កាលពីថ្ងៃពុធ ទី ៩ មិថុនា ប្រធានាធិបតីសហរដ្ឋអាមេរិកលោក ចូ បៃដិន បានចាប់ផ្ដើមដំណើរទស្សនកិច្ចក្រៅប្រទេសដំបូងរបស់លោក តាំងពីចូលកាន់តំណែង ជាមួយនឹងការបញ្ជាក់ការប្ដេជ្ញាចិត្តចំពោះសម្ព័ន្ធមិត្តណាតូ (NATO) ហើយបានធ្វើការដាស់តឿនទៅប្រទេសរុស្ស៊ីថាពួកគេប្រឈមនឹងផលវិបាក «រឹងមាំនិងក្នុងទំហំធំ» ប្រសិនបើពួកគេចូលរួមក្នុងសកម្មភាពគ្រោះថ្នាក់។
ថ្លែងចំពោះទាហានអាមេរិកប្រមាណ ១ ០០០ នាក់ និងក្រុមគ្រួសាររបស់ពួកគេនៅឯមូលដ្ឋានទ័ពអាកាសអង់គ្លេសមួយ លោកបៃដិន បាននិយាយថា បាននិយាយថា លោកនឹងផ្តល់ខ្លឹមសារយ៉ាងច្បាស់ដល់ប្រធានាធិបតីរុស្ស៊ីលោក វ្ល៉ាឌីមៀរ ពូទីន នៅពេលដែលពួកគេជួបគ្នានៅសប្ដាហ៍ក្រោយ បន្ទាប់ពីកិច្ចប្រជុំកំពូលជាមួយមេដឹកនាំអង្គការណាតូ ក្រុមប្រទេស G7 និងមេដឹកនាំអឺរ៉ុប។
«យើងមិនស្វែងរកជម្លោះជាមួយរុស្ស៊ីទេ យើងចង់បានទំនាក់ទំនងដែលមានស្ថិរភាព និងអាចព្យាករបាន» លោក បៃដិន បាននិយាយបែបនេះនៅដើមនៃដំណើរទស្សនកិច្ចរយៈពេល ៨ ថ្ងៃរបស់លោក ហើយបន្តទៀតថា៖ «ប៉ុន្តែខ្ញុំបានបញ្ជាក់យ៉ាងច្បាស់ថា សហរដ្ឋអាមេរិកនឹងឆ្លើយតបតាមរបៀបដ៏រឹងមាំ និងក្នុងទំហំធំ ប្រសិនបើរដ្ឋាភិបាលរុស្ស៊ីចូលរួមក្នុងសកម្មភាពគ្រោះថ្នាក់»។
លោកបន្ថែមទៀតថា៖ «យើងបានបង្ហាញរួចហើយ។ ខ្ញុំនឹងបញ្ជូនសារថានឹងមានផលវិបាកចំពោះការបំពានអធិបតេយ្យភាព លទ្ធិប្រជាធិបតេយ្យនៅសហរដ្ឋអាមេរិក នៅអឺរ៉ុប និងនៅកន្លែងផ្សេងទៀត»។
លោក បៃដិន បាននិយាយថា លោកបានប្ដេជ្ញាចិត្តក្នុងការកសាងទំនាក់ទំនងអាត្លង់ទិចឡើងវិញ និងកែលម្អទំនាក់ទំនងជាមួយនឹងរុស្ស៊ី ពីរយៈពេល ៤ ឆ្នាំជាប់គាំង ក្រោមការគ្រប់គ្រងរបស់អតីតប្រធានាធិបតី ដូណាល់ ត្រាំ ដែលការធ្វើសង្គ្រាមពាណិជ្ជកម្ម និងការដកខ្លួនចេញពីកិច្ចព្រមព្រៀង និងស្ថាប័នអន្តរជាតិសំខាន់ៗជាច្រើន បានធ្វើឱ្យអាមេរិកមានទំនាក់ទំនងតានតឹងនៅជុំវិញពិភពលោក។
