.jpg)
លោក Naftali Bennett ថ្លែងនៅចំពោះមុខគណៈរដ្ឋមន្ត្រីថ្មីក្នុងសភា Knesset កាលពីថ្ងៃទី ១៣ មិថុនា។ AFP
រដ្ឋាភិបាលថ្មីអ៊ីស្រាអែលដឹកនាំដោយលោក Naftali Bennett បានស្បថចូលកាន់តំណែង កាលពីថ្ងៃអាទិត្យកន្លងទៅ ដោយជាការបញ្ចប់ការគ្រប់គ្រងរយៈពេល ១២ ឆ្នាំ របស់នាយករដ្ឋមន្រ្តីចាស់លោក Benjamin Netanyahu។
លោក Bennett នឹងធ្វើជានាយករដ្ឋមន្ត្រីរយៈពេល ២ ឆ្នាំ ក្រោមកិច្ចព្រមព្រៀងសម្ព័ន្ធភាព ដែលមានគណបក្សនយោបាយចំនួន ៨ ផ្សេងទៀត ដែលមានគោលបំណងដូចគ្នានោះ គឺចង់បញ្ចប់ការកាន់កាប់ដ៏ច្របូកច្របល់របស់លោក Netanyahu។
មានអាយុ ៤៩ ឆ្នាំ លោក Bennett ជាសម្ព័ន្ធមិត្តរបស់លោក Netanyahu ធ្លាប់បម្រើការជារដ្ឋមន្រ្តីការពារជាតិនៅឆ្នាំ ២០១៩ និង២០២០។ ដោយឡែកលោក YairLapid អាយុ ៥៧ ឆ្នាំ ដែលជារដ្ឋមន្រ្តីក្រសួងហិរញ្ញវត្ថុ និងជាពិធីករព័ត៌មានទូរទស្សន៍ដ៏ល្បីល្បាញម្នាក់នឹងកាន់តំណែងបន្តពីលោក Bennett។
មានចំណុចមួយចំនួនដែលអាចនឹងកើតឡើងក្នុងពេលផ្លាស់ប្ដូររដ្ឋាភិបាលថ្មីនេះ។ ចំណុចទី១ ដែលគេសង្កេតឃើញ គឺសម្ព័ន្ធភាពផុយស្រួយ។ សម្ព័ន្ធភាពថ្មី ដែលបានបង្កើតឡើងនេះ ទទួលបានសំឡេងភាគច្រើនតិចតួចប៉ុណ្ណោះនៅក្នុងសភា Knesset ដែលមានសមាជិក ១២០ រូបដែលរួមបញ្ចូលទាំងគណបក្សមកពីស្តាំឆ្វេង និងកណ្ដាលនិយមផងដែរ។ គណបក្សនីមួយៗបានចុះហត្ថលេខាលើកិច្ចព្រមព្រៀងចម្រុះឱ្យបានមុនថ្ងៃផុតកំណត់នៅថ្ងៃសុក្រកន្លងទៅ ដើម្បីឱ្យដំណើរការនៃការផ្លាស់ប្ដូរនយោបាយថ្មីប្រព្រឹត្តទៅតាមកាលកំណត់។
សម្ព័ន្ធភាពនេះ ត្រូវបានគេរំពឹងថា នឹងត្រូវសម្របទៅតាមរបៀបវារៈសមរម្យមួយដែលអាចទទួលយកបាន សម្រាប់ប្រជាជនអ៊ីស្រាអែលស្ដីពីការបែងចែកមនោគមន៍វិជ្ជា ដើម្បីជាការបញ្ចៀសបញ្ហាក្ដៅគគុកកំពុងកើតឡើងនេះ។ បញ្ហាប្រឈមធំដំបូងរបស់សម្ព័ន្ធភាពនេះ គឺត្រូវព្រមព្រៀងលើការប្រើប្រាស់ថវិកាកញ្ចប់ជាលើកដំបូង ដូចនេះកំណែទម្រង់សេដ្ឋកិច្ច និងការចំណាយលើហេដ្ឋារចនាសម្ព័ន្ធនានា អាចនឹងត្រូវធ្វើឡើងផងដែរ។
ចំណុចទី២ គឺការគ្រប់គ្រងបញ្ហាជម្លោះដែលកំពុងកើតមាន។ លោក Bennett ត្រូវបានគេស្គាល់ថា ជាអ្នកជំនាញខាងសាសនានិយមដែលគាំទ្រការពង្រីកការតាំងទីលំនៅ និងប្រឆាំងនឹងរដ្ឋប៉ាឡេស្ទីន។ ប៉ុន្តែលោកអាចនឹងប្រថុយនឹងបាត់បង់តំណែងខ្លួនប្រសិនបើលោកផ្តាច់ខ្លួនពីដៃគូចម្រុះក្នុងសហព័ន្ធថ្មីនេះ។
