បុរសជនជាតិកាណាដាម្នាក់ ត្រូវបានគេចោទប្រកាន់ថា បានបើកឡានបុកសមាជិកគ្រួសារមូស្លីមចំនួន ៥ នាក់ ធ្វើឱ្យមនុស្ស ៤ នាក់ស្លាប់ ដោយបច្ចុប្បន្នលោកកំពុងត្រូវប្រឈមនឹងការចោទប្រកាន់ពីបទល្មើសភេរវកម្មនៃឃាតកម្មកម្រិតទី១ និងការប៉ុនប៉ងមនុស្សឃាត។ នេះបើតាមឱ្យដឹងពីរដ្ឋអាជ្ញាកាលពីថ្ងៃចន្ទ កន្លងទៅ។
លោក Nathaniel Veltman អាយុ ២០ ឆ្នាំ ត្រូវបានចាប់ខ្លួនភ្លាមៗ កាលពីថ្ងៃទី ៦ ខែមិថុនា នៅក្នុងចំណតរថយន្ត ១ កន្លែងក្នុងទីក្រុង London រដ្ឋ Ontario ប្រទេសកាណាដា។ រដ្ឋអាជ្ញាបានជូនដំណឹងដល់លោក Veltman ថា លោកនឹងត្រូវបានគេចោទប្រកាន់ពីបទល្មើសភេរវកម្មតាមមាត្រា ៨៣ នៃក្រម ព្រហ្មទណ្ឌ។
ក្រុមគ្រួសារ ដែលមានសមាជិក ៥ នាក់នេះ បានចេញទៅដើរលេងពេលល្ងាចនៅតាមបណ្តោយផ្លូវ Hyde Park ខណៈរថយន្តភីកអាប់ពណ៌ខ្មៅ១គ្រឿង សំដៅបុកក្រុមគ្រួសារនេះមួយទំហឹង។ ជនរងគ្រោះ ដែលបានស្លាប់បាត់បង់ជិវិត ត្រូវបានគេស្គាល់ថាឈ្មោះ Salman Afzaal អាយុ ៤៦ ឆ្នាំ ជាមួយនឹងប្រពន្ធរបស់លោកអាយុ ៤៤ ឆ្នាំ ហើយនិងកូនស្រីអាយុ ១៥ ឆ្នាំម្នាក់ រួមទាំងជីដូនអាយុ ៧៤ ឆ្នាំម្នាក់ ខណៈដែលកូនប្រុសអាយុ ៩ ឆ្នាំម្នាក់បានរងរបួសធ្ងន់។
លោក Mubin Shaikh សាស្រ្តាចារ្យផ្នែកសុវត្ថិភាពសាធារណៈនៃមហាវិទ្យាល័យ Seneca បានមានប្រសាសន៍ថា៖ «ខ្ញុំមានការភ្ញាក់ផ្អើលជាខ្លាំង ខ្ញុំគិតថា ពួកគេនឹងមិនធ្វើការចោទប្រកាន់ពីអំពើភេរវកម្មទេ។ ខ្ញុំគិតថា គេនឹងចោទប្រកាន់ត្រឹមបទមនុស្សឃាតប៉ុណ្ណោះ។ ការសម្រេចចិត្តនេះ គឺជាជំហានសំខាន់មួយក្នុងការលុបបំបាត់នូវបទល្មើសរើសអើងពូជសាសន៍»។
ប៉ូលិសបានចោទប្រកាន់ថា ការវាយប្រហារនៅល្ងាចថ្ងៃទី ៦ ខែមិថុនា កន្លងទៅថា ជាសកម្មភាព ដែលបានគ្រោងទុក និងរៀបចំទុកជាមុន វាយប្រហារប្រឆាំងនឹងប្រជាជនមូស្លីម។ ប្រភពដដែលបានបន្ថែមថា ការកំណត់ការចោទប្រកាន់នេះ គឺដើម្បីធានានឹងជាការកាត់បន្ថយនូវ ការគំរាមកំហែងណាមួយកើតឡើងលើសាធារណជន ដែល«បង្កើតទៅជាបទឧក្រិដ្ឋភេរវកម្ម»៕