ក្រុមអ្នកស៊ើបអង្កេត បានជីករកឃើញបំណែកឆ្អឹងចំនួន ៣ ៧៨៧ បំណែករបស់ជនរងគ្រោះសរុប ១៧ នាក់ នៅក្រោមផ្ទះឃាតករស៊េរីម្នាក់ នៅជាយក្រុងនៃទីក្រុងប្រទេសម៉ិកស៊ិក។
រដ្ឋអាជ្ញានៅរដ្ឋម៉ិកស៊ីកូបានលើកឡើងថា ការរកឃើញគួរឱ្យញញើតនេះ អាចនឹងមិនទាន់បញ្ចប់នៅឡើយ។នៅក្នុងដំណើរជីករក ដែលត្រូវបានអនុវត្តចាប់តាំងពីថ្ងៃទី ១៧ ខែឧសភា អាជ្ញាធរនៅក្នុងរដ្ឋម៉ិកស៊ីកូ បានជីកកម្រាលឥដ្ឋផ្ទះ ដែលជនសង្ស័យកំពុងរស់នៅ និងគ្រោងនឹងពង្រីកការស្វែងបន្ថែមទៀត នៅក្រោមបន្ទប់ជាច្រើនទៀត ដែលគាត់បានជួលនៅលើដីតែ ១។
បន្ថែមពីនេះ ក្រុមការងារក៏បានរកឃើញអត្តសញ្ញាណប័ណ្ណនិងទ្រព្យសម្បត្តិផ្សេងទៀតរបស់ជនរងគ្រោះ ដែលបានបាត់ខ្លួនជាច្រើនឆ្នាំ ជាការបញ្ជាក់ថា ឃាតករបានសម្លាប់មនុស្សអស់រយៈពេលជាច្រើនឆ្នាំមកហើយ។
ចំនួនបំណែកឆ្អឹងដែលត្រូវបានរកឃើញនៅខាងក្រោមកម្រាលបេតុងនៅផ្ទះរបស់ជនសង្ស័យអាចបញ្ជាក់ថា សាកសពអាចត្រូវបានគេកាប់ជាបំណែកតូចៗ។
សេចក្តីថ្លែងការណ៍ជាផ្លូវការមួយបានឱ្យដឹងថា៖ «បំណែកឆ្អឹងទាំងនេះ កំពុងត្រូវបានគេយកទៅសិក្សាដោយរួមមានការសម្អាតផ្នែកនីមួយៗដោយប្រុងប្រយ័ត្ន និងចាប់ផ្ដើមធ្វើការកំណត់ផ្នែកណាមួយនៃរាងកាយ និងដាក់វានៅក្នុងទីតាំងកាយវិភាគសាស្ត្រដែលជាកន្លែងគេផ្តល់នូវវិធីសាស្ត្រសម្រាប់កំណត់អត្តសញ្ញាណ និងចំនួនប្រហាក់ប្រហែលរបស់ជនរងគ្រោះផងដែរ»។
ប្រភពដដែលបានបន្តថា៖ «ការវិភាគនេះបង្ហាញថា រហូតមកដល់ពេលនេះ បំណែកឆ្អឹង ដែលរកឃើញនេះ អាចជារបស់ជនរងគ្រោះ ១៧ នាក់»។
អាជ្ញាធរមិនបានបញ្ចេញឈ្មោះពេញរបស់ជនសង្ស័យអាយុ ៧២ ឆ្នាំ ស្ថិតនៅក្រោមច្បាប់ម៉ិកស៊ិកក្នុងការការពារអត្តសញ្ញាណរបស់ជនសង្ស័យ។ លោកធ្លាប់បានតុលាការបញ្ជាឱ្យ ចូលជំនុំជម្រះក្នុងករណីសម្លាប់ជនរងគ្រោះចុងក្រោយស្ត្រីអាយុ ៣៤ ឆ្នាំ ដែលសាកសពរបស់ជនរងគ្រោះត្រូវបានគេរកឃើញថា ត្រូវបានអារ និងកាប់ដោយនរណា និងកាំបិតរបស់ឃាតករកាលពីថ្ងៃទី ១៤ ខែឧសភាកន្លងមក។