នោះទំនងជាមានន័យថា កិច្ចខិតខំប្រឹងប្រែងឥតឈប់ឈររបស់លោក Netanyahu ក្នុងការគ្រប់គ្រងជម្លោះរាប់ទសវត្សរ៍មកនេះអាចនឹងត្រូវបញ្ចប់។ ក្នុងនោះកិច្ចខិតខំប្រឹងប្រែងបញ្ចូលតំបន់ West Bank និងការលុកលុយតំបន់ Gaza និងការផ្ដល់នូវការផ្តល់សម្បទានធំៗដល់ប្រជាជនប៉ាឡេស្ទីនក៏ត្រូវបានបញ្ចប់ដូចគ្នា។
រាល់រដ្ឋាភិបាលអ៊ីស្រាអែល ដែលបានពង្រីកការតាំងលំនៅរបស់ជ្វីហ្វនៅក្នុងតំបន់ West Bank ខាងលិច និងភាគខាងកើតទីក្រុង Jerusalem ក្នុងសង្គ្រាមឆ្នាំ ១៩៦៧ និងអ្វីដែលប្រជាជនប៉ាឡេស្ទីនចង់បានសម្រាប់ប្រទេសខ្លួននៅអនាគតរដ្ឋាភិបាលថ្មី ត្រូវតែធ្វើតាម ដើម្បីចៀសវាងកុំឱ្យរដ្ឋបាលលោក Joe Biden ខឹងសម្បា ដែលបណ្ដាលឱ្យមានការរារាំង ឬជម្លោះកើតឡើងជាយថាហេតុ ក្នុងកិច្ចចរចាសន្តិភាព។
រដ្ឋាភិបាលថ្មី គឺត្រូវតែរក្សាគោលជំហររឹងមាំរបស់លោក Netanyahu ទាក់ទិននឹងករណីប្រទេសអ៊ីរ៉ង់ និងប្រឆាំងនឹងកិច្ចប្រឹងប្រែងរបស់ប្រធានាធិបតី Joe Biden ក្នុងការស្តារកិច្ចព្រមព្រៀងនុយក្លេអ៊ែរអន្តរជាតិរបស់ខ្លួនឡើងវិញផងដែរ។ រដ្ឋាភិបាលថ្មីក៏ទំនងជាត្រូវធ្វើការជាមួយលោក Biden ដើម្បីពង្រឹងទំនាក់ទំនងជាមួយរដ្ឋអារ៉ាប់ផងដែរ។
ចំណុចទី៣ គឺការផ្សះផ្សាបញ្ហាបែកចែកសាសនាក្នុងប្រទេស។ ការផ្លាស់ប្តូរដ៏ធំបំផុតទំនងជា កើតឡើងក្នុងស្រុកនោះ គឺការដោះស្រាយបញ្ហាសង្គមអ៊ីស្រាអែលដែលបានបើកលើកយកមកដោះស្រាយក្នុងអំឡុងពេលលោក Netanyahu កាន់តំណែងពោលគឺរវាងពួកជ្វីហ្វ និងអារ៉ាប់ និងរវាងគ្រិស្តអូស្សូដក់ និងអ៊ីស្រាអែលជាតិនិយម។
លោក Bennett បាននិយាយកាលពីថ្ងៃសុក្រថា៖ «រដ្ឋាភិបាលនឹងធ្វើការឱ្យសាធារណជនអ៊ីស្រាអែលទាំងអស់មិនថា សាសនាណាឡើយ។ យើងនឹងធ្វើការរួមគ្នា ដោយចេញពីភាពជាដៃគូ និងការទទួលខុសត្រូវរបស់ជាតិហើយខ្ញុំជឿថា យើងនឹងទទួលបានជោគជ័យ»។
ទោះជាយ៉ាងណាក្ដីគណៈរដ្ឋមន្រ្តីថ្មីអាចនឹងប្រឈមមុខនឹងបញ្ហាការទូត សន្តិសុខ និងហិរញ្ញវត្ថុមួយចំនួនតូចរាប់បញ្ចូលទាំងបញ្ហានៅអ៊ីរ៉ង់ បទឈប់បាញ់តំបន់ Gaza ការស៊ើបអង្កេតឧក្រិដ្ឋកម្មសង្គ្រាមដោយតុលាការព្រហ្មទណ្ឌអន្តរជាតិ និងការស្ទុះងើបឡើងវិញនៃសេដ្ឋកិច្ច ក្រោយមានជំងឺរាតត្បាតផងដែរ៕
