ក្រុមស្តាំនិយមអ៊ីស្រាអែលបានហែក្បួនទង់ជាតិនៅក្រុងហ្ស៊េរុយសាឡិមខាងកើតនៅថ្ងៃអង្គារ ទី ១៥ ខែមិថុនា ដែលការធ្វើបែបនេះ ត្រូវបានអ្នកវិភាគមួយចំនួនគិតថា នឹងប្រថុយបញ្ឆេះភាពតានតឹងជាមួយជនជាតិប៉ាឡេស្ទីននៅក្នុងទីក្រុងដែលមានជម្លោះ និងញុះញង់ឱ្យមានអំពើហិង្សាផ្ទុះឡើងវិញរវាងអ៊ីស្រាអែល និងហាម៉ាស។
ដោយគិតថា ការហែក្បួននេះថា ជាការ «ញុះញង់» ជនជាតិប៉ាឡេស្ទីនបានទាមទារឱ្យមានការប្រព្រឹត្ត «ពិធីនៃកំហឹង» នៅតំបន់ហ្គាហ្សា និង West Bank។ ក្រុមហាម៉ាសបានគំរាមថា អំពើហិង្សាអាចផ្ទុះឡើងវិញ ប្រសិនបើការហែក្បួននេះទៅមុខ។
នាយករដ្ឋមន្ត្រីប៉ាឡេស្ទីនលោក Mohammad Shtayyeh បាននិយាយនៅលើបណ្ដាញសង្គម Twitter កាលពីថ្ងៃចន្ទថា៖ «យើងព្រមានពីការឆ្លើយតបដោយគ្រោះថ្នាក់ ដែលអាចបណ្ដាលមកពីចេតនារបស់អំណាចកាន់កាប់ក្នុងការអនុញ្ញាតឱ្យអ្នកតាំងលំនៅអ៊ីស្រាអែលជ្រុលនិយមអនុវត្តការហែទង់ជាតិនៅក្នុងក្រុងហ្ស៊េរុយសាឡិមនៅថ្ងៃស្អែក»៕