ទោះជាយ៉ាងណា ការចាប់ខ្លួននេះ ដំបូងឡើយមិនមែនធ្វើឡើងដោយសារលទ្ធផលនៃការស៊ើបអង្កេតទាក់ទិននឹងការសម្លាប់ជាស៊េរីនេះទេ ប៉ុន្តែចាប់ខ្លួនដោយសារតែការចោទប្រកាន់ថ្មីៗនេះ ដែលជនរងគ្រោះ គឺជាប្រពន្ធរបស់មេបញ្ជាការប៉ូលិសដែលលោកស្គាល់ផ្ទាល់។ លោកបានជូនស្ដ្រីរងគ្រោះទៅទិញអីវ៉ាន់នៅថ្ងៃ ដែលស្ដ្រីនោះបាត់ខ្លួន។
មន្ត្រីប៉ូលិសបានពិនិត្យកាមេរ៉ាសុវត្ថិភាពរបស់ប៉ូលិសដែលបង្ហាញថា ប្រពន្ធរបស់គាត់បានដើរនៅតាមផ្លូវចូលផ្ទះរបស់ជនសង្ស័យរស់នៅ ប៉ុន្តែមិនឃើញសញ្ញាណនៃការត្រឡប់មកវិញឡើយ។ ក្រុមប៉ូលិសក៏បានទៅផ្ទះរបស់ជនសង្ស័យហើយក៏បានរកឃើញសាកសពរបស់ប្រពន្ធលោកនៅខាងក្នុង។
បន្ថែមពីនេះ ក្រុមប៉ូលិសក៏បានរកឃើញសម្លៀកបំពាក់ស្រ្តីអត្តសញ្ញាណប័ណ្ណនិងខ្សែអាត់សំឡេង ក៏ដូចជា វីដេអូ ដែលបង្ហាញថា ជនសង្ស័យប្រហែលជាបានថតវីដេអូរបស់ជនរងគ្រោះមុននឹងសម្លាប់ពួកគេ។
ទម្រង់នៃខ្សែអាត់វីដេអូដែលគេរកឃើញនៅឯផ្ទះរបស់ជនសង្ស័យ អាចបង្ហាញថាការសម្លាប់នេះ បានចាប់ផ្ដើមតាំងពីពេលណាមក។ អាជ្ញាធរ បានរកឃើញខ្សែអាត់វីដេអូប្រភេទ 288 mm ជាប្រភេទ ដែលគេឈប់ប្រើតាំងពីឆ្នាំ ២០០៧ និងកាសែតប្រភេទ VHS២៥ ប្រភេទដែលភាគច្រើន គេឈប់ប្រើតាំងពីឆ្នាំ ២០១៦ មកម្ល៉េះ។
ទោះជាយ៉ាងណា គេតែងឃើញបច្ចេកវិទ្យាហួសសម័យជាច្រើន នៅតែត្រូវបានគេប្រើប្រាស់នៅប្រទេសម៉ិកស៊ិក ទោះបីជាគេឈប់ប្រើប្រាស់នៅប្រទេសដទៃទៀតក៏ដោយ។
សរុបទៅ រដ្ឋអាជ្ញាបាននិយាយថា ពួកគេបានរកឃើញរូបថតចំនួន ៩១ សន្លឹកទូរស័ព្ទដៃចំនួន ៨ គ្រឿង និងគ្រឿងអលង្ការនិងគ្រឿងតុបតែងខ្លួនរបស់ស្ត្រីជាច្រើន។ ដោយឡែក ចំពោះបំណែកឆ្អឹងដែលរកឃើញ អ្នកជំនាញនឹងត្រូវបន្តសិក្សាបន្ថែមទៀតដើម្បីកំណត់អត្តសញ្ញាណជនរងគ្រោះ៕