.jpg)
លោកចូ បៃដិន (ស្តាំ) ចាប់ដៃជាមួយលោកអេរដូហ្គែន។ AFP
ប្រធានាធិបតីអាមេរិកលោក Joe Biden និងប្រធានាធិបតីទួរគីលោក Tayyip Erdogan បានបង្ហាញសុទិដ្ឋិនិយម បន្ទាប់ពីកិច្ចពិភាក្សាទល់មុខគ្នាលើកដំបូងរបស់ពួកគេកាលពីថ្ងៃចន្ទទី ១៤ មិថុនា បើទោះបីជាពួកគេមិនបានប្រកាសនូវលទ្ធផលធំណាមួយនៃទំនាក់ទំនងរវាងសម្ព័ន្ធមិត្តទាំងពីរនេះ ដែលមានភាពតានតឹងជុំវិញការទិញអាវុធរុស្សី សង្គ្រាមនៅស៊ីរី លីប៊ី និងបញ្ហាជាច្រើនទៀតយ៉ាងណាក្ដី។
លោក Biden បានថ្លែងក្នុងសន្និសីទសារព័ត៌មានបន្ទាប់ពីកិច្ចប្រជុំរបស់ពួកគេនៅទីក្រុងប្រ៊ុចសែលថា៖ «យើងមានការប្រជុំប្រកបដោយភាពវិជ្ជមាន និងប្រកបដោយផលិតភាព ដែលភាគច្រើនគឺ ១ ទល់ ១»។
លោកបានបន្ថែមថា៖ «ក្រុមការងាររបស់យើង នឹងបន្តការពិភាក្សារបស់យើង ហើយខ្ញុំមានទំនុកចិត្តថាយើងនឹងមានការរីកចម្រើនពិតប្រាកដជាមួយតួកគី និងសហរដ្ឋអាមេរិក»។
លោក Erdogan បានកំណត់លក្ខណៈនៃកិច្ចពិភាក្សារបស់លោកជាមួយលោក Biden នៅខាងក្រៅកិច្ចប្រជុំកំពូលណាតូថា«មានផលិតភាពនិងស្មោះត្រង់»។
លោកបាននិយាយថា៖ «យើងគិតថាមិនមានបញ្ហាអ្វីទេរវាងទំនាក់ទំនងសហរដ្ឋអាមេរិក និងតួកគី ដែលមិនអាចដោះស្រាយបាន ហើយតំបន់នៃកិច្ចសហប្រតិបត្តិការសម្រាប់យើងគឺមានកាន់តែធំ និងធំជាងបញ្ហា»។
បើទោះបីជាមានការបង្ហាញសុទិដ្ឋិនិយមជាសារបែបនេះក៏ដោយ ពួកគេមិនបានបង្ហាញព័ត៌មានលម្អិតអំពីរបៀបដែលពួកគេនឹងជួសជុលទំនាក់ទំនង ឬបន្ធូរបន្ថយភាពតានតឹងរវាងសម្ព័ន្ធមិត្តណាតូទាំង២នោះទេ។
ភាពតានតឹងរវាងសម្ព័ន្ធទាំងពីរបានកើនឡើង បន្ទាប់ពីតួកគីបានទិញប្រព័ន្ធការពារដែនអាកាស S-400 របស់រុស្សី និងការធ្វើអន្តរាគមន៍ក្នុងសង្គ្រាមនៅប្រទេសស៊ីរី និងលីប៊ី។ តួកគីក៏ស្ថិតក្នុងស្ថានភាពប្រឈមមុខជាមួយប្រទេសក្រិក និងស៊ីបលើដែនទឹកនៅភាគខាងកើតសមុទ្រមេឌីទែរ៉ាណេផងដែរ៕
