.jpg)
លោកនាយករដ្ឋមន្ត្រីអុីស្រាអែល បេនចាមីន នេតានីយ៉ាហ៊ូ ថ្លែងទាក់ទង នឹងភាពវឹកវរនយោបាយក្នុងទីក្រុងហ្សេ៊រុយសាឡិមនាពេលកន្លងទៅ។ AFP
ការកាន់អំណាច ១២ ឆ្នាំ របស់នាយករដ្ឋមន្ត្រីអ៊ីស្រាអែលលោក Benjamin Netanyahu នឹងត្រូវបញ្ចប់នៅថ្ងៃអាទិត្យ នៅពេលដែលសភា Knesset ត្រូវបោះឆ្នោតអនុម័តរដ្ឋាភិបាលថ្មីបង្កើតដោយគូប្រជែង ហើយនឹងនាំមករដ្ឋបាលមួយដែលបានសន្យាថា នឹងព្យាបាលប្រជាជាតិមួយបែកបាក់គ្នាយ៉ាងជូរចត់ដោយការចាកចេញរបស់មេដឹកនាំដែលកាន់អំណាចយូរបំផុតរបស់ប្រទេសនេះ។
លោក Netanyahu ដែលជាអ្នកនយោបាយអ៊ីស្រាអែលលេចធ្លោជាងគេក្នុងជំនាន់របស់គាត់បានបរាជ័យក្នុងការបង្កើតរដ្ឋាភិបាលមួយបន្ទាប់ពីការបោះឆ្នោតនៅថ្ងៃទី ២៣ ខែមីនា របស់អ៊ីស្រាអែល ដែលជាការបោះឆ្នោតលើកទី៤ ក្នុងរយៈពេល ២ ឆ្នាំចុងក្រោយនេះ។ គណៈរដ្ឋមន្ត្រីថ្មី ដែលនឹងត្រូវស្បថចូលកាន់តំណែងបន្ទាប់ពីការបោះឆ្នោតទុកចិត្តរបស់សភា Knesset គឺត្រូវបានការបង្កើតឡើងដោយការច្របាច់បញ្ចូលគ្នាគណបក្សចំនួន ៨ ហើយដឹកនាំដោយមេដឹកនាំប្រឆាំងលោក Yair Lapid និងអ្នកនយោបាយជាតិនិយមលោក Naftali Bennett។
លោក Bennett ដែលជាសេដ្ឋីក្នុងវិស័យបច្ចេកវិទ្យាជាអ្នកនយោបាយជាតិនិយមសាសនានិយម និងគាំទ្រចលនាតាំងលំនៅជនជាតិអ៊ីស្រាអែលនៅដែនដីប៉ាឡេស្ទីន នឹងធ្វើជានាយករដ្ឋមន្ត្រីរយៈពេល ២ ឆ្នាំ ហើយលោក Lapid ដែលជាអតីតពិធីករទូរទស្សន៍ដ៏មានប្រជាប្រិយភាពម្នាក់នឹងចូលកាន់តំណែងបន្ត។
រដ្ឋាភិបាលចម្រុះដែលពួកគេនឹងដឹកនាំ គឺបង្កើតពីគណបក្សដែលគ្មាននិន្នាការនយោបាយដូចគ្នា ប៉ុន្តែស្របគ្នាក្នុងការទម្លាក់លោក Netanyahu ចេញពីតំណែង។ រដ្ឋាភិបាលចម្រុះនេះនឹងរួមមានគណបក្សជនជាតិប៉ាឡេស្ទីនមួយហើយបានយល់ព្រមចៀសវាងការឈានទៅរកបញ្ហាអន្តរជាតិដូចជាគោលនយោបាយឆ្ពោះទៅប៉ាឡេស្ទីន ខណៈពួកគេផ្ដោតលើកំណែទម្រង់ក្នុងស្រុកវិញ។
មេដឹកនាំបក្សនេះ លោក Monsour Abbas បាននិយាយថា លោកបានទទួលការធានាពីដៃគូរដ្ឋាភិបាលចម្រុះថា នឹងបន្ថែមសិទ្ធិសម្រាប់ពលរដ្ឋអ៊ីស្រាអែលដើមកំណើតប៉ាឡេស្ទីន និងប្រាក់រាប់ពាន់លានដុល្លារសម្រាប់អភិវឌ្ឍហេដ្ឋារចនាសម្ព័ន្ធក្នុងតំបន់ជនជាតិអារ៉ាប់។
