.jpg)
លោកប្រធានធិបតី វ្លាឌីមៀរ ពូទីន។ AFP
នៅថ្ងៃទី ១៦ ខែមិថុនា ប្រធានាធិបតីរុស្ស៊ី លោក Vladimir Putin និងប្រធានាធិបតីសហរដ្ឋអាមេរិក លោក Joe Biden នឹងធ្វើជំនួបផ្ទាល់ដំបូងតាំងពីលោក Biden ឡើងកាន់តំណែងជាប្រធានាធិបតី។
យោងតាមការស្រង់សម្តីរបស់សារព័ត៌មាន CNN ប្រធានាធិបតីសហរដ្ឋអាមេរិក លោក Joe Biden បានថ្លែងប្រាប់ទាហានអាមេរិកកាលពីថ្ងៃទី ៩ មិថុនាថា លោកកំពុងនៅអឺរ៉ុប ដើម្បីការពារទស្សនវិស័យនៃលទ្ធិប្រជាធិបតេយ្យ ដោយបង្កើតជំហរខ្ពស់ អំឡុងដំណើរ ទស្សនកិច្ចរបស់លោកជាដំបូងទៅក្រៅប្រទេសក្នុងនាមជាប្រធានាធិបតីអាមេរិក។
លោកបានបន្តនិយាយថា ប្រធានាធិបតីរុស្ស៊ី លោក Vladimir Putin មានគម្រោងលើកឡើង នូវបញ្ហាគួរឱ្យចាប់អារម្មណ៍ក្នុងអំឡុងពេលកិច្ចប្រជុំកំពូលរបស់ពួកគេនាពេលខាងមុខនេះ។ លោក Biden ក៏បាននិយាយអំពីការស្តារសម្ព័ន្ធមិត្តអាមេរិកនៅអឺរ៉ុប ដោយពណ៌នាថា នេះជាមូលដ្ឋានគ្រឹះនៃសន្តិសុខពិភពលោក។
គួរបញ្ជាក់ផងដែរថា ប្រទេសរុស្ស៊ីថ្មីៗនេះបាន ដាក់សហរដ្ឋអាមេរិកចូល ទៅក្នុងបញ្ជីផ្លូវការ របស់ខ្លួននៃប្រទេសអមិត្ត។បច្ចុប្បន្នភាគីទាំង ២ មិនមានឯកអគ្គរដ្ឋទូតរបស់ខ្លួនប្រចាំនៅក្នុង ប្រទេសទាំង ២ ឡើយ។
កាលពីដើមខែមិថុន លោក Putin បាននិយាយថា លោកចង់ឱ្យទំនាក់ទំនងរវាងទីក្រុងម៉ូស្គូ និងក្រុងវ៉ាស៊ីងតោនមានភាពប្រសើរឡើងនាកិច្ចប្រជុំខាងមុខ។ ទោះបីជាលោកបានលើកឡើងពីភាពវិជ្ជមាននៃជំនួបនោះ ក៏ដោយលោកបាននិយាយថា សហរដ្ឋអាមេរិកចង់ទប់ស្កាត់ការអភិវឌ្ឍរបស់ប្រទេសរុស្ស៊ី ។
លោក ពូទីន បានប្រាប់វេទិកាសេដ្ឋកិច្ចអន្តរជាតិ Saint Petersburg ថា៖ «យើងត្រូវរកវិធី ដើម្បីស្វែងរកដំណោះស្រាយនៅក្នុងទំនាក់ទំនង របស់យើងដែលស្ថិតក្នុងកម្រិតទាបបំផុត ឥឡូវនេះ»។
លោកបានបន្តនិយាយថា រុស្ស៊ីអាចធ្វើការជាមួយសហរដ្ឋអាមេរិក ដោយចាប់ផ្តើមពីកិច្ចពិ ភាក្សាស្តីពីការគ្រប់គ្រងអាវុធនុយក្លេអ៊ែរថ្មីពិភាក្សាពីជម្លោះក្នុងតំបន់រួមមានប្រទេសស៊ីរី និង
លីប៊ី និងបម្រែបម្រួលអាកាសធាតុ។
លោក ពូទីន បានអះអាងថា៖ «ប្រសិនបើយើងអាចបង្កើតយន្តការសម្រាប់ធ្វើការលើបញ្ហាទាំងនោះ បន្ទាប់មកខ្ញុំគិតថាយើងអាចនិយាយបានថា កិច្ចប្រជុំកំពូលមិនមែនឥតប្រយោជន៍ទេ»។ បន្ថែមពីនេះ ទីក្រុងម៉ូស្គូអាចនឹងអនុញ្ញាតឱ្យឯកអគ្គរដ្ឋទូតរបស់ខ្លួន ត្រឡប់ទៅទី ក្រុងវ៉ាស៊ីនតោនវិញ។»
មន្ត្រីជាន់ខ្ពស់រុស្ស៊ីកំពុងស្ថិតក្រោមការដាក់ទណ្ឌកម្មរបស់អាមេរិកចំពោះការបញ្ចូលឧបទ្វីបគ្រីមារបស់អ៊ុយក្រែន ការជ្រៀតជ្រែកក្នុងការបោះឆ្នោត និងអតីតទាហាន ជើងទឹក អាមេរិក ២ នាក់ កំពុងជាប់ពន្ធនាគាររុស្ស៊ីដោយម្នាក់ជាប់ពន្ធនាគារ ១៦ ឆ្នាំ ដែលត្រូវបានចោទប្រកាន់ពីបទចារកម្ម។ បន្ថែមពីការដាក់ទណ្ឌកម្មទៅលើប្រទេសរុស្ស៊ី ប្រធានាធិបតីអាមេរិក លោក Joe Biden នៅខែមីនាបានហៅលោក Putin ជាឃាតករ៕