«នេះជាដំណើរទស្សនកិច្ចក្រៅប្រទេសលើកដំបូងរបស់ខ្ញុំក្នុងនាមជាប្រធានាធិបតីសហរដ្ឋអាមេរិក។ ខ្ញុំនឹងទៅកិច្ចប្រជុំ G7 បន្ទាប់មកកិច្ចប្រជុំណាតូ ហើយបន្ទាប់មកមកជួបជាមួយលោក ពូទីន ដើម្បីឱ្យលោកដឹងពីអ្វីដែលខ្ញុំចង់ឱ្យលោកដឹង» លោក បៃដិន បាននិយាយបែបនេះហើយបន្តទៀតថា៖ «នៅគ្រប់ចំណុចទាំងអស់នៃដំណើរទស្សនកិច្ច យើងនឹងធ្វើឱ្យវាកាន់តែច្បាស់ថា សហរដ្ឋអាមេរិក បានវិលត្រឡប់មកវិញ ហើយប្រទេសប្រជាធិបតេយ្យនៅលើពិភពលោក កំពុងឈររួមគ្នា ដើម្បីដោះស្រាយបញ្ហាលំបាកបំផុត និងបញ្ហាដែលសំខាន់បំផុតសម្រាប់អនាគតរបស់យើង»។
ការជួបប្រជុំដំបូងរបស់លោក បៃដិន គឺនៅភូមិមាត់សមុទ្រ St. Ives តំបន់ Cornwall ចក្រភពអង់គ្លេស។ កិច្ចប្រជុំកំពូល G7 នៅទីនោះគឺត្រូវបានគេរំពឹងថា នឹងពិភាក្សាអំពីការទូត វ៉ាក់សាំង ពាណិជ្ជកម្ម អាកាសធាតុ និងការកសាងហេដ្ឋារចនាសម្ព័ន្ធនៅប្រទេសកំពុងអភិវឌ្ឍន៍ ដោយមន្ត្រីអាមេរិកគិតថា ការដោះស្រាយបញ្ហាទាំងនេះ គឺជាមធ្យោបាយសម្រាប់ប្រកួតប្រជែងជាមួយចិន។
បន្ទាប់មកលោក បៃដិន នឹងធ្វើដំណើរទៅទីក្រុងប្រ៊ុចសែល ដើម្បីពិភាក្សាជាមួយមេដឹកនាំណាតូ និងសហភាពអឺរ៉ុប។ របៀបវារៈនៃកិច្ចប្រជុំទាំងនេះត្រូវបានគេរំពឹងថា នឹងគ្របដណ្ដប់លើប្រទេសរុស្ស៊ី ចិន និងបញ្ហាដែលមានអាយុច្រើនឆ្នាំ ក្នុងការធ្វើឱ្យសម្ព័ន្ធមិត្តណាតូចូលរួមវិភាគទានបន្ថែមទៀតដល់វិស័យការពាររួម។
ជំនួបកំពូលរបស់លោកជាមួយលោក ពូទីន នៅថ្ងៃទី ១៦ ខែមិថុនា នៅទីក្រុងហ្ស៊ឺណែវ គឺជាចំណុចសំខាន់បំផុតនៃដំណើរទស្សនកិច្ចនេះ ដែលជាឱកាសសម្រាប់អាមេរិកលើកឡើងអំពីការព្រួយបារម្ភដោយផ្ទាល់ជាមួយមេដឹកនាំរុស្ស៊ីអំពីបញ្ហាដូចជាការកើនឡើងការវាយប្រហារតាមអ៊ីនធឺណិត អរិភាពចំពោះអ៊ុយក្រែនជាដើម។
មិនមែនការរីកចម្រើន ធំដុំណាមួយត្រូវបានរំពឹងទុកពីកិច្ចប្រជុំកំពូលនេះទេ៕