រដ្ឋាភិបាលចិនកំពុងពន្លឿនការអភិវឌ្ឍទ្វេដងលើការចែកចាយប្រព័ន្ធទិន្នន័យ តាមរយៈការធ្វើទំនើបកម្មលើ «ប្រព័ន្ធឧស្សាហកម្មជឿនលឿន blockchain» ខណៈដែលប្រទេសនេះកំពុងប្រឹងប្រែងសម្រេចនូវមហិច្ឆតានាំមុខក្នុងវិស័យបច្ចេកវិទ្យាក្នុងផែនការសេដ្ឋកិច្ចអភិវឌ្ឍនិងសង្គមកិច្ចរបស់ខ្លួនក្នុងឆាកអន្តរជាតិ។
នេះបើតាមឱ្យដឹងពីក្រសួងឧស្សាហកម្មនិងបច្ចេកវិទ្យាព័ត៌មានចិន (MIIT) និងគណៈកម្មការកិច្ចការ Cyberpaceដែលបានចេញផ្សាយគោលការណ៍ណែនាំកាលពីថ្ងៃចន្ទ កន្លងទៅក្នុងគោលបំណង«ពន្លឿនការប្រើប្រាស់បច្ចេកវិទ្យា blockchain និងការអភិវឌ្ឍឧស្សាហកម្ម»។
គោលការណ៍ណែនាំនេះ បានដាក់គោលដៅរយៈពេលវែង ក្នុងការបង្កើតក្រុមហ៊ុន blockchain និងកម្មវិធីដែលអាចផ្តល់អំណាចដល់វិស័យផ្សេងៗគ្នានៃសេដ្ឋកិច្ចរបស់ប្រទេសចិន ដែលជា ផ្នែកមួយនៃយុទ្ធសាស្ត្រឌីជីថលចិនរបស់ប្រធានាធិបតី Xi Jinping។
សេចក្ដីណែនាំដដែលនេះ ក៏មានរួមបញ្ចូលទាំងការប្រើប្រាស់បច្ចេកវិទ្យា blockchain ដើម្បីធ្វើឱ្យប្រសើរឡើងនូវសេវាសាធារណៈ ការពារកម្មសិទ្ធិបញ្ញាឌីជីថល និងបង្កើនតម្លាភាពក្នុងការចែករំលែកទិន្នន័យរបស់រដ្ឋាភិបាល និងការដាក់ចេញគោលការណ៍ប្រើប្រាស់ហិរញ្ញវត្ថុក្នុងស្រុកតាមរយៈបច្ចេកវិទ្យានេះផងដែរ។
ប្រភពដដែលនេះ សង្កត់ធ្ងន់លើភាពចាំបាច់នៃការដាក់ដាំផលិតផលបច្ចេកវិទ្យាក្នុងស្រុក ដើម្បីយកទៅ ប្រកួតប្រជែងជាសកលក៏ដូចជាសារៈសំខាន់បច្ចេកវិទ្យា blockchain ចំពោះសេដ្ឋកិច្ចជាក់ស្តែង រួមមាន ការគ្រប់គ្រងខ្សែចង្វាក់ផ្គត់ផ្គង់ការតាមដានផលិតផលនិងការចែករំលែកទិន្នន័យនិងសេវាកម្មសាធារណៈ ដូចជាឯកសារអត្តសញ្ញាណការចុះឈ្មោះទ្រព្យសម្បត្តិនិងវិស័យអប់រំនិង ការគ្រប់គ្រងទិន្នន័យថែទាំសុខភាពជាដើម។
ដើម្បីអនុវត្តគោលការណ៍ណែនាំនេះទៅបាន រដ្ឋាភិបាលមូលដ្ឋានត្រូវផ្តល់ការគាំទ្រទាំងផ្នែកនយោបាយ និងសេដ្ឋកិច្ច ដែលនេះក៏រួមបញ្ចូលទាំងការកសាងសួនឧស្សាហកម្ម blockchain ការផ្តល់អត្ថប្រយោជន៍ពន្ធសម្រាប់ការចាប់ផ្តើមអាជីវកម្ម blockchain និងបង្កើនមូលនិធិ ដើម្បីជំរុញជំនាញ និងទេពកោសល្យនៅក្នុងវិស័យបច្ចេកវិទ្យា blockchain ផងដែរ។
