រដ្ឋមន្រ្តីប្រទេសអង់គ្លេសលោក Boris Johnson បានសម្តែងការព្រួយបារម្ភថា ប្រទេសនេះ នៅបន្តអនុវត្តវិធានរឹតបន្តឹងការពារការឆ្លងជំងឺកូវីដ១៩ ដល់ជិតពាក់កណ្ដាលឆ្នាំ ២០២២ ខណៈរដ្ឋមន្ត្រីប្រទេសនេះគ្រោងនឹងពន្យារការបើកដំណើរការមកភាពប្រក្រតីវិញយ៉ាងហោចណាស់ ១ ខែទៀត។
ប្រភពដដែលបានឱ្យដឹងថា លោកចង់ទុកពេលឱ្យដំណើរការចាក់វ៉ាក់សាំង ដើរឱ្យទាន់វិធានបិទខ្ទប់ ជាពិសេសក្នុងអំឡុងពេលមានករណីកើនឡើងខ្លាំងនៃវ៉ារ៉្យង់់មកពីប្រទេសឥណ្ឌា។ លោករំពឹងថា ការពន្យារពេលការបន្ធូរបន្ថយវិធានរឹតបន្តឹង ដែលគ្រោងបញ្ចប់នៅថ្ងៃទី ២១ ខែមិថុនា ឱ្យទៅបញ្ចប់នៅថ្ងៃទី ១៩ ខែកក្កដាវិញ។
ទន្ទឹមនឹងនេះដែរ ប្រភពរដ្ឋាភិបាល ក៏បានប្រាប់កាសែត The Telegraph ថា រដ្ឋាភិបាលកំពុងព្រួយបារម្ភថា ការពន្យារពេលនេះ នឹងមានន័យថា ការរឹតបន្តឹងត្រូវតែបន្តដដែលរហូតដល់ឆ្នាំក្រោយ។ប្រសិនបើការបន្ធូបន្ថយនេះត្រូវបានពន្យារទៀត វាអាចនឹងធ្វើឱ្យយឺតពេលដល់វិធានបន្ធូរបន្ថយវិធាន ដែលនៅសេសសល់សម្រាប់ត្រីមាសទី៣នៃឆ្នាំនេះ។
យ៉ាងណាមិញ អ្នកជំនាញបានប៉ាន់ប្រមាណថា វ៉ារ៉្យង់មកពីឥណ្ឌាមានចំនួនស្មើនឹង ៩៦% នៃករណីឆ្លងថ្មីទាំងអស់ ពោលគឺកើនទ្វេដងរៀងរាល់ ៩ ថ្ងៃម្តង។ ប្រភពដដែលបានឱ្យដឹងថា ចក្រភពអង់គ្លេសអាចនឹងប្រឈមនឹងការឆ្លងករណីកូវីដប្រមាណ ១០០ ០០០ ករណីជារៀងរាល់ ២៤ ម៉ោង រហូតដល់ខែ កក្កដាដោយសារតែវ៉ារ្យ៉ង់មកពីឥណ្ឌានេះ៕