ក្រសួងការពារជាតិអាមេរិក បានប្រកាសនៅថ្ងៃសុក្រទី១១ ផ្ដល់កញ្ចប់ថវិកាចំនួន ១៥០លានដុល្លារទៅប្រទេសអ៊ុយក្រែន ជាជំនួយយោធាដែលនឹងរួមមានប្រព័ន្ធរ៉ាដាប្រឆាំងគ្រាប់ផ្លោង ឧបករណ៍សង្គ្រាមអេឡិចត្រូនិក និងបច្ចេកវិទ្យាប្រឆាំងយន្តហោះគ្មានមនុស្សបើក (ដ្រូន) ក្នុងគោលបំណងពង្រឹងក្រុងកៀវ ខណៈភាពតានតឹង កំពុងកើនឡើងជាមួយក្រុងម៉ូស្គូ។
បើទោះបីជាថវិកានេះ ត្រូវបានសន្យារួចហើយដោយសភាក៏ដោយ សេចក្តីប្រកាសរបស់ក្រសួងការពារជាតិ បានរៀបរាប់លម្អិតអំពីរបៀបដែលយោធាសហរដ្ឋអាមេរិក នឹងបែងចែកជំនួយ ដែលបានគ្រោងទុកសម្រាប់អ៊ុយក្រែន មុនពេលបញ្ចប់ឆ្នាំសារពើពន្ធរបស់រដ្ឋាភិបាលសហរដ្ឋអាមេរិកនៅខែកញ្ញា។
ជំនួយនេះ នឹងបន្ថែមពីលើជំនួយមានតម្លៃ ១២៥លានដុល្លារ ដែលក្រសួងការពារជាតិអាមេរិក បានប្រកាសកាលពីថ្ងៃទី១ ខែមីនា ដែលរួមបញ្ចូលទាំងនាវាល្បាតទំនើប Mark VI ផងដែរ។ រវាងឆ្នាំ ២០១៤ និង ២០២១ប្រទេសអ៊ុយក្រែន បានទទួលជំនួយយោធាជាង ២,៥ពាន់លានដុល្លារពីអាមេរិក។
ទីក្រុងម៉ូស្គូ បានកាត់យកឧបទ្វីបគ្រីមា របស់អ៊ុយក្រែនកាលពីឆ្នាំ ២០១៤ និងគាំទ្រការបះបោរផ្ដាច់ខ្លួននិយមនៅភាគខាងកើតអ៊ុយក្រែន ដែលការប៉ះទង្គិចគ្នាបានសម្លាប់មនុស្សជាង
១៤ ០០០ នាក់ហើយបង្កឱ្យមានភាពតានតឹងយ៉ាងខ្លាំង។
ភាពតានតឹង បានផ្ទុះឡើងម្ដងទៀតក្នុងរយៈពេលប៉ុន្មានខែចុងក្រោយនេះ បន្ទាប់ពីប្រទេសទាំង២ បានស្ដីបន្ទោសចំពោះការកើនឡើងនៃការប្រយុទ្ធគ្នានៅតំបន់ដុនបាសខាងកើតអ៊ុយក្រែន ហើយការប្រមូលផ្ដុំកងទ័ពរុស្ស៊ីនៅតាមព្រំដែនអ៊ុយក្រែន និងនៅគ្រីមា៕