.jpg)
លោក Alexei Navalny មេគណបក្សប្រឆាំងរុស្ស៊ី។ រូបថត AFP
តុលាការក្រុងម៉ូស្គូនៅថ្ងៃពុធនេះ បានសម្រេចដាក់ស្ថាប័នទាំងឡាយ ដែលមានជាប់ទំនាក់ទំនងជាមួយមេគណបក្សប្រឆាំងរុស្ស៊ីលោក Alexei Navalny ថា ជា «ក្រុមជ្រុលនិយម» ខុសច្បាប់។
រដ្ឋអាជ្ញាក្រុង ម៉ូស្គូបានចោទប្រកាន់លោក Navalny និងសម្ព័ន្ធមិត្តរបស់លោកពីបទប៉ុនប៉ងធ្វើឱ្យមានអស្ថិរភាពសង្គម និងប្រទេសរុស្ស៊ី។ ចំណាត់ការនេះ គឺជាសកម្មភាពចុងក្រោយនៅក្នុងយុទ្ធនាការ ដើម្បីបំបិទសំឡេងអ្នកប្រឆាំង និងរារាំងអ្នករិះគន់វិមានក្រឹមឡាំងពីការឈរឈ្មោះបោះឆ្នោតនៅខែកញ្ញា។
សេចក្តីសម្រេចនេះ ក៏បានសម្រេចបញ្ឈប់សកម្មភាពបុគ្គលដែលមានជាប់ទាក់ទងជាមួយមូលនិធិលោក Navalny ដើម្បីប្រយុទ្ធប្រឆាំងនឹងអំពើពុករលួយនិងបណ្តាញក្នុងតំបន់របស់លោកក្នុងការប្រតិបត្តិការទូទាំងប្រទេសផងដែរ។
សម្ព័ន្ធមិត្តជាច្រើនរបស់លោក Navalny បានសង្ឃឹមថា អាចនឹងឈរឈ្មោះសម្រាប់អាសនៈសភានៅក្នុងការបោះឆ្នោតថ្ងៃទី ១៩ ខែកញ្ញា។ យ៉ាងណាមិញ ការដាក់ស្ថាប័នទាំងនេះចូលជា «ក្រុមជ្រុលនិយម» អាចនឹងផ្ដល់ផលវិបាកធ្ងន់ធ្ងរដល់អ្នកគាំទ្រលោក Alexei Navalny និងចលនានយោបាយរបស់គាត់។
សកម្មជនទាំងនេះ អាចត្រូវប្រឈមនឹងការដាក់ ពន្ធនាគារប្រសិនបើពួកគេបន្តការងាររបស់ពួកគេ។ ដោយឡែកបុគ្គលដែលមានទំនាក់ទំនងជាមួយឬគាំទ្របណ្តាញនយោបាយរបស់លោក Navalny អាចត្រូវបានរារាំងមិនឱ្យឈរឈ្មោះសម្រាប់ការិយាល័យសាធារណៈទៀតផង៕
