.jpg)
លោកនាយករដ្ឋមន្ត្រីអង់គ្លេស ប៊ូរីស ចនសុន។ AFP
ចក្រភពអង់គ្លេស និងអូស្ត្រាលី បានយល់ព្រមលើកិច្ចព្រមព្រៀងពាណិជ្ជកម្មរវាងប្រទេសទាំង ២ ដោយសេចក្ដីប្រកាសជាផ្លូវការនៅថ្ងៃអង្គារ សប្ដាហ៍នេះ។
អ្នកនាំពាក្យក្រសួងពាណិជ្ជកម្មអន្តរជាតិបានបញ្ជាក់ថា លក្ខខណ្ឌទូលំទូលាយសំខាន់ៗ ត្រូវបានធ្វើឡើងកាលពីថ្ងៃចន្ទបន្ទាប់ពីនាយករដ្ឋមន្រ្តីចក្រភពអង់គ្លេសលោក Boris Johnson និងនាយករដ្ឋមន្រ្តីអូស្ត្រាលីលោក Scott Morrison ក្នុងពិធីពិសាអាហារពេលល្ងាចនៅថ្ងៃដដែលនេះ។
ព័ត៌មានលម្អិតបន្ថែមនឹងត្រូវចេញផ្សាយនៅពេលឆាប់ៗ។ ប្រសិនបើមានការព្រមព្រៀងជាផ្លូវការហើយ កិច្ចព្រមព្រៀងនេះនឹងត្រូវបានគេលើកមកចរចាដំបូង គិតចាប់តាំងពីចក្រភពអង់គ្លេសចាកចេញពីសហភាពអឺរ៉ុបនៅខែ មករា ឆ្នាំ ២០២០ មក។
ទន្ទឹមនឹងនេះដែរ ប្រជាកសិករ បានលើកឡើងពីការព្រួយបារម្ភអំពីសក្តានុពលនៃកិច្ចព្រមព្រៀងពាណិជ្ជ កម្មពន្ធសេរី-កូតាសេរី ជាមួយប្រទេសអូស្រ្តាលី ដែលអាចនឹងកាត់បន្ថយតម្លៃនាំចូល ដែលអាចជះឥទ្ធិពលដល់លទ្ធភាពអាជីវកម្មរបស់ពួកគេនៅរយៈពេលយូរ។
ដោយឡែក អ្នកខ្លះទៀតភ័យខ្លាចថា កិច្ចព្រមព្រៀងនេះ អាចនឹងធ្វើឱ្យសាច់មានតម្លៃថោករួមនឹងស្តង់ដាសុខុមាលភាពទាបធ្វើចរាចរណ៍មកកាន់ទីផ្សារចក្រភពអង់គ្លេស ដែលអាចនឹងប៉ះពាល់ដល់កសិករអង់គ្លេស ដែលបានប្រតិបត្តិការតាមស្តង់ដាខ្ពស់។
ប្រធានសហព័ន្ធកសិករជាតិនៃប្រទេសអង់គ្លេស លោកស្រី Minette Batters បានប្រាប់អ្នកសង្កេតការណ៍ កាលពីខែឧសភាថា កិច្ចព្រមព្រៀងនេះ អាចនឹងមានផលប៉ះពាល់ធ្ងន់ធ្ងរដល់កសិកម្មអង់គ្លេស ហើយហាក់ដូចជាផ្តល់អត្ថប្រយោជន៍តិចតួចដល់សេដ្ឋកិច្ចប្រទេសនេះ៕
