កាលពីថ្ងៃចន្ទ ទី ១៤ មិថុនា ស្នងការអង្គការសហប្រជាជាតិទទួលបន្ទុកជនភៀសខ្លួនលោក Filippo Grandi បាននិយាយថា អង្គការសហប្រជាជាតិ គឺកំពុងត្រៀមសម្រាប់ការកើនឡើងជនភៀសខ្លួននៅអាហ្វហ្គានីស្ថាន ដែលគេគិតថា នឹងកើនឡើង បន្ទាប់ពីការចាកចេញនៃទាហានសហរដ្ឋអាមេរិក និងប្រទេសដទៃទៀតនៅខែកញ្ញាខាងមុខនេះ។
អំពើហិង្សាកំពុងកើនឡើង ខណៈពេលដែលកម្លាំងបរទេសចាប់ផ្តើមដកខ្លួនចេញ ហើយកិច្ចប្រឹងប្រែង ដើម្បីសម្របសម្រួលដំណោះស្រាយសន្តិភាពរវាងរដ្ឋាភិបាលអាហ្វហ្គានីស្ថាន និងក្រុមតាលីបង់បានជាប់គាំង។
កាលពីចន្ទសប្ដាហ៍មុនមន្ត្រីអាហ្វហ្គានីស្ថានជាន់ខ្ពស់បាននិយាយថា ក្នុងរយៈពេល ២៤ ម៉ោងយ៉ាងហោចណាស់ទាហានរដ្ឋាភិបាលចំនួន ១៥០ នាក់ បានស្លាប់ ឬរងរបួសពីការកើនឡើងការប៉ះទង្គិចជាមួយតាលីបង់។
លោក Grandi បានចង្អុលទៅការវាយប្រហារដ៏សាហាវមួយកាលពីសប្តាហ៍មុនទៅលើអង្គការដោះមីនអន្តរជាតិមួយនៅភាគខាងជើងអាហ្វហ្គានីស្ថាន ដែលបានសម្លាប់មនុស្ស ១០ នាក់ និងធ្វើឱ្យមនុស្ស ១៦ នាក់របួស។ ក្រសួងមហាផ្ទៃអាហ្វហ្គានីស្ថានបានចោទប្រកាន់ក្រុមតាលីបង់ថា បានប្រព្រឹត្តការវាយប្រហារនេះ ខណៈតាលីបង់បដិសេធថា ពួកគេមិនបានប្រព្រឹត្តការវាយប្រហារនេះទេ។
លោក Grandi បាននិយាយថា៖ «នេះ គឺជាសូចនាករដ៏គួរឱ្យខ្លោចផ្សាមួយនៃប្រភេទអំពើហិង្សា ដែលអាចនឹងកើតឡើងជាថ្មីនៅអាហ្វហ្គានីស្ថាន ហើយជាមួយនឹងការដកកងទ័ពអន្តរជាតិ នេះអាចនឹងកាន់តែអាក្រក់ទៅៗ»។
លោកបានបន្ថែមទៀតថា៖ «ដូច្នេះយើងកំពុងរៀបចំផែនការយថាកម្មនៅខាងក្នុងប្រទេសនេះសម្រាប់ការជម្លៀសទីលំនៅបន្តទៀតទៅប្រទេសជិតខាង ក្នុងករណីដែលមនុស្សអាចឆ្លងកាត់ព្រំដែន»។
បច្ចុប្បន្នមានជនភៀសខ្លួនចុះបញ្ជីប្រហែល ២,៥ លាននាក់ មកពីអាហ្វហ្គានីស្ថាននៅទូទាំងពិភពលោក ខណៈ ៤,៨ លាននាក់ផ្សេងទៀត ជាជនភៀសខ្លួនក្នុងប្រទេស។ នេះបើយោងតាមទីភ្នាក់ងារជនភៀសខ្លួនអង្គការសហប្រជាជាតិ UNHCR ដែលដឹកនាំដោយលោក Grandi។
កងកម្លាំងអាហ្វហ្គានីស្ថាន ដែលគាំទ្រដោយសហរដ្ឋអាមេរិកបានទម្លាក់ក្រុមតាលីបង់ពីអំណាចនៅចុងឆ្នាំ ២០០១ ដោយសារពួកគេបានបដិសេធមិនប្រគល់មេដឹកនាំក្រុមភេរវកម្មអាល់កៃដា លោក អូសាម៉ា ប៊ីនឡាដិន ឱ្យអាមេរិក បន្ទាប់ពីការវាយប្រហារអគារភ្លោះថ្ងៃទី ១១ ខែកញ្ញា ឆ្នាំ ២០០១។
បន្ទាប់ពីសង្គ្រាមរយៈពេល ២០ ឆ្នាំ សហរដ្ឋអាមេរិកបានចាប់ផ្តើមដកកងទ័ពដែលនៅសេសសល់របស់ខ្លួនចំនួន ២ ៥០០ នាក់ នៅក្នុងប្រទេសអាហ្វហ្គានីស្ថាន ហើយមានគោលបំណងដើម្បីចាកចេញពីប្រទេសនេះទាំងស្រុងនៅថ្ងៃទី ១១ ខែកញ្ញា។ កងកម្លាំងមិនមែនអាមេរិកប្រមាណ ៧ ០០០ នាក់ ដែលភាគច្រើនមកពីប្រទេសជាសមាជិកអង្គការណាតូ រួមជាមួយអូស្ត្រាលី នូវែលសេឡង់ និងហ្សកហ្ស៊ី ក៏គ្រោងនឹងចាកចេញនៅថ្ងៃទី ១១ ខែកញ្ញា ផងដែរ។
លោក Grandi បាននិយាយថា ការគាំទ្រអន្តរជាតិខ្លាំង គឺចាំបាច់សម្រាប់កិច្ចចរចាសន្តិភាពរវាងរដ្ឋាភិបាលអាហ្វហ្គានីស្ថាន និងតាលីបង់។ លោកបានបន្ថែមទៀតថា៖ «សកម្មភាពនយោបាយគួរតែជំនួសការប៉ះទង្គិច ប៉ុន្តែហានិភ័យនៃការជម្លៀសប្រជាជននៅតែមានហើយត្រូវតែត្រៀម»៕