កិច្ចព្រមព្រៀងសម្ព័ន្ធភាពមួយដែលបានបញ្ចប់កាលពីថ្ងៃសុក្របានបង្ហាញថា រដ្ឋាភិបាលថ្មីនឹងផ្ដោតសំខាន់លើបញ្ហាសេដ្ឋកិច្ច និងសង្គម ដូចជា ការចំណាយថវិការដ្ឋ និងការកសាងមន្ទីរពេទ្យថ្មីៗ ជាជាងប្រថុយនឹងការប្រយុទ្ធផ្ទៃក្នុងដោយព្យាយាមដោះស្រាយជម្លោះអ៊ីស្រាអែល និងប៉ាឡេស្ទីន។ បើទោះជាយ៉ាងនេះក៏ដោយ លោក Bennett នឹងមានអំណាចប្រតិបត្តិក្នុងនាមជានាយករដ្ឋមន្ត្រី ដើម្បីពង្រឹងការកាន់កាប់ដែនដីប៉ាឡេស្ទីនបន្ថែមទៀត។
អ្វីដែលសំខាន់ គឺកិច្ចព្រមព្រៀងនេះបានលើកឡើងថា រដ្ឋាភិបាលថ្មីអាចជំរុញច្បាប់ដែលនឹងកំណត់អាណត្តិនាយករដ្ឋមន្ត្រីមិនឱ្យលើស ៨ ឆ្នាំ ដែលអាចរារាំងដល់ផែនការរបស់លោក Nethayahu ក្នុងការឈរឈ្មោះម្ដងទៀតនៅពេលអនាគត។
ក្នុងអំណាចរយៈពេល ១៥ ឆ្នាំ គិតចាប់ពីឆ្នាំ ១៩៩៦ ដល់ឆ្នាំ ១៩៩៩ ហើយម្ដងទៀតចាប់តាំងពីឆ្នាំ ២០០៩ លោក Netanyahu នៅបន្តព្យាយាមបំបែកបំបាក់រដ្ឋាភិបាលចម្រុះបង្កើតដោយគូប្រជែងរបស់លោក ដែលអាចគំរាមកំហែងមិនត្រឹមតែជីវិតនយោបាយរបស់លោកប៉ុណ្ណោះទេ ប៉ុន្តែថែមទាំងសេរីភាពរបស់លោកផងដែរ។
លោក Netanyahu គឺប្រឈមនឹងសំណុំរឿងពុករលួយចំនួន ៣ ដែលរួមមានការចោទពីបទបោកប្រាស់ការសូកសំណូក និងការរំលោភការទុកចិត្ត។ បើសិនលោកធ្លាក់ពីអំណាច សភាអាចបដិសេធសំណើអភ័យឯកសិទ្ធិពីការកាត់ទោសរបស់លោក។
កាលពីសប្ដាហ៍មុន លោក Netanyahu ចោទប្រកាន់លោក Bennett ថា បានធ្វើការក្លែងបន្លំការបោះឆ្នោត ដោយបានក្បត់ការសន្យាទៅអ្នកបោះឆ្នោតខាងស្តាំថា មិនចូលរួមសម្ព័ន្ធភាពជាមួយក្រុមឆ្វេងនិយម និងគណបក្សជនជាតិអារ៉ាប់។ អ្នកវិភាគបានគិតថា ការចោទប្រកាន់ទាំងនេះ គឺជាការព្យាយាមរបស់លោក Netanyahu ក្នុងការបំបែកសម្ព័ន្ធភាពដ៏ផុយស្រួយនេះ។
ការព្យាយាមបំបែករបស់លោក Netanyahu ត្រូវបានការគិតថា នឹងបន្តបន្ទាប់ពីរដ្ឋាភិបាលថ្មីចូលកាន់អំណាច ហើយអាចគំរាមកំហែងដល់ស្ថិរភាពរដ្ឋាភិបាល និងអាចបង្កឱ្យមានការបោះឆ្នោតម្ដងទៀត។
អ្នកគាំទ្ររបស់លោក Netanyahu បានប្រមូលផ្ដុំគ្នាធ្វើបាតុកម្មនៅខាងក្រៅគេហដ្ឋានរបស់សមាជិកសភាដែលចូលរួមជាមួយរដ្ឋាភិបាលថ្មី ហើយអង្គរក្សបន្ថែមទៀត ត្រូវបានចាត់តាំងឱ្យការពារសមាជិករដ្ឋបាលថ្មីជាច្រើន។
ជនជាតិអ៊ីស្រាអែលខ្លះ បានប្រៀបធៀបការបាតុកម្មទាំងនេះ ទៅនឹងកំហឹងដែលនាំឱ្យមានកុបកម្មនៅវិមានកាពីតូលអាមេរិកកាលពីខែមករា ឬការញុះញង់ឱ្យមានហិង្សាដែលឈានដល់ការធ្វើឃាតអតីតនាយករដ្ឋមន្ត្រីអ៊ីស្រាអែលលោក Yitzhak Rabin ដោយបុគ្គលជ្រុលនិយមកាលពីឆ្នាំ ១៩៩៥៕
