.jpg)
សាច់ញាតិអ្នកជំងឺកូវីដ ១៩ រងចាំទទួលគ្រឿងធ្វើម្ហូបពីសមាជិកសភានៅក្នុងអំឡុងការបិទប្រទេសនៅចុងសប្តាហ៍ ដើម្បីទប់ស្កាត់ការឆ្លងរាលដាល។AFP
អាជីវកម្មនៅប្រទេសឥណ្ឌា ចាប់ផ្តើមចូលរួមយុទ្ធនាការចាក់វ៉ាក់សាំងកូវីដ ១៩ ដោយចែកផលិតផល មិនគិតថ្លៃទៅប្រជាជនដែលចាក់វ៉ាក់សាំងរួចរាល់។
ការចូលរួមពីសំណាក់អាជីវកម្មក្នុងស្រុកនេះ ជាការមើលឃើញពីប្រសិទ្ធភាពយុទ្ធសាស្រ្តអាជីវកម្មនៅសហរដ្ឋអាមេរិក ដែលប្រគល់ជូនផលិតផលមិនគិតថ្លៃទៅអ្នកចាក់វ៉ាក់សាំងរួចរាល់ ដែលធ្វើឱ្យ ប្រទេសនេះមានចំនួនអ្នកចាក់វ៉ាក់សាំងកើនឡើងលឿនជាងការកំណត់។
បណ្តាអាជីវកម្មមួយចំនួនបានចែកនូវវត្ថុជាផលិតផល និងការបញ្ចុះតម្លៃមួយចំនួនទៅដល់អតិថិជនដែលបានចាក់វ៉ាក់សាំងរួចរាល់ ដើម្បីជំរុញប្រជាជនចូលរួមចាក់វ៉ាក់សាំងការពារកូវីដ ១៩ ក្រោយពីប្រទេសនេះមានចំនួនឆ្លងក្នុងសហគមន៍ច្រើន។ រលកទី៣ នៃការឆ្លងក្នុងសហគមន៍នៅប្រទេសឥណ្ឌា គឺបណ្តាលមកពីការចូលរួមក្នុងកម្មវិធីសាសនា និងការចូលរួម យុទ្ធនាការបោះឆ្នោតរបស់ប្រទេសខ្លួនកាលពីពេលថ្មីៗនេះ។
យោងតាមទិន្នន័យរបស់ក្រសួងសុខាភិបាលឥណ្ឌា ប្រជាជនប្រហែល ២២ ភាគរយនៃប្រជាជនឥណ្ឌា សរុបប្រមាណ ១,៣៨ ពាន់លាននាក់ បានចាក់វ៉ាក់សាំងការពារកូវីដ ១៩ គិតត្រឹមថ្ងៃទី ១០ ខែមិថុនា។
ម្ចាស់អាជីវកម្មមួយចំនួនមានការភ័យខ្លាចចំពោះការបិទខ្ទប់ប្រទេសដូចកាលពីរលកទី១ នៃការរីករាលដាលក្នុងសហគមន៍ដែលធ្វើឱ្យប៉ះពាល់ដល់អាជីវកម្មរបស់ពួកគេទាំងស្រុងនោះ សហគ្រិនកំពុងស្វែងរកគ្រប់លទ្ធភាព ដើម្បីទាក់ទាញចំណាប់អារម្មណ៍អតិថិជននៅក្នុងប្រទេសឥណ្ឌា ទទួលការចាក់វ៉ាក់សាំង។
យោងតាមការស្រង់សម្តីរបស់សារព័ត៌មាន South China Morning Post លោក Amit Bagga នាយកប្រតិបត្តិក្រុមហ៊ុន Daryaganj ដែលជាភោជនីយដ្ឋានមានសាខាជាច្រើននៅទូទាំងក្រុងដេលីនិងហ្គូហ្គូមបាននិយាយថា ការចាក់វ៉ាក់សាំងអាចដើរតួយ៉ាងសំខាន់ក្នុងការធានាសុវត្ថិភាពសាធារណៈដោយកាត់បន្ថយការគំរាមកំហែងដោយសារវីរុសកូរ៉ូណា។
សារព័ត៌មានដដែលបានដកស្រង់សម្តីលោកថា៖ «សង្ឃឹមថា ការផ្តល់ជូននិងការបញ្ចុះតម្លៃរបស់ឧស្សាហកម្មបដិសណ្ឋារកិច្ចនឹងលើកទឹកចិត្តដល់អាជីវកម្មផ្សេងទៀត ដើម្បីលើកទឹកចិត្តប្រជាជនទទួលការចាក់វ៉ាក់សាំងផងដែរ។ គ្មាននរណាម្នាក់មានសុវត្ថិភាពទេ ទាល់តែមនុស្សគ្រប់គ្នាមានសុវត្ថិភាព។ ការរីករាលដាលនៃជំងឺនេះកាន់តែឆាប់អន់ថយ មនុស្សទាំងអស់អាចត្រឡប់មករកស៊ីវិញឆាប់ៗនេះ»។
គួរបញ្ជាក់ផងដែរថា អាជីវកម្មនៅសហរដ្ឋអាមេរិកបានចាប់ផ្តើមចូលរួមគាំទ្រយុទ្ធនា ការចាក់វ៉ាក់សាំងនេះតាំងពីខែមករា ឆ្នាំ ២០២១ ដែលបណ្តាលឱ្យមានចំនួនអ្នកចាក់វ៉ាក់សាំងច្រើនលើសការកំណត់។ប្រធានាធិបតីអាមេរិកលោក Joe Biden បានកំណត់ថា នៅថ្ងៃទី ៤ កុម្ភៈ ត្រូវមានមនុស្ស ពេញវ័យយ៉ាងតិចណាស់ ៧០ ភាគរយ នៃមនុស្សពេញវ័យសរុបទទួលការចាក់វ៉ាក់សាំងការពារកូវីដ ១៩ ១ ដូស។
បន្ថែមពីអាជីវកម្មក្នុងស្រុកប្រទេសឥណ្ឌា រដ្ឋាភិបាលក៏កំពុងប្រើយុទ្ធសាស្រ្តដើម្បីលើកទឹកចិត្តដល់សាធារណជនឱ្យទទួលការចាក់វ៉ាក់សាំងកូវីដ ១៩ ផងដែរ។ រដ្ឋាភិបាលឥណ្ឌា បានផ្តល់ការកាត់បន្ថយថ្លៃពន្ធអចលនទ្រព្យដល់ក្រុមគ្រួសារដែលទទួលការចាក់វ៉ាក់សាំងរួចរាល់ហើយ។ នៅភាគឥ្ឍសាននៃរដ្ឋ Arunachal Pradesh ចែកជូនអង្ករដោយឥតគិតថ្លៃទៅដល់ប្រជាជនដែលចាក់វ៉ាក់សាំងរួចរាល់៕
