ស្ថាប័ននីតិប្បញ្ញត្តិកំពូលប្រទេសចិន គ្រោងនឹងត្រូវអនុម័តច្បាប់ប្រឆាំងនឹងការដាក់ទណ្ឌកម្មថ្មីមួយនៅថ្ងៃព្រហស្បតិ៍ សប្ដាហ៍នេះ ដើម្បីជាការគាំទ្រផ្នែកច្បាប់ និងការការពារយ៉ាងតឹងរ៉ឹងពីសកម្មភាពដាក់ទណ្ឌកម្មរបស់រដ្ឋាភិបាលលោកខាងលិចលើមន្ត្រី និងក្រុមហ៊ុនចិននានា។
ប្រព័ន្ធផ្សព្វផ្សាយរដ្ឋមួយ បានប្រកាសនៅយប់ថ្ងៃចន្ទ នូវវិធានការចុងក្រោយរបស់គណៈកម្មាធិការអចិន្រៃ្តយ៍នៃសភាតំណាងប្រជាជនទូទាំងប្រទេសចិន ដើម្បីប្រឆាំងនឹងសហរដ្ឋអាមេរិក ក៏ដូចជាសម្ព័ន្ធមិត្តប្រទេសនេះ ដែលបានដាក់ទណ្ឌកម្មលើទីក្រុងប៉េកាំង ជុំវិញបញ្ហាដូចជា សេរីភាពរបស់ហុងកុង និងបញ្ហារំលោភសិទ្ធិមនុស្សលើជនជាតិភាគតិចអ៊ុយហ្គ័រនៅតំបន់ស៊ីនជាំងផងដែរ។
ទូរទស្សន៍ចិន CCTV បានរាយការណ៍ថា ច្បាប់ថ្មីនេះមានគោលបំណងផ្តល់នូវមូលដ្ឋានច្បាប់សម្រាប់រដ្ឋាភិបាលកណ្តាល ដើម្បីចាត់វិធានការសងសឹកប្រឆាំងនឹងទណ្ឌកម្មបរទេស ប៉ុន្តែមិនបានបញ្ចេញពីខ្លឹមសារលម្អិតនៃច្បាប់នេះឡើយ។
ការសម្រេចឱ្យមានការអនុម័តច្បាប់នេះ ធ្វើឡើងក្រោយពេលប្រទេសចិន បានដាក់ចេញច្បាប់ថ្មីកាលពីដើមឆ្នាំនេះ ក្នុងគោលបំណងប្រឆាំងនឹងអ្វីដែលហៅថា សកម្មភាពមិនសមហេតុផលរបស់បរទេសក្នុងការប្រឆាំងនឹងពលរដ្ឋក៏ដូចជា ក្រុមហ៊ុនចិនផងដែរ។
វិធានការថ្មីនេះ ត្រូវបានគេបង្ហើបកាលពីខែមករា ឆ្នាំនេះ ឬមានឈ្មោះពេញហៅថា វិធានស្តីពីការប្រឆាំងនឹងការអនុវត្តវិសោធនកម្មក្រៅច្បាប់ដែលមិនសមហេតុផលនៃច្បាប់បរទេស ត្រូវបានគេមើលឃើញថា ជាការឆ្លើយតបដ៏រឹងមាំ ចំពោះការដាក់ទណ្ឌកម្មពីសំណាក់ទីក្រុងវ៉ាស៊ីនតោន។
យ៉ាងណាមិញក្រុមអ្នកវិភាគយល់ថា ច្បាប់នេះនៅខ្វះព័ត៌មានលម្អិតនៅឡើយ ហើយពួកគេមិនរំពឹងថា ករណីអនុវត្តសាកល្បងនឹងអាចលេចចេញជាបន្ទាន់ភ្លាមៗនោះទេ។
សេចក្តីប្រកាសពីច្បាប់ថ្មីកាលពីថ្ងៃចន្ទ គឺធ្វើឡើងក្នុងគោលបំណងផ្តល់ភាពស្របច្បាប់ដល់ការទប់ស្កាត់នូវសកម្មភាពនានា ដែលអនុញ្ញាតឱ្យភាគីរងគ្រោះ រាយការណ៍អំពីការខូចខាតទៅក្រសួងពាណិជ្ជកម្ម និងប្តឹងទាមទារសំណងនៅតុលាការចិន។
គួរបញ្ជាក់ផងដែរថា ក្រុមហ៊ុនចិនមួយចំនួនត្រូវបានអាមេរិកកំណត់គោលដៅក្នុងនោះ មានក្រុមហ៊ុនទូរគមនាគមន៍យក្ស Huawei ផងដែរ។
ទន្ទឹមនឹងនេះដែរ លោកស្រី Carrie Lam Cheng Yuetngor មេដឹកនាំហុងកុង កាលពីថ្ងៃអង្គារ ក៏បានសម្ដែងការគាំទ្រនឹងច្បាប់នេះ ដោយបានលើកឡើងអំពីបទពិសោធផ្ទាល់របស់ហុងកុង និងបានហៅច្បាប់នេះថា ជាការ «ធ្វើឱ្យបរទេសស្គាល់ថ្នាំខ្លាំងម្ដង»។
លោកស្រីបានបន្តថា៖ « រដ្ឋាភិបាលហុងកុងធ្លាប់មានបទពិសោធផ្ទាល់ទាក់ទងនឹងសកម្មភាពដាក់ទណ្ឌកម្មទាំងនេះ ហើយយើងក៏ស្វាគមន៍ ចំពោះការអនុវត្តនូវវិធានការ បែបនេះផងដែរ។ ខ្ញុំជឿថា ជនជាតិចិនណា ដែលគាំទ្រអធិបតេយ្យភាព សេចក្តីថ្លៃថ្នូរ និងផលប្រយោជន៍ស្នូលនៃប្រទេសរបស់យើងគួរតែមានឱកាសសងសឹកវិញ»។
ក្នុងប៉ុន្មានខែថ្មីៗនេះ សហគមន៍អឺរ៉ុប សហរដ្ឋអាមេរិក កាណាដា និងអង់គ្លេស ក៏បានដាក់ទណ្ឌកម្មដល់មន្រ្តី និងអង្គភាពរបស់ចិនលើអ្វីដែលពួកគេហៅថា គោលនយោបាយរបស់ក្រុងប៉េកាំង គាបសង្កត់ប្រឆាំងនឹងពលរដ្ឋអ៊ុយហ្គ័រ នៅតំបន់ស៊ីនជាំង។
ទោះជាយ៉ាងណាក្ដីគណៈកម្មាធិការអចិន្ត្រៃយ៍នៃសភាតំណាងប្រជាជនទូទាំងប្រទេសចិន នឹងធ្វើការកែសម្រួល និងកែលម្អពាក្យពេចន៍ខ្លះនៅក្នុងសេចក្តីព្រាងច្បាប់ស្តីពីការប្រឆាំងទណ្ឌកម្មបរទេស ដោយផ្អែកលើការពិចារណារបស់គណៈកម្មាធិការ ក៏ដូចជាមតិយោបល់ពីវិស័យផ្សេងៗ និងបានបញ្ជូនរបាយការណ៍ស្តីពីលទ្ធផលនៃការពិភាក្សា និងសេចក្តីព្រាងអំណានលើកទី២ នេះ ទៅសម័យប្រជុំលើកទី២៩ នៅថ្ងៃខាងមុខផងដែរ៕