.jpg)
ប្រទេសនៅឈូងសមុទ្រពែរ្ស៍ អារ៉ាប៊ី សាអ៊ូឌីត និងអេមីរ៉ាតអារ៉ាប់រួម បានយល់ព្រមដោយអស់ជម្រើស នឹងការស្ដារកិច្ចព្រមព្រៀងនុយក្លេអ៊ែរអ៊ីរ៉ង់ ២០១៥ ដែលពួកគេប្រឆាំង ហើយបានបើកទំនាក់ទំនងជាមួយទីក្រុងតេអេរ៉ង់ ដើម្បីគ្រប់គ្រងភាពតានតឹង ខណៈពេលដែលបញ្ចុះបញ្ចូលឱ្យមានការពិភាក្សានាពេលអនាគត ដើម្បីយកចិត្តទុកដាក់លើបញ្ហាសន្តិសុខរបស់ពួកគេ។
លោក Abdulaziz Sager នៃមជ្ឈមណ្ឌលស្រាវជ្រាវឈូងសមុទ្រ ដែលបានចូលរួមយ៉ាងសកម្មនៅក្នុងកិច្ចពិភាក្សាក្រៅផ្លូវការរវាង អារ៉ាប៊ី សាអ៊ូឌីត និងអ៊ីរ៉ង់ បាននិយាយនៅសប្ដាហ៍នេះថា៖ «បណ្ដាប្រទេសឈូងសមុទ្រ បាននិយាយថា សហរដ្ឋអាមេរិកអាចត្រឡប់ទៅកិច្ចព្រមព្រៀងនុយក្លេអ៊ែរវិញ នេះគឺជាការសម្រេចរបស់ពួកគេ ដែលយើងមិនអាចផ្លាស់ប្ដូរបាន ប៉ុន្តែយើងត្រូវការឱ្យអ្នករាល់គ្នាគិតពីបញ្ហាសន្តិសុខក្នុងតំបន់»។
ប្រទេសមហាអំណាចពិភពលោក គឺកំពុងធ្វើការចរចានៅទីក្រុងវីយែន ទីស្នាក់ការអង្គការសហប្រជាជាតិប្រចាំប្រទេសអូទ្រីស ដើម្បីឱ្យអ៊ីរ៉ង់ និងអាមេរិកត្រឡប់ទៅអនុលោមតាមកិច្ចព្រមព្រៀងនុយក្លេអ៊ែរ ដែលដាក់កម្រិតលើកម្មវិធីនុយក្លេអ៊ែរអ៊ីរ៉ង់ ជាថ្នូរនឹងការលើកលែងទណ្ឌកម្ម។
រដ្ឋបាលអាមេរិកថ្មីរបស់ប្រធានាធិបតី ចូ បៃដិន ចង់ស្ដារកិច្ចព្រមព្រៀងឡើងវិញ ដែលក្រុងវ៉ាស៊ីនតោន បានបោះបង់ចោលក្រោមការដឹកនាំរបស់លោក ដូណាល់ ត្រាំ។ ប៉ុន្តែសម្ព័ន្ធមិត្តឈូងសមុទ្ររបស់វ៉ាស៊ីនតោន តែងតែនិយាយថា កិច្ចព្រមព្រៀងនេះ មិនមានលក្ខណៈគ្រប់គ្រាន់ក្នុងការដោះស្រាយបញ្ហាផ្សេងៗទៀត ដូចជាការនាំចេញមីស៊ីលដោយអ៊ីរ៉ង់ និងការគាំទ្រដល់ក្រុមឧទ្ទាមក្នុងតំបន់។ ពួកគេបានព្យាយាមទាមទារចូលរួមការចរចានៅក្រុងវីយែន ប៉ុន្តែត្រូវបានបដិសេដ។
ជាជាងរង់ចាំលទ្ធផលការចរចាក្រុងវីយែនណា អារ៉ាប៊ី សាអ៊ូឌីត បានទទួលការបោះជំហានដំបូងរបស់អ៊ីរ៉ាក់ក្នុងការចរចាជាមួយអ៊ីរ៉ង់ កាលពីខែមេសា។
