងឃើញក្នុងយុទ្ធសាស្ត្រជំងឺអេដស៍ពិភពលោក ២០២១ ដល់ ២០២៦។ អង្គការ UNAIDS ចាត់ទុក្ខច្បាប់ទាំងនេះរួមបញ្ចូលច្បាប់ដែលរើសអើងពេស្យាចារ និងការប្រើប្រាស់គ្រឿងញៀន»។
ឯកអគ្គរដ្ឋទូតអូស្ត្រាលីប្រចាំអង្គការសហប្រជាជាតិលោក Mitch Fifield ដែលដឹកនាំការចរចាសេចក្ដីប្រកាសនេះ ជាមួយប្រទេសណាមីប៊ី បានច្រានចោលការអះអាងរបស់រុស្ស៊ី ដោយនិយាយថា៖ «ការធ្វើកំណែទម្រង់ច្បាប់ និងគោលនយោបាយ ដើម្បីធានាថា មានមូលដ្ឋានផ្អែកលើភ័ស្តុតាង និងសិទ្ធិមនុស្ស គឺចាំបាច់សម្រាប់ការឆ្លើយតបនឹងជំងឺអេដស៍ប្រកបដោយប្រសិទ្ធភាព»។
នាយកប្រតិបត្តិអង្គការ UNAIDS លោកស្រី Winnie Byanyima បានប្រាប់មហាសន្និបាតថា ជំងឺអេដស៍គឺក្នុងចំណោមជំងឺរាតត្បាតសាហាវបំផុតក្នុងសម័យបច្ចុប្បន្ន ដែលមានមនុស្ស ៧៧,៥ លាននាក់បានឆ្លងជំងឺអេដស៍ ខណៈមនុស្សជិត ៣៥ លាននាក់បានស្លាប់ ហើយជាមួយនឹងការរីករាលដាលជំងឺកូវីដ១៩ ជំងឺអេដស៍ អាចមានការងើបឡើងវិញ៕