អត្ថបទចេញពីគេហទំព័រ The Block ស្ដីអំពីបច្ចេកវិទ្យា បានឱ្យដឹងថា គោលការណ៍ ដែលទើបនឹងដាក់ចេញនេះ រដ្ឋាភិបាលចិនទំនងជាងាកទៅរកការពន្លឿនបច្ចេកវិទ្យា blockchain ជាជាងរូបិយបណ្ណឌីជីថល ឬ crypto (yes-blockchain-no-crypto)។ គោលការណ៍ថ្មីនេះ ធ្វើឡើងក្រោយមានមតិយោបល់ថ្មីៗ ដែលបានលើកឡើងនៅក្នុងកិច្ចប្រជុំគណៈកម្មាធិការកណ្តាលរបស់រដ្ឋាភិបាលស្ដីអំពីការបង្ក្រាបលើការធ្វើពាណិជ្ជកម្ម bitcoin និងសកម្មភាពរុករករ៉ែ bitcoin។
លោក Gao Chengshi អ្នកជំនាញក្នុងវិស័យ crypto និងជាដៃគូស្ថាបនិកក្រុមហ៊ុនព័ត៌មានបច្ចេកវិទ្យា Hashvalue បាននិយាយថា៖ «ឧស្សាហកម្ម blockchain នៅទូទាំងពិភពលោកកំពុងជួយសម្រួលបញ្ហាពាណិជ្ជកម្ម ដូចជាការតាមដាន និងស្វែងរកភ័ស្តុតាងភាពជាម្ចាស់កម្មសិទ្ធិបញ្ញាជាដើម នៅមិនទាន់ផ្ដល់ផលចំណេញច្រើន ដូចការរំពឹងទុកនៅឡើយទេ ព្រោះឧស្សាហកម្មនេះស្ថិតនៅក្នុងដំណាក់កាលដំបូងនៅឡើយ»។
ទោះយ៉ាងណាក្ដី ឧស្សាហកម្មនេះត្រូវបានគេរំពឹងថា នឹងរីកចម្រើនយ៉ាងលឿននៅក្នុងប្រទេសចិនជាងកន្លែងផ្សេងទៀតនៅក្នុងពិភពលោក។ ក្រុមហ៊ុនតាមដានទីផ្សារលើពិភពលោកIDC បានប៉ាន់ប្រមាណថា ឧស្សាហកម្មមួយនេះ កំពុងកើនឡើង ៥៤,៦ ភាគរយនៅប្រទេសចិន ជារៀងរាល់ឆ្នាំ និងអាចឈានដល់ ២,៥ ពាន់លានដុល្លារ នៅឆ្នាំ ២០២៥ លើសពីអត្រាមធ្យមពិភពលោក ដែលមានត្រឹម ៤៨ ភាគរយ ប៉ុណ្ណោះ។
គួរបញ្ជាក់ផងដែរថា បច្ចេកវិទ្យា Blockchain គឺជាបច្ចេកវិទ្យាបង្កើតឡើងដំបូងដើម្បីដោះដូរ និងបញ្ជាក់ភាពពិតប្រាកដរបស់រូបិយប័ណ្ណឌីជីថល Bitcoin ជាមូលដ្ឋាន និងធ្វើបញ្ជីគណនេយ្យមួយ ដែលមានទម្រង់ជាប្រព័ន្ធសំណុំកុំព្យូទ័រ មិនអាចកែប្រែបាន។
លោក Fan Long ស្ថាបនិកក្រុមហ៊ុន Conflux បានថ្លែងសុន្ទរកថា ស្ដីអំពីអត្ថប្រយោជន៍បច្ចេកវិទ្យា blockchain ដែលមានសារៈសំខាន់ជាងទីផ្សារទ្រព្យសម្បត្តិឌីជីថលផ្សេងទៀត និងចក្ខុវិស័យនៃបច្ចេកវិទ្យានេះ ដើម្បីស្របទៅតាមបច្ចេកវិទ្យាបច្ចុប្បន្ន។
លោកបានឱ្យដឹងថា៖ «គុណតម្លៃនៃបច្ចេកវិទ្យា blockchain គឺជាការជឿទុកចិត្ត។ ដរាបណា បច្ចេកវិទ្យានេះត្រូវបានគេប្រើប្រាស់ទូទាំងពិភពលោក និងគ្រប់វិស័យ ហើយបច្ចេកវិទ្យានឹងបង្កើនទំនាក់ទំនងផលិតកម្មឡើងវិញ និងបង្កើតមធ្យោបាយសម្រាប់ផលិតភាពកើនឡើង»។
លោកបានបន្តថា៖ «វានៅត្រូវការពេលវេលាយូរគួរសម សម្រាប់បញ្ជ្រាបបច្ចេកវិទ្យា blockchain នេះ ដល់សាធារណជនឱ្យយល់ច្បាស់។ក្រោយបច្ចេកវិទ្យានេះ ជ្រាបទៅដល់សង្គមគ្រប់ស្រទាប់ហើយ យើងអាចលើកកម្ពស់ប្រសិទ្ធភាពនៃការសម្របខ្លួននិងអនុវត្តនូវបច្ចេកវិទ្យាដែលកំពុងរីកចម្រើននេះ»៕