.jpg)
កាលពីថ្ងៃអង្គារ ទី ៨ មិថុនា សហរដ្ឋអាមេរិកបានប្រាប់អ៊ីរ៉ង់ថា ពួកគេត្រូវតែអនុញ្ញាតឱ្យទីភ្នាក់ងារនុយក្លេអ៊ែររបស់អង្គការសហប្រជាជាតិធ្វើការត្រួតលើសកម្មភាពពួកគេ ដូចដែលបានចែងនៅក្នុងកិច្ចព្រមព្រៀងមួយ ដែលត្រូវបានបន្តរហូតដល់ថ្ងៃទី ២៤ ខែមិថុនា បើមិនចង់ធ្វើឱ្យការចរចាស្ដារកិច្ចព្រមព្រៀងនុយក្លេអ៊ែរមានភាពស្មុគស្មាញ។
ក្នុងសេចក្ដីថ្លែងការណ៍មួយទៅកាន់គណៈអភិបាលនៃទីភ្នាក់ងារថាមពលបរមាណូអន្តរជាតិ (IAEA) សហរដ្ឋអាមេរិកបាននិយាយថា៖ «យើងលើកទឹកចិត្តឱ្យអ៊ីរ៉ង់ចៀសវាងរាល់សកម្មភាពដែលរារាំងការប្រមូល ឬចូលមើលព័ត៌មានដោយ IAEA ដែលចាំបាច់សម្រាប់វា ដើម្បីបង្កើតឡើងវិញនូវការយល់ដឹង»។
សេចក្ដីថ្លែងការណ៍បានបន្តទៀតថា៖ «សកម្មភាពបែបនេះ យ៉ាងហោចណាស់នឹងបង្កភាពស្មុគស្មាញយ៉ាងខ្លាំងដល់កិច្ចខិតខំប្រឹងប្រែង ដែលកំពុងធ្វើឡើង ដើម្បីឈានទៅរកការយល់ដឹងអំពីវិធីដែលអ៊ីរ៉ង់ អាចវិលត្រឡប់ទៅរកការអនុលោមតាមការប្ដេជ្ញាក្នុង JCPOA (កិច្ចព្រមព្រៀងនុយក្លេអ៊ែរ) ជាថ្នូរនឹងការត្រឡប់ទៅរកការអនុលោមដោយអាមេរិក»។
IAEA និងអ៊ីរ៉ង់បានយល់ព្រមលើកិច្ចព្រមព្រៀងត្រួតពិនិត្យរយៈពេល ៣ ខែ កាលពីខែកុម្ភៈ បន្ទាប់ពីអ៊ីរ៉ង់សម្រេចកាត់បន្ថយកិច្ចប្រតិបត្តិការជាមួយភ្នាក់ងារនេះ កាលពីដើមឆ្នាំ។ កិច្ចព្រមព្រៀងនេះបានផុតកំណត់កាលពីខែឧសភា ប៉ុន្តែភាគីទាំង ២ បានយល់ព្រមបន្តរហូតដល់ថ្ងៃទី ២៤ មិថុនា ខណៈពេលអ៊ីរ៉ង់ធ្វើការចរចាដោយប្រយោលជាមួយអាមេរិកនៅទីក្រុងវីយែន ប្រទេសអូទ្រីស ដើម្បីរកផ្លូវសម្រាប់ប្រទេសទាំង ២ ត្រឡប់ទៅអនុលោមតាមកិច្ចព្រមព្រៀងនុយក្លេអ៊ែរ៕
