អគ្គិភ័យដ៏ធំមួយ បានបំផ្លាញជំរំជនភៀសខ្លួនរ៉ូហ៊ីងយ៉ា នៅរដ្ឋធានីញូវដែលីប្រទេសឥណ្ឌា បណ្ដាលឱ្យមនុស្សរាប់រយនាក់គ្មានផ្ទះសំបែងនៅ។
អគ្គិភ័យបានឆាបឆេះនៅម៉ោងប្រហែល ១១ និង ៣០ នាទីយប់ថ្ងៃសៅរ៍ និងរាលដាលពេញជំរំ ដោយបានបំផ្លាញផ្ទះសំបែង ៥៥ ខ្នង ឱ្យទៅនឹងផេះនៅតំបន់ Madanpur Khadar ស្ថិតនៅភាគខាងត្បូងទីក្រុងញូវដែលី។ ទោះជាយ៉ាងណា មិនមានករណីស្លាប់ និងរងរបួសធ្ងន់ធ្ងរនៅក្នុងអគ្គិភ័យនេះទេ។
នាយកដ្ឋានសេវាកម្មពន្លត់អគ្គិភ័យនៃរដ្ឋធានីដដែលនេះ បាននិយាយថា ខ្លួនបានដាក់ឡានពន្លត់អគ្គិភ័យចំនួន ១៥ គ្រឿង និងប្រើប្រាស់រយៈពេលប្រហែល ៦ម៉ោង ដើម្បីពន្លត់អគ្គិភ័យទាំងស្រុង។ គួរបញ្ជាក់ផងដែរថា នេះជាលើកទី២ ហើយ ដែលជំរំនេះ ត្រូវបានគេដុតក្លាយជាផេះ បើគិតពីឆ្នាំ ២០១៨ មក។
ប៉ូលិសកំពុង បើកការស៊ើបអង្កេតទាក់ទិននឹងករណីអគ្គិភ័យនេះ។ លោក Bharat Singh មន្ត្រីស៊ើបអង្កេតប៉ូលិសនៅទីក្រុងដេលីបានប្រាប់សារព័ត៌មាន ដដែលនេះថា៖ «ជាក់ស្តែង មូលហេតុនៃអគ្គិភ័យនេះ បណ្ដាលមកពីបញ្ហាសៀគ្វី។អ្នកជំនាញវិទ្យាសាស្ត្រខាងកោសល្យវិច័យ បានប្រមូលសំណាកខ្សែអគ្គិសនីពីកន្លែងនោះ ដើម្បីបញ្ជាក់ពីមូលហេតុនៅពីក្រោយអគ្គិភ័យនេះផងដែរ»។
ទោះយ៉ាងណាក្រុមអ្នករស់នៅជំរុំភៀសខ្លួនបាននិយាយថា ជំរំនេះ ត្រូវបានគេដុតដោយចេតនា ព្រោះបុរសដែលជាសមាជិកក្រុមស្តាំនិយមហិណ្ឌូ ធ្លាប់បានគេចោទប្រកាន់ពីបទបង្កអគ្គិភ័យនៅក្នុងជំរំកាលពីពេលថ្មីៗនេះ។
គួរបញ្ជាក់ផងដែរថា ជនភៀសខ្លួនរ៉ូហ៊ីងយ៉ាប្រមាណ ៤ ម៉ឺននាក់ ដែលភាគច្រើនគ្មានឯកសាររស់នៅត្រឹមត្រូវក្នុងជំរំនានានៅទូទាំងទីក្រុងឥណ្ឌា។ ទីភ្នាក់ងារជនភៀសខ្លួនរបស់អង្គការសហប្រជាជាតិ (UN)បានផ្តល់កាតដល់ជនភៀសខ្លួនមួយចំនួន ដើម្បីជួយឱ្យពួកគេទទួលបានសេវាកម្មមូលដ្ឋានមួយចំនួន និងអាចជួយការពារពួកគេពីសកម្មភាពរបស់ប៉ូលិសផងដែរ។
ជនជាតិរ៉ូហ៊ីងយ៉ាជាង ៧៥ ម៉ឺននាក់ បានជ្រកកោននៅបង់ក្លាដែសក្នុងឆ្នាំ ២០១៧ បន្ទាប់ពីកងទ័ពមីយ៉ាន់ម៉ាធ្វើការបង្ក្រាបយ៉ាងសាហាវទៅលើជនជាតិភាគតិចមូស្លីមដែលអាជ្ញាធរមីយ៉ាន់ម៉ាធ្វើទុក្ខបុកម្នេញអស់ជាច្រើនទសវត្សរ៍មកនេះ។ ជនជាតិរ៉ូហ៊ីងយ៉ាមួយចំនួនធំ បានភៀសខ្លួនទៅកាន់បណ្តាប្រទេសអាស៊ីជិតខាងរួមមានឥណ្ឌានិងម៉ាឡេស៊ីជាដើម។
អគ្គិភ័យនេះកើតឡើងចំពេល កំពុងមានការបង្ក្រាបរបស់រដ្ឋាភិបាលឥណ្ឌាទៅលើជនភៀសខ្លួនរ៉ូហ៊ីងយ៉ា ដែលកំពុងរស់នៅក្នុងប្រទេសនេះ។ រដ្ឋាភិបាលជាតិនិយមហិណ្ឌូរបស់ឥណ្ឌាបាននិយាយថា ខ្លួននឹងបញ្ជូនជនភៀសខ្លួនរ៉ូហ៊ីងយ៉ាទៅកាន់ប្រទេសមីយ៉ាន់ម៉ាវិញ ដែលជាការផ្ទុយស្រឡះនឹងគោលការណ៍ការហាមឃាត់ប្រទេសមួយក្នុងការបញ្ជូនជនភៀសខ្លួនទៅកាន់ប្រទេសដើម ដែលកំពុងមានហានិភ័យ៕